Bakıda 11-ci Azərbaycan-Almaniya biznes forumu keçirilmişdir

İyulun 19-da "Park İNN-Azərbaycan" mehmanxanasında İqtisadi İnkişaf Nazirliyinin (İİN) dəstəyi, Azərbaycanda İxracın və İnvestisiyaların Təşviqi Fondunun (AZPROMO) və Alman-Azərbaycan İqtisadi Birliyinin (DAWF) təşkilatçılığı ilə 11-ci Azərbaycan-Almaniya biznes forumu keçirilmişdir.

Tədbirdə Azərbaycan və Almaniya tərəfdən hökumət rəsmiləri ilə yanaşı, kənd təsərrüfatı, qida sənayesi, alternativ enerji, maliyyə, neft-qaz, maşınqayırma, tikinti və digər sahələrdə fəaliyyət göstərən 50-yə yaxın iş adamı iştirak etmişdir.

Biznes forumun açılış mərasimində çıxış edən iqtisadi inkişaf nazirinin müavini Niyazi Səfərov, kənd təsərrüfatı nazirinin müavini Bəhram Əliyev, Almaniya Federativ Respublikası Federal İqtisadiyyat və Texnologiya Nazirliyinin şöbə rəhbəri Andreas Neuman, Almaniyanın Azərbaycandakı səfirinin daimi nümayəndəsi Peter Siqler, İİN-in Sahibkarlığın inkişafı siyasəti şöbəsinin müdiri Zaur Qasımov ölkələrimiz arasında mövcud iqtisadi əlaqələr və əməkdaşlığın daha da inkişaf etdirilməsi imkanları, iş adamları arasında əməkdaşlığın genişləndirilməsinin əhəmiyyəti barədə danışmış, əlaqələrin inkişafında biznes forumların, işgüzar görüşlərin vacibliyini vurğulamışlar.

Tədbirdə AZPROMO-nun prezidenti Adil Məmmədov ölkəmizin investisiya mühiti və ixrac imkanları, Azərbaycan İnvestisiya Şirkətinin icraçı direktorunun müavini Zaur Məmmədov qurumun fəaliyyəti və həyata keçirdiyi layihələr, DAWF İdarə Heyəti sədrinin müavini Aleksander Androviç isə təşkilatın Azərbaycanda fəaliyyəti barədə təqdimatlarla çıxış etmişlər.

Biznes forumu çərçivəsində tədbirdə iştirak edən Almaniya şirkətləri barədə ətraflı məlumatlar verilmiş, həmçinin iş adamları arasında ikitərəfli görüşlər keçirilmişdir.

AzərTAc

Azərbaycan.- 2010.- 20 iyul.- S. 7.