İnkişafın Azərbaycan
modeli: qeyri-neft sektorunun inkişafı
Hər bir
mərhələ üçün qarşıda duran
hədəflərin düzgün
müəyyənləşdirilərək müasir
dövrün tələblərinə cavab verən çevik
iqtisadi siyasətin həyata keçirilməsi,
mütərəqqi yeniliklərin tətbiqi yolu ilə
çoxşaxəli inkişaf strategiyasının
reallaşdırılması, infrastrukturun bütün
sahələrdə müasirləşdirilməsi Azərbaycan
iqtidarının qarşıya qoyduğu məqsədlər
sırasında mühüm yer tutur.
Modernləşməyə əsaslanan bu strategiya
respublikanın milli inkişaf modelinin əsasını
təşkil edən başlıca amilə çevrilmiş,
iqtisadi, siyasi və hüquqi islahatların paralelliyi prinsipinin
gözlənilməsi səmərəli
nəticələrə yol açmışdır.
Yeni neft strategiyasının 2003-cü ildən daha
yüksək nəticələrə yol açması, respublikamızın
regionda analoqu olmayan inkişaf mərhələsinə
qədəm qoyması - ümumi daxili məhsulun artım
tempi, büdcə gəlirlərinin ildən-ilə
əhəmiyyətli dərəcədə çoxalması
iqtisadi sektorda islahatların
genişləndirilməsinə, sosial-mədəni
modernləşməyə imkan yaratmışdır.
Bütün bunların nəticəsidir ki, Azərbaycanın
özünəməxsus inkişaf modelinin formalaşması
ilə bağlı başlanmış müzakirələr
son dövrlər daha da intensivləşmişdir. Aparılan
müzakirələr zamanı ölkənin insan amilini
əsas tutan sosialyönümlü siyasəti milli inkişaf
modelinin prioritet xətti kimi xüsusi vurğulanır.
Azərbaycan Respublikası Prezidenti
Administrasiyasının rəhbəri, akademik Ramiz Mehdiyevin
ideya müəllifliyi ilə işıq üzü
görmüş "İnkişafın Azərbaycan
modeli" kitabı milli inkişaf modelinin özünəməxsus
cəhətlərinin elmi tədqiqi və konseptual
şərhi istiqamətində uğurlu
təşəbbüslərdən biri kimi dəyərləndirilir.
"Azərbaycan"
qəzetinin Abşeron Rayon İcra Hakimiyyətində
keçirdiyi səyyar "dəyirmi masa"da
sözügedən əsər ətrafında
səmərəli müzakirələr aparılmış,
eyni zamanda insan amilinin yüksəlişinə xidmət
edən sosial-iqtisadi siyasətin son illərdə rayonun
həyatına gətirdiyi mühüm yeniliklərdən,
uğurlardan söhbət açılmışdır.
Tədbirdə rayonun fəalları, habelə ayrı-ayrı
idarə və struktur rəhbərləri, bələdiyyə
sədrləri iştirak etmiş, müxtəlif
sahələr üzrə əldə olunan nəticələr
barədə məlumat vermişlər.
"Dəyirmi
masa"nı giriş sözü ilə açan Milli
Məclisin deputatı, "Azərbaycan" qəzetinin
baş redaktoru Bəxtiyar SADIQOV
demişdir:
- Hər bir
ölkənin milli inkişaf yolunun
müəyyənləşməsində milli lider amili
müstəsnalıq təşkil edir. Bugünün
özündə də əksər ölkələr öz
liderlərinin müəyyənləşdirdikləri yolla
irəliləyir, böyük iqtisadi uğurlara imza atırlar.
XXI əsrin başlanğıcında
Azərbaycanın müstəqil dövlət kimi
bölgədə və dünyada layiqli yerini tapması,
regional liderliyini təmin etməsi, iqtisadi sahədə
keçid dövrünü uğurla başa vurması da
məhz lider amili ilə şərtlənir.
Ümummilli lider Heydər Əliyev yeni dünya
nizamı fonunda tamamilə fərqli - xalqın demokratik
idealları, milli dövlətçilik
təfəkkürü ilə uzlaşan, hər bir mərhələ
üçün konkret fəaliyyət prioritetləri, taktiki
və strateji məqsədləri olan milli iqtisadi inkişaf
strategiyasını irəli sürərək uğurla
həyata keçirdi. Müasir
Azərbaycanın prioritet inkişaf yoluna çevrilmiş
milli iqtisadi modelini özünəməxsus
uzaqgörənliklə əsaslandıran ümummilli lider bu
inkişaf strategiyasının yalnız demokratik
idarəetməyə əsaslanan möhkəm ictimai-siyasi
sabitlik şəraitində davamlı nəticələr
verə biləcəyini bəyan etdi.
Ulu öndər Heydər Əliyev göstərirdi
ki, keçmiş sovet dövründən miras qalmış
iqtisadi münasibətlər sisteminin xarakterini dəyişmədən,
torpaqları kəndlilərə paylamadan,
dövlətsizləşdirmə -
özəlləşdirmə proqramlarını
gerçəkləşdirmədən, ən başlıcası,
özəl sektorun inkişafı yolu ilə istehsal
potensialı yaratmadan həqiqi demokratiyaya, iqtisadi
azadlığa, səmərəli
təşəbbüskarlığa, sabitliyə və
əmin-amanlığa qovuşmaq mümkün deyildir. Məhz ulu öndərin əzmkar səyləri
ilə yeni neft strategiyasının hazırlanması və
1994-cü ildə "Əsrin müqaviləsi"nin
imzalanması hərtərəfli inkişaf üçün
yeni mərhələnin əsasını qoydu. 1996-cı
ildən etibarən isə dövlət mülkiyyətinin
xalqın mənafeyinə uyğun formada
özəlləşdirilməsi prosesinə
başlanıldı. Özəl sektorun inkişafı
istiqamətində atılan addımlar həm də
insanların şüurunda, həyat tərzində kardinal
dəyişikliklərə səbəb oldu.
Bu mərhələdən ölkədə həyata
keçirilən özəlləşdirmə prosesi hər
bir vətəndaşın iqtisadi islahatlarda şəxsi
marağını təmin etməyə, əhalinin həyat
səviyyəsini yaxşılaşdırmaq, sağlam
rəqabətə əsaslanan istehsal üçün
şərait yaratmaq niyyətinə xidmət edirdi.
İqtisadiyyatın bütün
sahələrini əhatə edən
özəlləşdirmə prosesi müstəqil
respublikamızda bazar iqtisadiyyatı prinsiplərinin
sürətlə formalaşmasına imkan yaratdı.
Ölkənin xarici iqtisadi əlaqələri yüksəldi,
dünya təsərrüfat sisteminə uğurlu inteqrasiya
təmin edildi. Bir çox postsovet respublikalarından
fərqli olaraq aqrar islahatlar da uğurla başa
çatdırıldı. Bu proses tamamilə obyektiv
şəkildə həyata keçirildi, heç bir ictimai
narazılıq doğurmadı. Torpaq əsl sahibinə -
kəndliyə qaytarıldı. Bütün bunların
nəticəsi olaraq 1996-cı ildən ölkə
iqtisadiyyatında tənəzzül meyillərinin
qarşısı alındı. 1998-ci ildən isə
iqtisadiyyatda müsbət meyillər özünü qabarıq
göstərməyə başladı. 90-cı illərin ortalarından
həmçinin ölkədə struktur islahatları
aparıldı, çevik idarəetmə sistemi
formalaşdırıldı.
Bu
mükəmməl inkişaf strategiyası 2003-cü ilin
oktyabrından inamla davam etdirilir. Xüsusən də son
illər respublikada elmi əsaslara söykənən liberal
iqtisadi sistemin qurulması istiqamətində mühüm
addımlar atılır. Vətəndaşların iqtisadi
azadlığına, təşəbbüskarlığına
geniş meydan verilir, sahibkarlığın, qeyri-neft sektorunun
inkişafı dəstəklənir. Zəngin təbii
sərvətlərdən səmərəli istifadə edilməsi
ölkəyə ciddi iqtisadi dividend gətirməklə
yanaşı, respublikamızın Avropanın enerji
təhlükəsizliyindəki rolunu gücləndirir. Bu
və digər konseptual əhəmiyyətli tədbirlərin
nəticəsi olaraq Azərbaycan iqtisadiyyatı son
illərdə təkcə sürətli inkişafla deyil, eyni
zamanda yeni keyfiyyət parametrləri ilə də
özünü təsdiqləyib. Bir sıra
aparıcı Qərb dövlətlərinin onilliklər boyu
keçdiyi inkişaf mərhələlərini qısa
müddətdə adlayaraq iqtisadi sahədə keçid
dövrünü başa vuran Azərbaycan artıq Cənubi
Qafqaz regionunda mühüm rolu, mövqeyi ilə
seçilən lokomotiv dövlətə çevrilib.
Respublikamız 2008-2010-cu illərdə qlobal dünya iqtisadi
böhranına mətinliklə sinə gərib. Eyni zamanda
iqtisadi sahədə keçid dövrünü başa vuraraq
inkişafının keyfiyyətcə yeni
mərhələsinə qədəm qoyub.
"Biz xalq
üçün işləyirik. Məqsədimiz
də odur ki, ölkə vətəndaşları
vəziyyətin ildən-ilə daha da
yaxşılaşmasını görsünlər, bunu
gündəlik həyatlarında hiss etsinlər" - deyən
Azərbaycan Prezidenti İlham Əliyev bu məqsədə
xidmət edən çoxşaxəli islahatları uğurla
həyata keçirir. Davamlı yüksəlişi
təmin etmək üçün ölkənin daxili
potensialından səmərəli şəkildə
bəhrələnir. Prezident İlham Əliyevin uğurla davam
etdirdiyi sosial-iqtisadi strategiya kompleks inkişafın
əsasını təşkil etməklə yanaşı,
həm də respublikamızın milli iqtisadi inkişaf
modelinin tam formalaşmasını təmin edib.
