İçərişəhərdə bərpa üzrə növbəti seminar keçirilmişdir

İyunun 30-da Azərbaycan Respublikasının Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsinin təşkilatçılığı ilə Almaniyanın "Remmers" və Avstriyanın "Atelier Erich Pummer GmbH" şirkətlərinin təmsilçiləri tərəfindən "İnşaat qurğularının təhlili" mövzusunda seminar keçirilmişdir.

Seminarda dünya əhəmiyyətli abidə - Məhəmməd məscidinin təmiri işlərini həyata keçirən avstriyalı mütəxəssis E.Pummer, Almaniyadan dəvət edilmiş mütəxəssislər G.Hilbert və D.Şiller iştirakçılara əhəng daşının timsalında təbii daşın konservasiya və bərpasının nəzəri və təcrübi məsələləri barədə təlim keçmişlər.

"Bərpanın nəzəri və təcrübi əsasları" mövzusunda artıq ikinci dəfədir ki, keçirilən seminardan məqsəd yerli mütəxəssislərin bərpa və konservasiya işləri sahəsində bilik və bacarıqlarının artırılmasıdır.

Tədbirdə yerli mütəxəssislər, o cümlədən Azərbaycan Memarlıq və İnşaat Universitetinin bir qrup tələbəsi iştirak etmişdir.

Məhəmməd məscidinin bərpası müddətində daha iki seminarın keçirilməsi nəzərdə tutulmuşdur.

AzərTAc

Azərbaycan.- 2010.- 1 iyul.- S. 7.