Mədəniyyət evinin uğurları

 

M.Ə.Sabir adına Bülbülə qəsəbə mədəniyyət evinin yaranmasının qəribə tarixçəsi var. Azərbaycanda sovet hakimiyyəti qurulduqdan sonra, 1922-ci ildə Bakının Bülbülə qəsəbəsində yerli bəylərdən olan Mahmud bəyin şəxsi mülkü müsadirə olunaraq klub kimi istifadə edilmək üçün gənc teatr həvəskarlarının ixtiyarına verilib. 1931-ci ildə mədəniyyət evinin ərazisi genişləndirilib, burada tamaşa zalı, əlavə otaqlar tikilib. Bu mədəniyyət ocağına əvvəlcə Əliheydər Qarayevin, 1937-ci ildən sonra M.Ə.Sabirin adı verilib. Burada vaxtilə tanınmış teatr xadimlərindən S.Ruhullanın, A.Qurbanovun, Ə.Ələkbərovun, R.Əfqanlının, S.Tağızadənin, Ə.Şirvanskinin, B.Şəkinskayanın, S.Hacıyevanın və M.Davudovanın iştirakı ilə səhnə əsərləri hazırlanaraq tamaşaya qoyulub.

 

Ötən əsrdə M.Ə.Sabir adına mədəniyyət evində qəsəbə sakinləri ilə xalqımızın tanınmış ədəbiyyat xadimləri S.Vurğun, S.Rüstəm, M.Rahim, X.R.Ulutürk, B.Vahabzadə və digərləri ilə keçirilən görüşlər bu gün də xatirələrdə yaşayır.

Mədəniyyət evinə 1994-cü ildən Cavad Səlimov rəhbərlik edir. O, 1979-1990-cı illərdə C.Cabbarlı adına "Azərbaycanfilm" kinostudiyasında dekorator, inzibatçı vəzifələrində çalışıb. "Babək", "Qızıl uçurum", "Yol əhvalatı", "Uzun ömrün akkordları", "Atları yəhərləyin" və s. bədii filmlərdə dekorator, "Qətl günü", "Şahid qız"da isə rejissor assistenti vəzifələrində çalışıb.

Söhbət əsnasında Cavad Səlimov bildirdi ki, Bakı Şəhər Mədəniyyət və Turizm İdarəsinin tabeliyində olan mədəniyyət evi 5 ştat vahidindən ibarətdir. Suraxanı RİH-in yerli büdcəsi hesabına maliyyələşir. Ötən illərdə yaradılan bəzi dərnəklər indi klub kimi fəaliyyət göstərir. Bunlar "Rakurs" kinoklubu, "Gəlin düşünək" gənclər klubu, "Bacarıqlı əllər", "Günəş" Kukla Teatrı, "Şənlik" instrumental ansamblıdır.

"Rakurs" kinoklubu 5 il əvvəl yaranıb. Klubun üzvləri mədəniyyət evinin tamaşa zalında unudulmaqda olan bədii filmlərimizi nümayiş etdirirlər. Mədəniyyət evinin filmoteka fondunda 34 Azərbaycan filminin disk ya videogörüntüləri saxlanılır. İl ərzində keçirilən bədii filmlərin nümayişində gənclər həvəslə iştirak edirlər. "Rakurs"un üzvləri kinofilmlərlə bağlı müxtəlif müzakirələr keçirir. Klub üzvləri həvəskar filmləri yaradırlar. Təəssüf ki, "Rakurs" kinoklubu üzvlərinin ərsəyə gətirdiyi həmin çəkilişlər, xüsusi avadanlıq vasitəsilə montaj olunmadığı üçün səsləndirilmir. Klub üzvlərinin həmin avadanlığa çox böyük ehtiyacı var".

Gəncləri narahat edən problemlər "Gəlin düşünək" klubunda da öz əksini tapıb. Gənclər "Dinimiz, mənəviyyatımız", " ölümə yox deyək", "Məktəb biz", "Ramazan bayramı" mövzularında da fəallıqları ilə seçilmişlər.

"Günəş" Kukla Teatrı uşaq bağçalarında, məktəblərdə "Dovşanın hiyləsi", "Meşədə imtahan", "Tülkünün aqibəti" tamaşalarını göstərirlər. "Günəş" Kukla Teatrı Kürdəxanı Pirşağı qəsəbələrindəki mədəniyyət evlərində, Bakıxanov qəsəbəsinin Suraxanı rayonunun bir neçə uşaq bağçasında da tamaşalar göstərmişdir. Bu ilin aprelində Bakı şəhər xalq teatrlarının təşkil etdiyi festivalda Bülbülə qəsəbə mədəniyyət evinin kukla teatrı uğurlu çıxışına görə Bakı Şəhər Mədəniyyət Turizm İdarəsinin Fəxri fərmanı ilə təltif olunub.

Mədəniyyət evində təşkil olunan "Şənlik" instrumental ansamblı da fəallığı ilə seçilir. Ansambl Afər Mustafayevin rəhbərliyi ilə bayram şənliklərində maraqlı konsert proqramı ilə qəsəbə sakinləri qarşısında çıxışlar edir. Kollektiv 2008-ci ildə Bakı Şəhər Mədəniyyət Turizm İdarəsi tərəfindən Azərbaycan Xalq Cümhuriyyətinin 90 illiyinə həsr olunmuş bədii özfəaliyyət kollektivlərinin "İstedad-2008" baxış-müsabiqəsində fəal çıxışına görə Fəxri fərmanla təltif edilib. Ansambl hazırda Bakı Şəhər Mədəniyyət Turizm İdarəsi tərəfindən keçirilməsi nəzərdə tutulan "Vətənimdir Azərbaycan!" adlı baxış-müsabiqəyə hazırlaşır.

Bədii qiraət bölməsi əsasında mədəniyyət evində "Üfüq" Poeziya Teatrı da yaradılıb. Poeziya teatrının üzvləri "Qalx ayağa, Azərbaycan!", "Xocalı harayı", "Şəhidləri unutmayaq!" adlı ədəbi kompozisiyaları qəsəbə sakinləri və məktəblilər qarşısında nümayiş etdiriblər.

Bülbülə qəsəbə mədəniyyət evi hər il ənənəvi olaraq adını layiqincə daşıdığı ölməz şair M.Ə.Sabirin xatirə günlərini də təntənə ilə qeyd edir. Onu da deyək ki, Bülbülə və Əmircan məktəblilərinin iştirakı ilə hər il may ayında şairin yaradıcılığına həsr olunan müsabiqə keçirilir. Bu yarışın keçirilməsində əsas məqsəd gəncləri şair M.Ə.Sabirin ölməz yaradıcılığı ilə bir daha ətraflı tanış etməkdir.

 

 

Təranə CƏBİYEVA

 

Azərbaycan.- 2010.-25  iyul.- S.  5.