Xüsusi vurğulamaq istərdim ki, son illərdə
cəmiyyət üçün əhəmiyyətli və
aktual olan məsələlərlə bağlı sanballı
elmi araşdırmalar aparan Prezident Administrasiyasının
rəhbəri, hörmətli akademik Ramiz Mehdiyevin ideya və
ön söz müəllifliyi ilə işıq üzü
görən "İnkişafın Azərbaycan
modeli" kitabında da məhz milli inkişaf modelinin
səciyyəvi xüsusiyyətlərindən geniş bəhs
olunur. Kitabla tanışlıq zamanı bir daha məlum olur
ki, Azərbaycanın iqtisadi inkişaf modeli bütün
mahiyyəti ilə sırf insan və vətəndaş
amilinin yüksəlişinə xidmət edir. Biz bu saf niyyəti
dövlət başçısının son illər
paytaxtın və bölgələrin inkişafı
məqsədi ilə imzaladığı fərmanlardan,
sərəncamlardan, dövlət proqramlarından daha aydın
görürük.
Cənab
İlham Əliyev ilk gündən inkişaf prosesində
tarazlığın və davamlığın təmin
edilməsi, hər bir bölgənin faydalı
məşğulluq ənənələrinin
bərpasını strateji məqsəd kimi qarşıya
qoydu. Azərbaycan Respublikası regionlarının
sosial-iqtisadi inkişafı ilə bağlı birinci
Dövlət Proqramı bu istiqamətdə ilk fundamental
sənədlərdən oldu. Həmçinin
dövlət başçısı ayrı-ayrı iqtisadi
rayonların inkişafı ilə bağlı əlavə
olaraq 17 sərəncam imzaladı. Bütün
sahələrdə sosialyönümlü infrastruktur
layihələri həyata keçirildi, rayonların
işıq, su, qaz problemi həllini tapdı. Qeyri-neft
sektorunun, sahibkarlığın inkişafı istiqamətində
atılan kompleks tədbirlər nəticəsində
ölkədə 900 mindən çox yeni iş yeri
yarandı, yoxsulluğun səviyyəsi 49 faizdən 11
faizə endi.
Dövlət başçısının 2009-cu ilin
aprelində imzaladığı Azərbaycan Respublikası
regionlarının sosial-iqtisadi inkişafı ilə
bağlı ikinci Dövlət Proqramı isə bu
sahədə əlavə tədbirlərin həyata
keçirilməsinə imkan yaratdı. Hazırda icrası
davam etdirilən dövlət proqramının əsas
məqsədi ölkədə qeyri-neft sektorunun
inkişafının sürətləndirilməsinə,
iqtisadiyyatın şaxələndirilməsinə, tarazlı
regional və davamlı sosial-iqtisadi inkişafa, əhalinin
həyat səviyyəsinin daha da
yaxşılaşdırılmasına nail olmaqdır.
Xüsusi vurğulamaq istərdim ki, proqramda Azərbaycanın
mühüm iqtisadi-inzibati mərkəzlərindən
sayılan Abşeron rayonunun sosial-iqtisadi inkişafı ilə
bağlı da kompleks tədbirlər nəzərdə tutulub.
Bugünkü
"dəyirmi masa"nın bütün sahələrdə
inkişaf edən Abşeron rayonunda keçirilməsi də,
bu mənada, təsadüfi deyildir. Hesab edirəm ki, burada aparılan
müzakirələr, səslənən məlumatlar milli
iqtisadi inkişaf modelində insan və vətəndaş
amilinə qayğı siyasətinin də prioritet
məsələ olduğunu əyani surətdə
göstərəcəkdir.
İlk olaraq
sözü Abşeron Rayon İcra Hakimiyyətinin
başçısı Zakir Fərəcova verirəm.
Zakir
FƏRƏCOV:
-
Azərbaycan dövlətinin memarı və qurucusu, ulu
öndər Heydər Əliyevin uzaqgörənliklə
müəyyən etdiyi iqtisadi siyasət ölkəmizin
sosial-iqtisadi yüksəlişini təmin edən başlıca
amildir. Bu siyasi xətti inamla davam etdirən
Azərbaycan Prezidenti İlham Əliyevin elmi əsaslara söykənən
iqtisadi siyasəti nəticəsində Azərbaycan iqtisadi
inkişaf tempinə görə nəinki MDB məkanında,
eləcə də bütövlükdə Şərqi Avropa
ölkələri arasında liderliyini qoruyub saxlayır.
Azərbaycan Respublikası Prezidenti
Administrasiyasının rəhbəri, akademik Ramiz Mehdiyevin
ideya rəhbərliyi və təşəbbüsü ilə
işıq üzü görən və respublikamızın
son 17 ildə keçdiyi tərəqqi yolunun xronoloji ardıcıllığını
əks etdirən kitabın "İnkişafın
Azərbaycan modeli" adlandırılması
bütövlükdə bu sanballı əsərə
münasibətin obyektiv qiyməti hesab edilə bilər.
Kitabda iqtisadi inkişafın Azərbaycan modelinin təməl
prinsipləri, mülkiyyətin
çoxnövlülüyü, azad bazar mexanizmləri, sosial
inkişafın Azərbaycana xas xüsusiyyətləri və
digər məsələlər dolğun əksini
tapmışdır.
"İnkişafın Azərbaycan modeli"
kitabında ölkənin iqtisadi qüdrətinin
artırılmasını təmin etmiş fərmanlar,
sərəncamlar, qanunlar, qərarlar,
dövlətlərarası ikitərəfli və
çoxtərəfli müqavilələr, sazişlər,
Azərbaycanın bərabərhüquqlu tərəf kimi
qoşulduğu beynəlxalq konvensiyalar və digər
mühüm aktların tarixi əhəmiyyətinin
şərhi diqqəti çəkir. Bütövlükdə
ölkəmizin iqtisadi qüdrətinin yüksəlişi
təbii ki, hamımızda qürur hissi doğurur.
2005-ci il avqustun 11-də mənə yüksək
etimad göstərərək Abşeron Rayon İcra
Hakimiyyətinin başçısı vəzifəsinə
təyin edən möhtərəm Prezident İlham Əliyev
rayonun sosial-iqtisadi göstəricilərinin orta respublika
səviyyəsindən kəskin surətdə aşağı
olduğunu, Abşeronun ötən
əsrin 70-80-ci illərdəki şöhrətinin çoxdan
itirildiyini, ölkənin paytaxtının giriş
qapılarından sayılan bu rayonda abadlıq-quruculuq
işlərinin unudulduğunu bütün kəskinliyi ilə
vurğuladı. Həmçinin, qısa müddətdə
bütün sahələrdə dönüş
yaradılması, yaşayış məntəqələrinin
çoxdan həllini gözləyən sosial problemlər
məngənəsindən çıxarılması
vəzifəsini qarşıya qoydu.
Respublikamızın hər yerində geniş
vüsət almış quruculuq əhval-ruhiyyəsinin
Abşeronda canlanması istiqamətindəki təşkilati
tədbirlərimiz təsirsiz ötüşmədi. İlk
növbədə, bütün yaşayış
məntəqələrində yerli ziyalılarla, nüfuzlu
ağsaqqallarla görüşüb mövcud durumu
müzakirə etdik. Hər yerdə oxşar
şikayətlərlə qarşılaşdıq: əhali
elektrik enerjisi, təbii qaz və içməli su sarıdan
ciddi korluq çəkirdi. Eyni zamanda ictimai
binalar, o cümlədən məktəblər, uşaq
bağçaları, səhiyyə və mədəniyyət
ocaqlarının yerləşdiyi binaların böyük
əksəriyyətinin qəzalı vəziyyəti,
küçə və yolların bərbadlığı,
icra strukturlarının bu problemlərə biganə
münasibəti təxirəsalınmaz tədbirlər
görülməsini tələb edirdi.
Abşeron
Rayon İcra Hakimiyyəti başçısı yanında
şuranın geniş iclasında təxirəsalınmaz
tədbirlərin konkret vaxt çərçivəsində
icrasını təmin etmək barədə xidmət
təşkilatlarının rəhbərlərinə
tapşırıqlar verildi. Yaşayış
məntəqələrinin, ilk növbədə, əsas
küçə və yolların
abadlaşdırılmasına dair proqram müəyyən
edildi.
Sosial problemlərin ardıcıl həlli diqqət
mərkəzində saxlanıldı, rayon
iqtisadiyyatının gücləndirilməsini təmin
edəcək iri layihələrin reallaşması
üçün investisiya qoyuluşuna münbit şərait
yaradıldı. Qısa müddətdə iri istehsal
müəssisələri tikilərək işə salındı.
"Mətanət-A", "Azbentonit"
MMC-lər, "Ay qida", "Aysu",
"Səhliyalı" kimi sənaye
müəssisələri, Masazır "Duz", Qobu,
Aşağı Güzdək, Məmmədli kərpic
zavodları və digərləri rayon iqtisadiyyatının
güclənməsində, eyni zamanda məşğulluğun
təmin edilməsi və yoxsulluğun azaldılmasında
mühüm əhəmiyyət kəsb edir.
Rayonda son
beş il ərzində 12 mindən çox yeni iş yeri
açılmışdır. İnkişafın Azərbaycan
modeli ölkədə iqtisadiyyatın qeyri-neft sektorunun
hərtərəfli inkişafının təmin
olunmasının aydın perspektivlərini müəyyən
edir. Qeyri-neft sektorunun prioritet sahələrindən biri kimi
aqrar sferanın yüksəlişinə dövlət
dəstəyi daim artırılır. Respublika Prezidentinin
rəhbərliyi altında həyata keçirilən
siyasətin məntiqi nəticəsi olaraq, iqtisadi inkişafda,
ümumi daxili məhsul istehsalında aqrar sektorun
çəkisi yüksəlir. Bunu rayonumuzun
nümunəsində də aydın görmək olur.
