Dənizçilik terminlərinin izahlı lüğəti

"Rusca-ingiliscə-azərbaycanca dənizçilik terminlərinin izahlı lüğəti" bu sahədə terminləri vahid formada işlətmək, ümumi anlaşıqlı dil vahidlərinin tətbiqi məqsədilə hazırlanmış ilk kitabdır. Lüğətə beynəlxalq ticarət gəmiçiliyi, dəniz nəqliyyatı ilə bağlı 600-dək termin daxil edilmişdir.

"Apostrof" çap evi tərəfindən nəşr olunmuş İlham Məmmədovun müəllifi olduğu bu kitab dənizçilik nəqliyyatının kommersiya baxımından istismarı ilə bağlı meydana çıxan hüquqi, texniki, eləcə də maliyyə terminlərinin daxil edildiyi ilk lüğətdir. Bu kitabdan dənizçilər, dənizçilik sahəsində çalışan mütəxəssislər, elmi işçilər, tərcüməçilər və müvafiq təhsil müəssisələrinin müdavimləri istifadə edə bilərlər.

Ön sözün müəllifi filologiya elmləri doktoru, professor, AMEA Terminologiya Komissiyasının sədr müavini Sayalı Sadıqova kitabla bağlı fikirlərini bildirərkən qeyd etmişdir ki, lüğət dəniz gəmiçiliyində çalışan mütəxəssislər, tələbələr və bu sahə ilə maraqlanan oxucu kütləsi üçün nəzərdə tutulmuşdur. Professor onu da bildirmişdir ki, lüğət dənizçiliklə bağlı dilimizin təkmilləşməsində böyük rol oynayan ilk kitabdır.

İnanırıq ki, İlham Məmmədovun dənizçilik sahəsində olduqca dəyərli və gərəkli olan bu kitabı öz oxucu auditoriyası tərəfindən layiqli qiymətini alacaqdır.

Azərbaycan.- 2010.- 28 dekabr.- S. 7.