Azərbaycan deputatı indiyədək Dağlıq Qarabağla əlaqədar qəbul edilmiş sənədlərlə bağlı məsələ qaldırmışdır

Xəbər verildiyi kimi, Vyanada ATƏT-in Parlament Assambleyasının (PA) qış sessiyası keçirilir.

PA-nın siyasi komitəsinin iclasında 2010-cu ildə Norveçdə keçirilməsi planlaşdırılan Parlament Assambleyasının illik yığıncağının gündəliyi müzakirə edilən zaman Azərbaycan nümayəndə heyətinin üzvü, Milli Məclisin deputatı Azay Quliyev Ermənistan-Azərbaycan, Dağlıq Qarabağ münaqişəsinin həll edilməməsi ilə bağlı çıxış etmişdir.

A.Quliyev çıxışında Dağlıq Qarabağ münaqişəsi ilə bağlı danışıqların 15 ildən artıq davam etməsinə baxmayaraq, Ermənistanın qeyri-konstruktiv mövqeyi sayəsində indiyədək münaqişənin həll variantının tapılmadığını diqqətə çatdırmışdır.

Bildirilmişdir ki, Azərbaycan ərazisinin 20 faizini işğal altında saxlayan Ermənistanın təcavüzkar siyasəti nəticəsində 1 milyondan artıq azərbaycanlı qaçqın və məcburi köçkün şəraitində yaşamaqda davam etməkdədir. Beynəlxalq təşkilatlar, o cümlədən ATƏT münaqişənin sülh yolu ilə nizamlanmasını dəstəklədiyini bəyan edir, Azərbaycan da münaqişənin sülh yolu ilə nizamlanmasına səy göstərir. Lakin 17 ildən artıqdır ki, Ermənistan BMT Təhlükəsizlik Şurası tərəfindən qəbul edilmiş məlum 4 qətnamənin, Avropa Şurası və ATƏT-in müvafiq sənədlərinin tələblərinə əməl etmir, işğal altında saxladığı Azərbaycan ərazilərini boşaltmır. Ona görə də artıq Osloda keçiriləcək PA-nın illik yığıncağında BMT-nin Təhlükəsizlik Şurasının və ATƏT-in qəbul etdikləri sənədlərlə bağlı konkret mexanizmlər işlənib hazırlanmalıdır və iclasda qəbul edilməlidir. Azərbaycan daha 15 il nəticəsiz danışıqları gözləyə bilməz və ATƏT PA bu istiqamətdə konkret mövqeyini ortaya qoymalıdır.

Ermənistan nümayəndə heyətinin rəhbəri Aram Safaryan isə cavab nitqində mövzudan yayınaraq diqqəti Azərbaycanda demokratiyanın vəziyyətinə və may ayında Dağlıq Qarabağda keçiriləcək "seçki"lərə cəlb etməyə çalışmışdır.

Yenidən söz alan Azərbaycan nümayəndə heyətinin üzvü Azay Quliyev bildirmişdir ki, həqiqətən də Ermənistan nümayəndəsinin faktla bağlı deməyə sözü olmadığından, diqqəti işğal faktından yayındırmağa və auditoriyanı çaşdırmağa çalışır. Əgər demokratiyadan danışmaq gərəkdirsə, ilk növbədə, Ermənistandakı demokratik vəziyyət və öz mülki vətəndaşlarını öldürməkdən belə çəkinməyən Ermənistan hakimiyyətinin əməllərindən danışmaq olar və biz bu mövzuda müzakirələrə hazırıq. Hazırda isə biz demokratiyadan deyil, konkret Ermənistanın işğalçı siyasətindən və beynəlxalq hüquq normalarını kobudcasına pozmasından danışırıq. Tanınmamış Dağlıq Qarabağda keçirilən seçkilərə gəldikdə isə hamıya məlumdur ki, bu bir məsxərədir və bu cür addımlar bütün dünyada gülüş doğurur. Bu kimi təxribat xarakterli oyunlar, təbii ki, dünya tərəfindən tanınmayıb və bundan sonra da tanınmayacaqdır.

Elgün NİFTƏLİYEV,

AzərTAc-ın xüsusi müxbiri

Vyana

Azərbaycan.- 2010.-20 fevral.- S. 4.