Bütövlükdə respublikamızın digər regionlarında
olduğu kimi, əvvəllər rayonumuzda da büdcə
xərclərinin cəmi 10-15 faizi yerli gəlirlər
hesabına ödənildiyi halda, bu nisbət artıq 85 faizi
ötmüşdür. Həm də bu göstərici
yüksələn xətt üzrə inkişaf
etməkdədir.
Rayonda
qeyri-neft sektoru sahəsində iqtisadiyyatın sürətli
artımı genişmiqyaslı abadlıq və quruculuq
layihələrinin reallaşdırılmasına imkan yaratmış,
yaşayış məntəqələrimizin siması
tanınmaz dərəcədə dəyişmişdir.
"Abadlıq yoldan başlanır" prinsipi ilə son
beş ildə yaşayış məntəqələri
arasındakı yollara, daxili küçə və meydanlara
310,0 min kubmetr qırmadaş tökülüb
bərkidilmiş, 2,8 milyon kvadratmetrdən artıq asfalt
örtük çəkilmişdir. Müqayisə
üçün bildirək ki, bu rəqəm eni 6 metrlik 432 km
uzunluqda avtomagistralın çəkilişinə bərabərdir.
Piyada səkilərinin nəqliyyatın
hərəkət zolağından ayrılmasını
təmin etmək üçün 35 min metrdən artıq
uzunluqda bardür quraşdırılmış,
səkilərin 3,1 min kvadratmetrinə tamet
döşənmişdir. Şəhər, qəsəbə
və kəndlərin əsas küçə və yolları
boyunca yaşayış evləri, ictimai binalar,
özəl obyektlər və hasarların üst-üstə
40,0 min kvadratmetrlik fasadları təbii bərk süxurlardan
hazırlanmış mozaik örtüklər, müasir
üzlük materiallar, əhəng daşlarından
yonulmuş milli ornamentlərlə bəzədilmişdir.
Rayonun
elektrik enerjisi, təbii qaz və içməli su ilə
təminatında illər uzunu yığılıb
qalmış problemlərin aradan qaldırılması
istiqamətində də xeyli iş
görülmüşdür. Yaşayış
məntəqələrində 400-dən çox
müxtəlif gücə malik transformator
quraşdırılmış, 1200 km-dən çox hava
elektrik ötürücü xətləri
çəkilmiş, şəbəkədaxili 183,2 km uzunluqda
özünü izolyasiya örtüklü kabel xətləri
çəkilərək sayğaclaşdırma başa
çatdırılmışdır. Xırdalan
şəhərindəki Əliağa Vahid elektrik
yarımstansiyası yenidən qurulmuş, Masazırda 50
meqavolt amperlik yeni yarımstansiyanın tikinti-quraşdırma
işləri tamamlanmışdır.
Regionların
sosial-iqtisadi inkişafına dair ikinci Dövlət
Proqramına uyğun olaraq rayonun qaz təsərrüfatı
da əsaslı surətdə yenidən qurulur. Təkcə bir
faktı - 633 km daşıyıcı qaz xəttinin çəkilməsini
qeyd etmək kifayətdir ki, bu sahədə görülən
işin həcmi barədə əyani təsəvvür
yaransın. Eyni zamanda 114,7 km yeni su xətləri
çəkilmiş, 20,2 km korroziyaya uğramış xətt
bərpa olunmuş, mövcud kanalizasiya şəbəkəsi
xeyli genişləndirilmişdir. Qəsəbə və
kəndlərdə qar-yağış sularını
kənarlaşdırmaq üçün 18,5 km arx tikilmiş,
80,1 km kanalizasiya xətləri çəkilmişdir.
Uzun illər qəza vəziyyətində istismar
olunan 4,2 km uzunluqda qoşa xətli Xırdalan təzyiqli
kanalizasiya nasosxanasının 820 mmd boru kəməri
əsaslı qaydada bərpa olunub istismara verilmişdir. 1982-ci
ildən 2005-ci ilədək rayonun ərazisində nəinki
ümumtəhsil məktəbi tikilməmiş, hətta mövcud
məktəblərin əsaslı təmiri belə təmin
olunmamışdı.
Möhtərəm Prezidentin böyük
qayğısı və ümumiyyətlə,
ölkədə təhsilin kökündən
yaxşılaşdırılması problemlərinə
diqqətini rayonumuzda təhsilin maddi-texniki bazasının
möhkəmləndirilməsində, məktəb
şəbəkəsinin genişləndirilməsində bir
daha yaxından gördük. Rayonda
"təhsil ili" elan etdiyimiz 2006-cı ilin 12
sentyabrında Abşerona tarixi səfəri
çərçivəsində Xırdalan
şəhərində 1296 yerlik orta məktəbin təməlini
qoyan möhtərəm Prezident İlham Əliyevin
xeyir-duası ilə 2006-2007-ci illərdə rayonda 12 yeni orta
ümumtəhsil məktəbi tikilib istifadəyə verildi.
1660 şagird yerlik 83 əlavə sinif otağından
ibarət tədris korpusları inşa olundu. 2008-2009-cu
dərs ili ərəfəsində daha iki orta məktəbin
tikintisi başa çatdırıldı.
Qısa
müddətdə rayonda səhiyyə xidmətinin
kökündən yaxşılaşdırılması
üzrə proqram uğurla həyata keçirildi. Daxili imkanlar və müvafiq
bələdiyyələrin maliyyə dəstəyi ilə
Novxanı, Mehdiabad, Masazır, Hökməli, Aşağı
Güzdək, Güzdək, Ceyranbatan, Qobustan, Görədil
və Məmmədli yaşayış
məntəqələrində müasir standartlara cavab
verən həkim ambulatoriyaları tikilib istifadəyə
verildi. Xırdalan şəhərində, Saray və Qobu
qəsəbələrindəki stasionar müalicə
ocaqları əsaslı təmir olundu, müasir tibbi
avadanlıq, nəqliyyat vasitələri və zəruri
inventarlarla təchiz edildi.
2006-cı ildən başlayaraq mədəni-maarif
müəssisələrinin uzun illərin
baxımsızlığı ucbatından ciddi aşınmaya
məruz qalmış binalarının əsaslı təmiri,
yenilərinin tikilib istifadəyə verilməsi ilə
bağlı proqramın icrasına 9,5 hektarlıq şam
meşəsinin ərazisində ulu öndərin adına
Mədəniyyət və istirahət parkının
salınmasından başladıq. Qısa müddətdə
burada Heydər Əliyev abidə kompleksi, Heydər Əliyev
muzeyi tikildi, bir neçə yerdə fəvvarələr,
əyləncə guşələri yaradıldı. Parkın
ərazisindəki Tarix-diyarşünaslıq Muzeyi
əsaslı qaydada yenidən quruldu, əlavə eksponatlarla
zənginləşdirildi. Eyni vaxtda şəhər
mədəniyyət sarayının yararsız hala
düşmüş nəhəng binasının
əsaslı təmiri və bom-boş çölə
bənzəyən ətrafının abadlaşdırılması
davam etdirildi.
2006-cı ilin 12 sentyabrında dövlət
başçısının iştirakı ilə
abşeronluların müqəddəs ziyarətgahı və
mənalı istirahət məkanı olan "Heydər
parkı"nın izdihamlı mitinqlə müşayiət
olunan təntənəli açılışı
sürətli sosial-iqtisadi inkişafının yeni mərhələsinin
başlanğıcı kimi Abşeron rayonunun tarixinə
yazıldı.
Rayon
ərazisində cəmi bir il ərzində həyata
keçirilmiş abadlıq və quruculuq işlərinə
möhtərəm Prezident İlham Əliyevin verdiyi
yüksək qiymət rayonda start götürmüş
qurub-yaratmaq mühitinin daha da şaxələnməsində
güclü stimul oldu. Bir-birinin ardınca dövlət
başçısının rayonumuzla bağlı
imzaladığı sərəncamlar səylərimizi birə
beş artırmağa sövq etdi. Xüsusilə
rayon mərkəzinə şəhər statusunun verilməsi,
43 il əvvəl itirdiyi 416 hektarlıq ərazisinin yenidən
Xırdalanla birləşdirilməsi, vaxtilə rayonun
sosial-iqtisadi inkişafında xidmətləri olmuş
abşeronluların orden və medallarla, fəxri adlarla təltif
olunması rayonda sonsuz razılıq və minnətdarlıqla
qarşılandı.
Bu gün Xırdalan ərazisində
ucaldılmış çoxmərtəbəli
yaşayış evləri, göz oxşayan park və
xiyabanlar, əzəmətli təhsil, səhiyyə və
mədəniyyət ocaqları, idarə, müəssisə
və təşkilatların ofisləri, ticarət,
iaşə və məişət xidməti obyektləri,
yaşıllıqlarla əhatə olunmuş abad prospekt
və küçələr şəhərimizin
simasını tanınmaz dərəcədə
dəyişmişdir.
İnkişafın
Azərbaycan modelinin bundan sonra da uğurlu tədqiqinin hər
sahədə sürətli irəliləyişimiz
üçün geniş imkanlar açacağına
möhkəm inanırıq. Başa çatmaqda olan 2010-cu ili
sosial-iqtisadi sahədə yeni nailiyyətlərlə
əlamətdar etmək üçün il boyu qüvvə
və səylərimizi səfərbərliyə
almışıq. Möhtərəm Prezidentin
2006-cı ilin 12 sentyabrında dediyi "Bir halda ki,
abşeronlular belə yaxşı çalışırlar,
deməli, gələcəkdə daha böyük işlər
görəcəklər" sözləri artıq hər bir
abşeronlunu qurub-yaratmağa səsləyən
səfərbəredici şüara çevrilmişdir.
