Tanınmış alim Cəmil Quliyev son mənzilə yola salınmışdır
Dekabrın 28-də Azərbaycan
Milli Elmlər Akademiyasının (AMEA) həqiqi
üzvü, Dövlət
mükafatı laureatı,
əməkdar elm xadimi, tarix elmləri
doktoru, professor Cəmil Quliyevlə vida mərasimi keçirilmişdir.
Vida mərasimində Milli Məclisin deputatları, tanınmış
elm adamları və ictimaiyyətin nümayəndələri iştirak
etmişlər.
Mərhumun cənazəsi AMEA-nın "Azərbaycan
Milli Ensiklopediyası"
Elmi Mərkəzinin binasının matəmsayağı
bəzədilmiş böyük
akt zalında qoyulmuşdu. Alimin tabutu önünə Azərbaycan Respublikasının
Prezidenti adından əklil qoyulmuşdur. Cənazənin ətrafına
hökumət təşkilatları
və müxtəlif kollektivlər adından da əklillər düzülmüşdü.
Cəmil Quliyevin həmkarları, dostları,
tanışları, tanınmış
elm xadimləri bura gələrək, görkəmli alimə və gözəl insana son borclarını
verirdilər.
Mərasimdə AMEA-nın prezidenti
akademik Mahmud Kərimov, AMEA Tarix İnstitutunun direktoru, Milli Məclisin deputatı Yaqub Mahmudov, Milli Məclisin deputatı Bəxtiyar Əliyev, "Azərbaycan Milli Ensiklopediyası" Elmi Mərkəzinin direktoru akademik Tofiq Nağıyev və akademik Vaqif Fərzəliyev çıxış
edərək C.Quliyevin
zəngin elmi yaradıcılığından danışmış
və mərhumun ailəsinə dərin hüznlə başsağlığı
vermişlər.
Cəmil Quliyevin ölkəmizdə
tarix elminin inkişafına töhfələr
verən alim kimi tanındığını
söyləyən natiqlər
vurğulamışlar ki,
o, Azərbaycanın müasir tarixi baxımından əhəmiyyət
kəsb edən dövrlərin bir çox problemlərinin tədqiqi ilə bağlı kitab və monoqrafiyaların,
400-ə yaxın məqalənin
müəllifi olmuşdur.
Onun rəhbərliyi və yaxından iştirakı ilə on cilddən ibarət "Azərbaycan
Sovet Ensiklopediyası",
ikicildlik "Uşaq Ensiklopediyası", "Naxçıvan
Ensiklopediyası" və
yeddicildlik "Azərbaycan
tarixi" işıq
üzü görmüşdür.
Bacarıqlı elm təşkilatçısı
kimi Cəmil Quliyevin ölkəmizdə
ictimai elmlər sahəsində araşdırmaların
daha geniş miqyas alması, onların dövrün tələblərinə uyğun
aparılması və
Azərbaycan tarixinin yeni mənbələr əsasında öyrənilməsində
xidmətləri təqdirəlayiqdir.
Diqqətə çatdırılmışdır
ki, Cəmil Quliyev bir tarixçi
kimi Azərbaycanın
haqq işinin dünyaya çatdırılmasında
öz bilik və bacarığını
əsirgəməmiş, daim
işğal olunmuş
torpaqlarımızın azad
edilməsi arzusu ilə yaşamışdır.
Xüsusi olaraq qeyd edilmişdir ki, tarixçi alim Cəmil Quliyevin yarım əsrdən artıq dövrü əhatə edən elmi fəaliyyəti yüksək
qiymətləndirilmişdir. O, Azərbaycan elminin inkişafındakı xidmətlərinə
görə müstəqil
Azərbaycan Respublikasının
ali mükafatları -
"Şöhrət" və
"İstiqlal" ordenləri
ilə təltif edilmişdir. Bütün bunlar bir daha
ölkəmizdə elm,
təhsil adamlarına
verilən yüksək
qiymətin bariz nümunəsindən xəbər
verir.
Vida mərasimində çıxış edən
alimin oğlu Rüstəm Quliyev göstərdiyi diqqət və ehtirama görə dövlətimizin
başçısı İlham
Əliyevə akademikin
ailə üzvləri
adından minnətdarlığını
bildirmişdir.
Sonra böyük alim, nurlu ziyalı
Cəmil Quliyev doğmaları və yaxınlarının çiyinlərində
son mənzilə yola salınmışdır.
Mərhum 2-ci Fəxri xiyabanda torpağa tapşırılmışdır.
AzərTAc
Azərbaycan.- 2010.- 29 dekabr.- S. 5.