Bəxtiyar SADIQOV:
-
Azərbaycanın özünəməxsus inkişaf modeli olsa
da, respublikamız digər ölkələrin də
təcrübəsini daim öyrənir, mütərəqqi
iş üsul və vasitələrini tətbiq etməyə
çalışır. Prezident İlham
Əliyev hələ bir neçə il bundan əvvəl
Nazirlər Kabinetinin iclasında xarici ölkələrin
memarlıq və şəhər təsərrüfatı
sahəsindəki təcrübəsinin öyrənilməsi
vacibliyi ilə bağlı icra strukturlarına
tövsiyələrini vermişdir. Abşeron rayonu da
səmərəli beynəlxalq əlaqələr qurmaqla, bu
istiqamətdə uğurlu nəticələr əldə
etməyə çalışır. Bu mövzuda
məruzə etmək üçün söz Abşeron Rayon
İcra Hakimiyyəti başçısının təhsil,
səhiyyə və mədəniyyət
məsələləri üzrə müavini İradə
Gülməmmədovaya verilir.
İradə
GÜLMƏMMƏDOVA:
-
İslahatlar prosesi dərinləşdikcə,
Azərbaycanın beynəlxalq əlaqələri də
genişlənir, dünyanın bir çox ölkələri
ilə dostluq və qarşılıqlı
əməkdaşlıq əlaqələri yaradılıb
inkişaf etdirilir. Respublikanın beynəlxalq
əlaqələrinin genişləndirilməsində rayonun
fəal mövqeyi hər bir abşeronluda haqlı iftixar hissi
doğurur. Xatırlatmaq yerinə
düşər ki, ulu öndər Heydər Əliyev
müstəqil Azərbaycan Respublikasının Prezidenti kimi
Misir Ərəb Respublikasına səfəri zamanı bu ölkənin
Prezidenti Hüsni Mübarəklə işgüzar
danışıqlar aparmış, ölkələrimiz
arasında dostluq və qarşılıqlı
əməkdaşlığın uğurlu
təməlini qoymuşdur.
Bu
əlaqələr dövlət başçısı
İlham Əliyevin 2007-ci ilin mayında MƏR Prezidenti
Hüsni Mübarəkin dəvəti ilə dost
ölkəyə işgüzar səfəri
çərçivəsində daha da
genişləndirilmişdir. Bir çox
sahələri əhatə edən dövlətlərarası
saziş, müqavilə və memorandumla təsdiq olunmuş
sənədlər paketinə Misir Ərəb Respublikasının
Qəlyubeya quberniyası ilə rayonumuzun dostluq,
qardaşlıq və qarşılıqlı əməkdaşlığına
dair ayrıca memorandum daxil edilmişdir. Təbii ki, bu,
dövlət başçısının Abşeron rayonunda
genişmiqyaslı quruculuq layihələrinin uğurla
həyata keçirilməsinə verdiyi yüksək
qiymətin, rayon rəhbərliyinə göstərdiyi
yüksək etimadın ifadəsidir.
Bu etimadı
əməli işdə doğrultmaq üçün ona nail
olmalı idik ki, Abşeron rayonu beynəlxalq
müstəvidə əsl dostluq və
əməkdaşlıq məkanına çevrilsin. Bu məqsədlə rayon icra hakimiyyətinin
başçısı Zakir Fərəcovun rəhbərliyi
ilə 14 nəfərdən ibarət nümayəndə
heyətinin 2008-ci il fevral ayında Misir Ərəb
Respublikasına səfəri zamanı ölkənin
paytaxtı Qahirə şəhərinə bitişik beş
milyon nəfərə yaxın əhalisi olan Qəlyubeya
quberniyasında dostluğumuzun təməl sənədi olan
memorandum detallaşdırıldı. Tərəflər
arasında ikitərəfli əlaqələrin
perspektivlərinin müəyyən edilməsi barədə
razılığa müvafiq protokol imzalandı.
Səfər
proqramı çərçivəsində işgüzar
görüşlər keçirdik. Təhsil,
səhiyyə, mədəniyyət ocaqlarının,
sənaye, nəqliyyat, emal müəssisələrinin
fəaliyyəti, qədim mədəniyyətə malik Misirin
tarixi abidə və muzeyləri ilə tanış olduq.
Ən başlıcası, dost ölkənin sakinlərində
Azərbaycan haqqında mümkün qədər geniş təsəvvür yaratmaq üçün
nümayəndə heyətinin üzvləri misirli
həmkarlarını xalqımızın
adət-ənənələri, ölkəmizin iqtisadiyyatı,
Qarabağ münaqişəsinin əsl mahiyyəti
barədə məlumatlandırdılar. İlk səfərin
yekununda tərəflər arasında razılıq
əldə olundu ki, Qəlyubeya şəhərinin
mərkəzində 7 hektar ərazidə Azərbaycan
xalqının ümummilli lideri Heydər Əliyevin adına
park salınacaq, onun mərkəzində ulu öndərin
heykəli ucaldılacaq, mərkəzi
küçələrdən birinə Azərbaycan adı
veriləcəkdir. Qarşılıqlı olaraq Xırdalan
şəhərində "Azərbaycan-Misir Dostluğu"
parkının salınması, burada Hüsni Mübarəkin
heykəlinin ucaldılması, şəhərin mərkəzi
küçələrindən birinin "Qəlyubeya"
adlandırılmasını öhdəmizə
götürdük.
Xalqlarımız arasında dostluğun rəmzi olan,
hər iki xalqın ümummilli liderlərinin adını
daşıyan parkların təntənəli
açılışı münasibəti ilə izdihamlı
mitinqlərdə geniş tərkibli qarşılıqlı nümayəndə
heyətlərimiz iştirak etdilər. Misirli
dostlarımız Qəlyubeya şəhərində 1600
nəfər şagirdin təhsil alacağı nəhəng
məktəb kompleksinə Azərbaycanın birinci
xanımı, YUNESKO-nun və İSESKO-nun xoşməramlı
səfiri, Heydər Əliyev Fondunun prezidenti Mehriban
Əliyevanın adının verilməsi barədə
qərar qəbul etdiklərini, məktəbin
açılışında iştirak etmək
üçün rayonumuzun nümayəndə heyətinin 3
oktyabr 2009-cu il tarixdə dost diyara səfərini
arzuladıqlarını bildirdilər. Dəvəti
məmnuniyyətlə qəbul etdik və məktəbin təntənəli
açılışı münasibətilə mitinqdə
iştirak etdik.
Biz də
Xırdalan şəhərində təməli
möhtərəm Prezident İlham Əliyev
tərəfindən qoyulmuş 1296 şagird yerlik 9 saylı
orta məktəbə Misirin birinci xanımı Suzen
Mübarəkin adının verilməsi barədə
qərarımızı bildirdik. Suzen
xanımı məktəbimizə dəvət etdik.
Əvvəlcədən ərəb dili təmayüllü bu
məktəbdə Misirin qədim tarixini və
bugününü fotolarda əks etdirən xüsusi
guşə, Suzen Mübarəkin adından məktəbə
hədiyyə olunmuş əyani vəsait və dərslik
nümunələrindən ibarət daim fəaliyyət
göstərən məktəb dostluq muzeyi yaradıldı.
Suzen xanım 26 sentyabr 2008-ci il tarixdə məktəbin
qonağı oldu və bu görüş unudulmaz təəssüratla
yadda qaldı.
Qəlyubeya
quberniyası ilə iqtisadi əlaqələrimiz də
inkişaf etməkdədir. Rayon ərazisində müasir
dərman preparatları zavodunun misirlilər
tərəfindən tikintisinə 4,0 ha torpaq sahəsi
ayrılmışdır. Artıq layihə-smeta
sənədləri hazırlanır. Yaxın
gələcəkdə Abşeronda daha bir iri
müəssisənin - mərmər zavodunun tikintisi
barədə dostlarımızın müraciətinə
RİH-də baxılıb müsbət cavab verilmişdir.
Beynəlxalq
əlaqələrimiz təkcə Misir Ərəb
Respublikasının Qəlyubeya quberniyası ilə
məhdudlaşmır. Xırdalan
şəhəri ilə Türkiyənin paytaxtı
Ankaranın Yıldır bələdiyyəsi arasında
dostluq, qardaşlıq və qarşılıqlı
əməkdaşlıq sazişi imzalandığı
gündən ikitərəfli əlaqələr
çərçivəsində bir sıra yaddaqalan
tədbirlər həyata keçirilmişdir. Ulu
öndərin xalqlarımızın sarsılmaz dostluğunun
zərb məsəli kimi dillər əzbəri olmuş
"Biz bir millət, iki dövlətik!" kəlamı
Abşeron-Yıldır əlaqələrinin leytmotivinə
çevrilmişdir. Azərbaycana, ulu
öndər Heydər Əliyevin dahi şəxsiyyətinə
böyük sayğı və ehtiramlarını
nümayiş etdirən türk qardaşlarımız
şəhərin ən görməli ərazisində
təbii mənzərəsi göz oxşayan 21 hektarlıq
sahədə Heydər Əliyevin şərəfinə unikal
park yaratmış, mərkəzində ümummilli
liderin möhtəşəm abidəsini ucaltmışlar. Parkın təntənəli açılış
mərasimində iştirak edən nümayəndə
heyətimiz qardaş Türkiyədə türk
dünyasının böyük oğlu Heydər
Əliyevə, Azərbaycana və azərbaycanlılara sonsuz
dostluq və qardaşlıq duyğularının şahidi
olmuşlar.
Bəxtiyar SADIQOV:
-
Azərbaycanın inkişaf modelinin səciyyəvi
xüsusiyyətlərindən biri də qeyri-neft sektorunun
inkişafı məqsədi ilə sahibkarlığın
yüksək dinamizmlə inkişaf etdirilməsidir.
Dövlət başçısı İlham Əliyevin
indiyə qədər imzaladığı mühüm
fərman və sərəncamlar, dövlət proqramları
özəl sektorun ümumi daxili məhsul istehsalında
xüsusi çəkisini əhəmiyyətli
dərəcədə artırmışdır. Abşeronun bu
sahədə əldə etdiyi nəticələr də rayonun
ümumi inkişafı baxımından maraq doğurur. Bu
sahədə qazanılan nəticələr barədə
danışmaq üçün söz Abşeron Rayon İcra
Hakimiyyəti başçısının müavini
Mirzəbala Aslanova verilir.
Mirzəbala ASLANOV:
- Rayonda
həyata keçirilmiş kadr islahatları Abşeronun
üzləşdiyi problemlərin həllində
keyfiyyətcə yeni mərhələ açmış,
iqtisadi tənəzzül prosesinin qarşısı
alınmışdır. Etiraf etməliyik ki,
uzun illər rayon iqtisadiyyatının əsasını
təşkil edən kənd təsərrüfatı
məhsullarının istehsalı 5 il əvvələcən
ildən-ilə kəskin surətdə azalırdı. 2005-ci
ildə əvvəlki ilə nisbətən meyvə
istehsalı 997 ton, o cümlədən zeytun istehsalı 905 ton, badam 107 ton, innab 20 sentner
azalmışdı. Yerli gəlirlər hesabına
büdcə xərcləri vur-tut 10-12 faizi ödənilirdi.
İqtisadiyyatın son dərəcədə zəifliyi
üst-üstə yığılıb qalmış sosial
problemlərin aradan qaldırılmasına imkan vermirdi.
Bütün bunlar ölkə rəhbərliyini
də qayğılandırdığından, rayonun
rəhbərliyi möhkəmləndirildi, qarşıda
təxirəsalınmaz vəzifələr qoyuldu. Ən
başlıcası, ölkədə bərqərar olunmuş
yeni tipli iqtisadiyyatın Abşeronun yüksəlişində
əsas amilə çevrilməsi üçün
təşkilati tədbirlərin müəyyən edilib
həyata keçirilməsinə başlandı.
Rayona investisiya qoyuluşlarına, kiçik və
orta sahibkarlığın genişlənməsinə
şərait yaradıldı. Bir-birinin ardınca iri sənaye
müəssisələri tikilib işə salındı, aqrar
sahənin dirçəldilməsinə qayğı
artırıldı. 2005-ci ilə nisbətən ötən
dövr ərzində rayon üzrə orta illik ümumi daxili
məhsulun həcmi 8 dəfə artırılaraq 1
milyard 104 milyon manata, sənaye məhsulları istehsalı 3 dəfə
artırılaraq 394,2 milyon manata, kənd
təsərrüfatı məhsulları istehsalı 2,4
dəfə artırılaraq 185,7 milyon manata
çatdırılmışdır. Son beş il
ərzində əsas kapitala yönəldilən investisiyalar
12,4 dəfə artırılaraq 376,2 milyon manata
yüksəlmişdir.
Yeni
müəssisələrin yaradılması hesabına
2004-2010-cu illər ərzində 12 mindən çox iş
yeri açılmışdır. Rayonda iqtisadiyyatın
sürətli artımı dövlətin qeyri-neft sektorunun
inkişafına yönəlmiş strategiyasının
ardıcıl həyata keçirilməsi ilə üzvi
surətdə bağlıdır. Bu siyasət həm də
əhalinin rifah halının
yaxşılaşdırılmasına şərait
yaradır. Həyata keçirilən sosial
proqramların icrası ölkədə olduğu kimi,
rayonumuzda da yoxsulluğun kəskin surətdə azalması,
əməkhaqlarının, pensiya və müavinətlərın
artması ilə müşayiət olunur.
Şəhərdə, qəsəbə və
kəndlərdə infrastruktur layihələrinin
reallaşması əhalinin güzəranın
yaxşılaşmasında mühüm rol oynayır. Bu
isə daha genişmiqyaslı quruculuq və abadlıq
layihələrinin həyata keçirilməsinə imkan verir.
Məlumdur
ki, yol infrastrukturunun inkişafı gərgin zəhmət
və böyük məbləğdə maliyyə vəsaiti
tələb edir. Son beş ildə rayonun
ərazisində yaşayış məntəqələri
arasındakı yollara, şəhər, qəsəbə
və kəndlərin küçə və meydanlarına 2
milyon 800 min kvadratmetr asfalt örtük çəkilmiş,
yeni yaşayış məhəllələrinin
küçələrini gələcəkdə asfaltlamaq
məqsədilə 260 min kubmetr çınqıl
döşənib bərkidilmişdir.
Əhalinin elektrik enerjisi, təbii qaz və su ilə
təminatındakı problemlərin aradan
qaldırılması məqsədilə
şəbəkələrdə iri həcmli təmir-bərpa
işləri aparılmış, mövcud
şəbəkələr 1,5-2 dəfə
genişləndirilmişdir. Ərazidə sənayenin
getdikcə daha çoxşaxəli inkişafı
deməyə əsas verir ki, rayonun iqtisadiyyatının
güclənməsi uğurla davam edəcəkdir.
Son illər
aqrar sektorun sənaye əsasında inkişafı daha
sürətlə gedir. Yeni-yeni fermer
təsərrüfatları yaranır, il boyu tərəvəz
istehsalına imkan verən istixanalar şəbəkəsi
genişlənir. Ət və süd, digər heyvandarlıq
məhsullarının istehsalının artımı ilə
yanaşı, kiçik və orta emal
müəssisələri işə salınır.
Rayonda iş adamlarına, azad sahibkarlığa yaradılan
şərait, onlara güzəştli kreditlərin
ayrılmasındakı şəffaflıq yeni-yeni sənaye,
yeyinti, ticarət müəssisələrinin, tikinti
kooperativlərinin yaranmasına rəvac verir.
Maddi durumu yaxşılaşan hər bir sakin,
fəaliyyətini genişləndirməklə gəlirini
artıran hər bir iş adamı təbii ki,
bütövlükdə rayonun ictimai həyatının,
aparılan quruculuq işlərinin - son nəticədə
sosial-iqtisadi inkişafın fəal iştirakçısı
olur. Təşkilatçılıq
fəaliyyətimizin prioritet istiqamətlərindən biri
də hər bir abşeronlunun dövlətə və
dövlətçiliyə sədaqət ruhunu, ölkəmizin
qüdrətinin artırılmasına şəxsi
töhfəsini vermək əzmini
möhkəmləndirməkdir.
Bəxtiyar SADIQOV:
- Ümummilli lider Heydər Əliyevin zəngin
dövlətçilik irsinin öyrənilməsi, onun
ölməz ideyalarının geniş təbliğ olunaraq
praktik həyatda tətbiqi və gələcək
nəsillərə çatdırılması müasir
qloballaşma dövründə xüsusilə aktuallıq
kəsb edir. Yarandığı
gündən bu ali missiyanı qarşıya məqsəd
qoyan, dahi öndərin mərhəmət, nəciblik və
yüksək humanizmə əsaslanan saf ideallarının ictimai
şüurda möhkəmlənməsinə
çalışan, millətin gələcəyi naminə bir
sıra strateji əhəmiyyətli layihələri inamla həyata
keçirən Heydər Əliyev Fondu son 6 illik
fəaliyyətilə Azərbaycan cəmiyyətində bir
çox insanların ümid yerinə çevrilmişdir. Fondun prezidenti, YUNESKO və İSESKO-nun
xoşməramlı səfiri, Milli Məclisin deputatı
Mehriban xanım Əliyevanın təşəbbüsü
ilə respublikanın bütün bölgələrində
həyata keçirilən mühüm təhsil və
səhiyyə layihələrini abşeronlular da yüksək
razılıqla qarşılayırlar. Fondun
xəttilə rayonda gerçəkləşdirilən
layihələr barədə danışmaq üçün
söz Abşeron Rayon Təhsil Şöbəsinin müdiri
Nadir Ağayevə verilir.
Nadir AĞAYEV:
- İftixar
hissi ilə deyə bilərik ki, Azərbaycan Prezidenti İlham
Əliyev böyük cəsarət və iradə
nümayiş etdirərək milli mənafelərin
qorunması uğrunda əzmlə çalışır.
Təqdirəlayiq haldır ki, Azərbaycanın birinci
xanımı Mehriban Əliyeva da Heydər Əliyev siyasi
irsinin fundamental prinsiplərinə sadiq qalaraq Azərbaycan
mədəniyyətinin mühafizəsi istiqamətində
səmərəli fəaliyyət göstərir.
Heydər Əliyev Fondunun prezidenti Mehriban xanım
Əliyevanın təşəbbüsü ilə reallaşan
"Yeniləşən Azərbaycana yeni məktəb"
proqramı çərçivəsində Abşeron rayonunda
üst-üstə 980 şagird yeri olan 3 orta ümumtəhsil
məktəbi tiklib istifadəyə verilmiş, həmin
təhsil ocaqları ən müasir tədris vasitələri,
avadanlıq və inventarla təchiz olunmuşdur. Həmin
məktəblər rayonda uzun müddət mövcud olmuş
şagird sıxlığının aradan
qaldırılmasında mühüm əhəmiyyət
kəsb edir.
Məhz Fondun vəsaiti hesabına Xırdalan
şəhərində və Novxanı kəndində hər
biri 240 şagird yerlik 2 məktəb, Digah və Görədil
yaşayış məntəqələrində 16 sinif
otağından ibarət olan iki yeni tədris korpusu 2006-2007-ci
tədris ilində tikilib istifadəyə verilmişdir. Fondun hesabına ilk dəfə məktəbə
qədəm qoyan minlərlə I sinif şagirdinə içi
məktəb ləvazımatı ilə dolu,
üstündə müstəqil dövlətimizin
rəmzləri təsvir olunmuş yaraşıqlı
çantalar hədiyyə edilmişdir. 2008-2009-cu dərs ili
ərəfəsində memarlıq baxımından bəlkə də analoqu olmayan 500 şagird yerlik
möhtəşəm 3 saylı Masazır kənd orta
məktəbi ərsəyə gəlmiş, təhsil
ocaqlarının arasında yaşıllıqla əhatə
olunmuş ərazisi, özünün müasir idman kompleksi,
stadionu, beynəlxalq standartlara cavab verən tədris
imkanları ilə diqqəti cəlb edir.
Bu
günlərdə hamımız Heydər Əliyev Fondunun
təşəbbüsü ilə başdan-başa
əsaslı qaydada təmir olunmaqla yenidən qurulmuş Saray
qəsəbəsindəki 7 saylı internat evinin
açılışının şahidi olduq.
Mərasimdə Heydər Əliyev Fondunun prezidenti Mehriban
xanım Əliyevanın iştirakı bir daha sübut etdi ki,
insana, Azərbaycanın hər bir vətəndaşına
qayğı onun əsas amallarından biridir. Azərbaycanın
birinci xanımı dekabrın 24-də Abşeron rayonunun
Masazır qəsəbəsində Heydər Əliyev Fondunun
təşəbbüsü ilə müasir tələblər
səviyyəsində inşa olunmuş 3 saylı orta
məktəbdə yaradılmış şəraitlə
tanış olmuş, "Şən yuva" uşaq
bağçasının açılışında
iştirak etmişdir.
Fondun xeyirxah təşəbbüsləri
əsasında Abşeron rayonunda da gənc nəslin
təlim-tərbiyəsi, istedadlı uşaqların erkən
aşkar edilməsi və onların xüsusi qayğı
ilə əhatə olunması, məcburi köçkün
həyatı yaşayan, valideyn himayəsindən məhrum olan
uşaqların normal təhsil alması üçün
ardıcıl iş aparılır. Rayonda 34
orta, 2 əsas ümumtəhsil məktəbində 27 min
nəfərədək şagirdin təlim-tərbiyəsi
ilə 2762 nəfər müəllim məşğuldur. 23
məktəbəqədər uşaq
müəssisəsində 1800 nəfərdən çox
körpə tərbiyə olunur.
Son 5 ildə uzun müddət istilik sistemləri
tamamilə sıradan çıxmış, binaları ciddi
aşınmaya məruz qalmış məktəblər
əsaslı qaydada təmir olunmuş, istilik sistemləri
bərpa edilmiş, inventarları təzələnmiş,
onların hamısında müasir kompüter sinifləri yaradılmışdır.
Fondun "Təhsilə dəstək" layihəsinə
uyğun olaraq rayonun məktəbəqədər uşaq
müəssisələri əsaslı təmir olunmuş, bir
qayda olaraq uşaq bağçalarının istilik
sistemləri bərpa edilmişdir. Beş
yaşayış məntəqəsində, o
cümlədən Qobu qəsəbəsində hər biri 4
qrupluq 2 uşaq bağçası, Fatmayı kəndi və
Aşağı Güzdək qəsəbəsinin
hərəsində 2 qrupluq 1 uşaq bağçası,
Novxanı kəndində dörd qrupluq yeni uşaq bağçası
tikilib istifadəyə verilmişdir.
Dövlətin təhsilə, təhsil
işçilərinə ildən-ilə artan
qayğısı müqabilində məktəblərdə
və məktəbəqədər təhsil ocaqlarında
təlim-tərbiyənin keyfiyyəti yüksəlir, elmi
biliklərin şagirdlər tərəfindən mənimsənilməsi
güclənir. Əgər beş il əvvəl rayonun
məzunlarının ali məktəblərə qəbul
üzrə keçirilən test imtahanlarında 15-20 faizi keçid
balı toplayırdısa, 2010-cu ildə bu göstərici 40
faizə yaxınlaşmışdır.
Heydər
Əliyev Fondunun fəaliyyətinin prioritet
sahələrindən biri də əhalinin, xüsusilə
gənc nəslin sağlamlığı ilə bağlı
məsələlərin diqqət mərkəzində
saxlanılmasıdır. Bu baxımdan rayonda həyata
keçirilən tədbirləri qənaətbəxş hesab
etmək olar. Sağlamlığın rəhni olan
gənclər arasında idmanın kütləviliyinə
diqqət son illər xüsusilə artmışdır. Hər yerdə sadə idman qurğuları
yaradılmış, məktəblərin idman zalları
lazımi idman avadanlıqları ilə təchiz edilmişdir.
İdmançı gənclərimiz son beş ildə
beynəlxalq və respublika yarışlarında 14 idman
növü üzrə 104 qızıl, 69 gümüş, 98
bürünc olmaqla 271 medal qazanmışlar.
Məktəblilərin
və gənclərin asudə vaxtlarının
səmərəli təşkili də daim diqqət mərkəzindədir.
Xırdalan şəhərində 3 il əvvəl
istifadəyə verilmiş "Gənclər evi"nin
ikimərtəbəli geniş binasında müxtəlif maraq
klubları, tətbiqi incəsənət dərnəkləri
fəaliyyət göstərir.
Abşeronluların
sağlamlığının keşiyində 348 yüksək
ixtisaslı həkim, 442 orta tibb işçisi dayanır.
Xırdalan şəhərində Mərkəzi rayon
xəstəxanası, poliklinika və ayrıca Uşaq
Poliklinikası ilə yanaşı, daha bir özəl tibb mərkəzi
əhaliyə səhiyyə xidməti göstərir. Saray və Qobu qəsəbələrindəki
sahə xəstəxanaları əsaslı qaydada yenidən qurulduqdan
sonra ən müasir tibbi avadanlıq və nəqliyyat
vasitələri ilə təmin olunmuş, müayinə
və müalicənin səviyyəsi yüksəlmişdir.
2007-2008-ci illərdə iri yaşayış
məntəqələri olan Mehdiabad,
Novxanı, Masazır, Hökməli qəsəbələrinin
hər birində 16 otaqdan ibarət ikimərtəbəli
həkim ambulatoriyaları, Aşağı Güzdək,
Ceyranbatan və Güzdək qəsəbələrində,
Qobustan kəndində tibb məntəqələri
üçün binalar tikilib istifadəyə verilmişdir.
Rayonda
aparılan genişmiqyaslı quruculuq mədəni-maarif
müəssisələrinin maddi-texniki bazasının
möhkəmləndirilməsini də əhatə edir. Xüsusilə şəhər Mədəniyyət
sarayının əsaslı qaydada təmir olunub yenidən
qurulması, ətrafının abadlaşdırılması
və yaşıllaşdırılması, istilik siteminin
bərpa edilməsi burada mədəni-kütləvi
tədbirlərin, vaxtaşırı konsert və
tamaşaların keçirilməsinə imkan yaratmışdır.
Yerlərdə də mövcud mədəniyyət evləri
təmir olunmuşdur. Qobu və Ceyranbatan
qəsəbələrində 200-220 tamaşaçı
zalları və müxtəlif təyinatlı əlavə
otaqları olan mədəniyyət evlərinin tikintisi davam edir.
Bəxtiyar SADIQOV:
- Abşeron
çoxəsrlik tarixi dövründə bir çox kənd
təsərrüfatı məhsullarının istehsalı
sahəsində böyük uğurlar əldə etmişdir.
Rayonun məşhur üzüm sortları, ənciri,
zəfəranı, zeytunu, badamı və digər
məhsulları respublika hüdudlarından kənarda da
məşhurdur. Son illər rayonda kənd
təsərrüfatının tənəzzüldən
çıxarılması və yüksək tepmlə
inkişaf etdirilməsi istiqamətində atılan addımlar
müsbət nəticələr verir. Abşeron Rayon İcra
Hakimiyyəti başçısı aparatının
aparıcı məsləhətçisi Qara Qurbanov bu
barədə ətraflı məlumat verəcəkdir.
Qara QURBANOV:
- Son
illərdə Abşeron rayonunun iqtisadiyyatında kənd
təsərrüfatı məhsullarının istehsalı
aparıcı mövqeyini bərpa edir. Hazırda 3131 hektar
torpaq çoxillik əkmələr altındadır. Əkin
və dincə qoyulmuş torpaq sahələri cəmi
təhkim edilmiş torpaqların 6,8 faizini, çoxillik
əkmələr altında olan torpaq sahələri isə 1,4
faizini təşkil edir. Rayona təhkim
edilmiş torpaqların 8,2 faizi, başqa sözlə 18621
hektarı əkinə yararlıdır. Əkinə yararlı
torpaqların qeyri-münbitliyi, suvarmaya tələbatın
yüksək olduğunu da nəzərə alsaq, burada
əkinçiliklə məşğul olmağın nə
dərəcədə çətin və çox
zəhmət tələb etdiyi məlum olar. Məhz bu
çətinliklər Abşeron kəndlisini
təsərrüfatın spesifik sahələri ilə
məşğul olmağa vadar edir.
Ötən əsrin 90-cı illərində,
ölkənin hər yerində olduğu kimi, Abşeronda da
kənd təsərrüfatı istehsalı
tənəzzülə uğramış, suvarma sistemi
bərbad vəziyyətə düşmüş, hətta bu
diyarın özünəməxsus nemətləri olan
zəfəran, zeytun, məşhur Hövsan
soğanı, dəmyə şəraitdə
yetişdirilən Zirə qarpızı, yüksək
şəkərliyi ilə seçilən Bilgəh
kökü və sair nadir bitkilərin
əkilib-becərilməsi unudulmağa doğru gedirdi. Bu vəziyyətin aradan qaldırılması
üçün ulu öndərin şəxsi
təşəbbüsü və rəhbərliyi ilə
normativ-hüquqi sənədlərin hazırlanmasına
başlandı. 1995-ci il fevral ayının 18-də "Aqrar
islahatın əsasları haqqında", 1996-cı il iyulun
16-da isə "Torpaq islahatı haqqında" mühüm
qanunlar qəbul edildi. Ümumiyyətlə,
1995-2004-cü illərdə aqrar sahənin inkişafı
ilə əlaqədar 100-dən çox normativ-hüquqi akt
qəbul olunmuşdur.
2003-cü
ildən sonra kənd təsərrüfatı
istehsalçılarına dövlət yardımı
məqsədi ilə qəbul edilmiş qərarlar Abşeron
rayonunda kənd təsərrüfatı sahəsində
canlanmaya səbəb olmuşdur. Rayonun aqrar islahat
aparılmış kənd təsərrüfatı
müəssisələri bazasında yeni mülkiyyət
formasına əsaslanan kollektiv, özəl və
dövlət kənd təsərrüfatı
müəssisələri yaranmışdır. Son on ildə
rayonda istehsal edilmiş kənd təsərrüfatı
məhsullarının ümumi həcmi 39.608 min manat
təşkil etmişdir və bu da 2000-ci ildəkindən 2,28
dəfə çoxdur. Həmin dövrdə ət
istehsalı 780 tondan 2.072 tona, süd istehsalı 24.322 tondan
32854 tona, yumurta istehsalı 31.714 min ədəddən 150.043
min ədədə çatmışdır.
Başlıca diqqət Abşeron rayonu
üçün kənd təsərrüfatının
ənənəvi sahələrdən hesab olunan
bağçılıq və tərəvəzçiliyin, bu
diyarın nadir nemətlərinin istehsalının
bərpasına yönəldilmişdir. Azərbaycan
Prezidenti İlham Əliyevin 11 fevral 2004-cü il tarixli
fərmanı ilə təsdiq edilmiş "Azərbaycan
Respublikası regionlarının sosial-iqtisadi inkişafı
(2004-2008-ci illər) Dövlət Proqramı", 25 avqust
2008-ci il tarixli sərəncamı ilə təsdiq edilmiş
"2008-2015-ci illərdə Azərbaycan Respublikasında
əhalinin ərzaq məhsulları ilə etibarlı
təminatına dair Dövlət
Proqramı", 14 aprel 2009-cu il tarixli fərmanı ilə
təsdiq edilmiş "Azərbaycan Respublikası
regionlarının 2009-1013-cü illərdə sosial-iqtisadi
inkişafı Dövlət Proqramı"nda zeytunçuluğun
inkişafı ilə əlaqədar xüsusi tədbirlər
nəzərdə tutulmuşdur. Bu tədbirlərin
nəticəsidir ki, zeytun bağlarından məhsul
istehsalı ilbəil artır. 1999-cu ildə rayonda cəmi 489
ton zeytun məhsulu toplanmışdısa, bu rəqəm
2009-cu ildə 1200 tona çatdırılmışdır.
Abşeron
rayonu üçün ənənəvi sayılan, bu
diyarın nadir neməti olan zəfəranın əkin
sahəsi də ildən-ilə azalmış, 1980-ci ildəki
159 hektardan 1998-ci ildə 18 hektara enmişdi. Aqrar
sahənin inkişafı ilə əlaqədar respublikada
qəbul edilmiş qanunların, təsdiq edilmiş
dövlət proqramlarının icrası sayəsində
görülmüş tədbirlər nəticəsində
zəfəran bitkisinin məhv olmasının
qarşısı alınmış, bu sahə ilə
məşğul olan "Zəfəran" kəndli-fermer təsərrüfatının
gücü və imkanları hesabına onun əkin sahəsi
artırılaraq hazırda 23 hektara
çatdırılmışdır.
Heyvandarlıq
sahəsində nail olunmuş irəliləyiş, ilk
növbədə, mal-qaranın cins tərkibinin
yaxşılaşdırılmasının nəticəsidir.
Hələ 2001-ci ilin əvvəlində Niderland
hökumətinin dəstəyi ilə rayonumuzun
ərazisində mal-qara arasında süni mayalama
şəbəkəsi təşkil edilmişdir.
Müddəti bir il olan layihənin tətbiqindən
keçən dövr ərzində süni yolla
mayalanmış inəklərdən 13549 baş buzov
alınmışdır. "Heyfer" beynəlxalq
layihəsinin reallaşması 2002-2005-ci illərdə
Pirəkəşkül kəndində davarların
sayının xeyli artmasını təmin etmişdir.
İqtisadi
İnkişaf Nazirliyinin dəstəyi ilə xüsusi
layihə əsasında rayonun ərazisində
uzunmüddətli icarəyə götürülmüş
torpaq sahəsində daha bir sahibkar tərəfindən 80
hektar zeytun bağı salınmışdır. Rayonda kənd
təsərrüfatı məhsulları istehsalı ilə
məşğul olan sahibkarlar dövlət
tərəfindən göstərilən güzəşt
və yardımlardan səmərəli
bəhrələnirlər. Azərbaycan
Prezidentinin "Kənd təsərrüfatı
məhsulları istehsalçılarına dövlət
dəstəyi haqqında" 2007-ci il 23 yanvar tarixli
sərəncamına əsasən, abşeronlu kənd
təsərrüfatı məhsulları
istehsalçılarına dövlət büdcəsinin
vəsaiti hesabına 269 min 334 manatlıq yardım
edilmişdir.
Bəxtiyar SADIQOV:
- Uzun
illər taleyi Abşeronla bağlı olmuş, burada
işləmiş şəxs kimi deyə bilərəm ki, son
dövrlərdə rayonun siması əsaslı
dərəcədə dəyişmiş, yaxşı
mənada tanınmaz olmuşdur. Rayonun küçə və
parkları abadlaşmış, yolları yüksək
səviyyədə təmir olunmuş, bir sözlə
insanların firavan yaşayışı üçün
kompleks tədbirlər həyata keçirilmişdir. Bu
barədə məlumat vermək üçün söz Xırdalan
Şəhər Bələdiyyəsinin sədri Eldar
Əhmədova verilir.
Eldar ƏHMƏDOV:
- İftixar hissi ilə deyə bilərik ki,
dövlət başçısı cənab İlham
Əliyevin rayon rəhbərliyi qarşısında
müəyyənləşdirdiyi vəzifələrin
icrasında yerli idarəetmə orqanları da fəallıq göstərirlər.
Şəhər bələdiyyəsi üzərinə
düşən vəzifələrin inamla yerinə
yetirilməsi istiqamətində mövcud imkanlardan
yetərincə yararlanmağa çalışır. Bu gün tam arxayınlıqla deyə bilərik ki,
bələdiyyə əhalinin sosial sifarişlərinin
icrası ilə məşğul olan əsas qurumlardan
birinə çevrilmişdir. Əhalinin sosial problemlərinin
həlli, yaşayış səviyyəsinin
yüksəldilməsi üçün son illərdə
genişmiqyaslı tikinti-abadlıq işləri
aparılmış, mədəni-kütləvi
istirahət guşələri yaradılmışdır.
Xırdalanın mərkəzi kücələrindən birində
bələdiyyə büdcəsi hesabına
ikimərtəbəli "Gənclər evi" inşa
olunmuş, gənclərin asudə vaxtlarının
səmərəli təşkili təmin edilmişdir.
Şəhərin mərkəzində ümummilli
liderin adını daşıyan möhtəşəm park
salınmış, burada yaşlıların, gənclərin
və uşaqların mənalı istirahəti
üçün hər cür şərait
yaradılmış, uzunluğu 5,4 kilometr olan Heydər
Əliyev prospekti əsaslı təmir olunmuşdur.
Prospektin asfalt örtüyü dəyişdirilmiş, yol
boyunca səliqə-sahman işləri aparılmış,
ictimai-yaşayış binalarının fasadları qaydaya salınmışdır.
Bələdiyyə
imkansız ailələrin vəziyyətinin
yaxşılaşdırılmasına da öz köməyini
əsirgəmir. Son illərdə
şəkər xəstələrinin pulsuz dərmanla
təmin olunmasına, zirzəmilərdə dezinfeksiya
işlərinin aparılmasına da vəsait
ayırmışdır. Şəhərdən
məişət tullantılarının daşınması
üçün bir ədəd traktor və yük
maşını alınaraq müvafiq idarələrə
verilmişdir.
Şəhərdaxili küçələrin asfalt
örtüyünün təzələnməsi,
məhəllələrdə abadlıq işlərinin
aparılması da diqqət mərkəzindədir.
Ötən beş ildə bu məqsədlə 200 min kvadratmetrdən
çox asfalt örtüyü çəkilmiş, bir
çox küçələrdə divarlar qaya daşları
ilə bəzədilmiş, minlərlə ağac,
bəzək kolları, güllər əkilmişdir. Xırdalan şəhərinin bir çox
küçələrinin, "Ana" abidə kompleksinin,
"Ana və uşaq" parkının yenidən
qurulması, Abşeron Rayon İcra Hakimiyyətinin 3
mərtəbəli yeni inzibati binasının inşası, 20
metrlik qüllədən asılmış dövlət
bayrağımız, rayonun müxtəlif yerlərində
quraşdırılmış musiqili fəvvarələr,
küçələr boyu quraşdırılmış yeni
elektrik fanarları şəhərin abadlığını
təmin etmiş, gözəlliyini birə-beş
artırmışdır.
Xırdalan
şəhəri Bakı-Şamaxı və Bakı-Quba
magistral yolunun arasında yerləşir. Belə
mühüm coğrafi ərazidə yerləşməsi
istər-istəməz yerli idarəetmə
təşkilatlarının məsuliyyətlərini xeyli
artırır. Şimal istiqamətindən respublika
paytaxtına təşrif buyuran xarici qonaqlar Bakını
görmədən öncə Xırdalanı görurlər.
Buna görə də magistral yolun Xırdalan ərazisindən
keçən hissəsində xüsusi abadlıq və
yaşıllaşdırma işlərinin aparılması
vacibdir. Sevindirici haldır ki, son zamanlarda
adıçəkilən ərazidə xeyli iş
görülmüş, əvvəlki xoşagəlməz
görüntülərdən əsər-əlamət
qalmamışdır. İndi Bakı-Şamaxı və
Bakı-Quba yolunda hərəkət edən nəqliyyat
vasitələri yolda hər hansı maneə ilə
rastlaşmır, insanlar şəhərimizin uzaqdan
diqqəti cəlb edən gözəl mənzərəsini
həvəslə seyr edirlər.
Bəxtiyar SADIQOV:
-
Bələdiyyələr demokratiyanın, iqtisadi və siyasi
müstəqilliyin, təşəbbüskarlığın
bərqərar edilməsi baxımından çətin, eyni
zamanda, məsuliyyətli idarəetmə formasıdır. Bu təsisat müəyyən ərazidə
məskunlaşmış əhalinin hüquq və
azadlıqlarının qorunmasını, habelə yerli
problemlərinin həllini təmin edən müstəqil,
kollegial idarəetmə forması olmaqla, Azərbaycan
təcrübəsində də özünü
doğrultmağa çalışır. Abşeronun
kənd və qəsəbələrində
bələdiyyələrin xətti ilə həyata
keçirilən tədbirlər bu barədə
əminliklə danışmağa imkan verir. "Dəyirmi
masa"da iştirak edən Masazır bələdiyyəsinin
sədri Siyənfər Əliyev yəqin ki, bizə son
illər kəndin inkişafı üçün
görülən sosialyönümlü tədbirlər
barədə ətraflı məlumat verəcəkdir.
Siyənfər ƏLİYEV:
- Dövlət başçısı cənab
İlham Əliyevin Abşeronda aparılan quruculuq və
abadlığı, sosial-iqtisadi inkişafı yüksək
qiymətləndirməsi, dəyərli
məsləhətləri, tövsiyələri
abşeronluların qüvvə və səylərinin maksimum
səfərbər olunmasında güclü stimula
çevrilmişdir. Bunu getdikcə müasir
şəhər görkəmi alan Masazır kəndinin
nümunəsində daha aydın görmək olar. Son beş ildə əhalinin elektrik enerjisi ilə
təminatını yaxşılaşdırmaq
məqsədilə 15 ədəd elektrik transformatoru
quraşdırılmış, 6800 metr elektrik xətti,
kənddaxili şəbəkədə 35000 metr
"SİB" kabel xətti çəkilmiş, 2200
ədəd elektrik sayğacı
quraşdırılmış, 270 ədəd elektrik
dayaqları dəyişdirilmişdir. Kəndin su
təchizatını yaxşılaşdırmaq
məqsədilə beş il ərzində 8260 metr
uzunluğunda müxtəlif diametrli plastik və polad borularla
su xətləri çəkilmişdir.
Kəndin
kanalizasiya sisteminin yaradılması da qarşıda duran
əsas problemlərdən biridir. İndiyə kimi 10430 metr kanalizasiya
xətti çəkilmiş, eləcə də kəndin
abadlaşdırılması məqsədilə küçə
və yollara son beş ildə 149000
kvadratmetr asfalt salınmış, uzunluğu 39600 km olan
mərkəzi Əliağa Vahid küçəsinin
mənzərəsi tamamilə dəyişmişdir. Həmin
küçədə yaşayış və inzibati
binaların fasadlarının 350 kvadratmetrinə alkopon
üzlük çəkilmiş, 55 fərdi yaşayış
evinin darvazası rənglənmiş, 800 kvadratmetr hasar
çəkilmiş, 9970 kvadratmetr hasara çay
daşından istifadə etməklə mozaik üzlük
çəkilmişdir. 620 kvadratmetr hasar və bina
divarlarına milli memarlıq üslubunda cilalanmış
əhəng daşından üzlük çəkilmiş,
küçənin nəqliyyat hərəkəti hissəsi
daha 3 metr genişləndirilmiş, sağ tərəfinə
ümumi sahəsi 7000 kvadratmetr məsafədə səki
salınmışdır.
Kəndin
"Qurtuluş-93" adlanan yaşayış massivindən
yeni inşa olunmuş Masazır duz zavodu istiqamətində
uzunluğu 5 km, eni isə 10 metr olan yeni asfalt yol
çəkilmiş, habelə müasir tipli, beynəlxalq
standartlara cavab verən bir çox sosial-mədəni
obyektlər tikilib istifadəyə verilmişdir. Bələdiyyə
büdcəsi hesabına kənddə 2 mərtəbəli, 16
kabinetdən ibarət müasir tipli poliklinika tikilmişdir ki,
hazırda burada 55 nəfər tibb işçisi kənd
sakinlərinə xidmət göstərir.
2005-ci
ilədək kənddə 800-dək fərdi
yaşayış evi var idisə, hazırda onların sayı
5500-ü ötmüşdür. Ərazidən
məişət tullantılarının vaxtında
daşınıb zərərsizləşdirilməsi
məqsədi ilə bələdiyyə tərəfindən
bir ədəd "MAN" markalı xüsusi
zibildaşıyan avtomobil alınmışdır.
Respublikamızda 2010-cu ilin
"Ekologiya ili" elan olunması Masazır sakinləri
tərəfindən də razılıqla
qarşılanmış, ümumilikdə, son beş
ildə kənddə 100000-dən çox ağac tingi,
minlərlə dekorativ kol əkilmişdir. Həmin
yaşıllıqlara qulluq üçün xüsusi su
daşıyan avtomobil də alınmışdır. Ölkədə yerli özünüidarəetmə
qurumu yeni yarandığından biz qardaş Türkiyə
Respublikası və digər ölkələrin
bələdiyyə orqanları ilə də əlaqə
saxlayır, onların təcrübəsini öyrənir,
işimizdə tətbiq edirik.
Zakir FƏRƏCOV:
- Bugünkü
"dəyirmi masa"da konkret Abşeron rayonunun timsalında
bir daha aydın göründü ki, hər bir
vətəndaşa yüksək diqqət və qayğı
ölkə rəhbərliyinin sosial-iqtisadi siyasətinin
əsas qayəsini təşkil edir. Hesab
edirəm ki, Abşeron rayonunun da son illərdə əldə
etdiyi yüksək inkişaf göstəriciləri, ilk
növbədə, möhtərəm Prezident İlham
Əliyevin göstərdiyi yüksək diqqət və
qayğının nəticəsidir.
Bu diqqətin
nəticəsi kimi rayonun yol infrastrukturu əsaslı
dərəcədə yaxşılaşmış, habelə
işıq, qaz problemlərinin həlli istiqamətində
mühüm tədbirlər həyata keçirilmişdir. Xüsusən
də 2010-cu ildə Abşeronun kənd və
qəsəbələrində misli görünməmiş
qazlaşdırma işi aparılmışdır. Hazırda elə yeni yaşayış massivi yoxdur
ki, orada mavi qaz alovlanmasın. Güman
edirik ki, yaxın perspektivdə rayonda qaz problemi tamamilə
aradan qaldırılacaqdır.
Açıq
etiraf etməliyik ki, hazırda Abşeron üçün
ən ciddi problem su və kanalizasiya ilə bağlıdır. Təəssüflə
vurğulayıram ki, Xırdalan şəhərinin
sakinləri bu gün texniki
Abşeron
rayonunda hələ də müasir olimpiya-idman kompleksinin
olmaması bizim əsas
çatışmazlıqlarımızdan biridir. Biz bu problemi
də çoxdan həll etməliydik. Bununla
bağlı cənab Prezidentə müraciət etmişik.
Artıq tapşırıq verilib və 2011-ci
ildə Abşeronda olimpiya-idman kompleksinin tikintisinə
başlanılacaqdır.
Bəxtiyar SADIQOV:
- Bu gün biz Abşeron
iqtisadi rayonunda qeyri-neft sektorunun inkişafı, infrastrukturun
müasirləşdirilməsi istiqamətində həyata
keçirilən genişmiqyaslı layihələrlə
yaxından tanışlıq imkanı qazandıq. Azərbaycan Prezidenti İlham Əliyev ölkənin
gələcəyini sırf neft-qaz gəlirləri ilə
bağlamır, qeyri-neft sektorunun inkişafına, insan
kapitalının formalaşdırılmasına
yönəlmiş siyasət həyata keçirir. Yəni neft gəlirləri məqsəd yox,
iqtisadiyyatı inkişaf etdirmək üçün
vasitədir. Dövlət
başçısı da Azərbaycanı məhz neftdən
sonrakı dövrə hazırlayır. Görülən
tədbirlər sayəsində neçə onillikdən sonra
respublikamızda qeyri-neft sektoru neft-qaz sektorunu
üstələcəyəkdir. Bugünkü
söhbət zamanı biz konkret bir rayonun timsalında bir daha
bu məqsədin reallaşacağına əmin olduq.
Abşeronda,
onun kənd və qəsəbələrində, Xırdalan
şəhərində müşahidə olunan inkişaf
və yüksəliş doğrudan da sevindiricidir. "Dəyirmi
masa"da səsləndirilən, obrazlı desək,
"danışan faktlar" rayonun əldə etdiyi
nəticələr barədə kifayət qədər
obyektiv, dolğun təsəvvür yaradır. İnanıram ki, ölkə rəhbərliyinin
yüksək diqqət və qayğısı
nəticəsində Azərbaycanın hər bir guşəsi
kimi Abşeron rayonu bundan sonra da sürətlə inkişaf
edəcək, qarşıya qoyduğu bütün
məqsədləri inamla
gerçəkləşdirəcəkdir.
Azərbaycan.- 2010.- 28 dekabr.- S. 4, 5.