Azərbaycan Respublikasının Prezidenti zati-aliləri cənab İlham Əliyevə

Azərbaycanın Respublika Günü münasibətilə icazə verin, Çin Xalq Respublikasının hökuməti və xalqı adından, şəxsən öz adımdan Zati-alilərinizə və Sizin şəxsinizdə dost Azərbaycan xalqına səmimi təbriklərimi və ən xoş arzularımı çatdırım.

Zati-alilərinizin rəhbərliyi ilə son illərdə Azərbaycanda siyasi sabitlik qorunub saxlanır, iqtisadiyyat sürətlə inkişaf edir. Xalqın həyat səviyyəsi durmadan yüksəlir, dövlətin gücü artır. Sizin səmimi dostlarınız və mehriban tərəfdaşlarınız kimi biz buna ürəkdən sevinir və ölkənizin xalqına böyük uğurlar diləyirik.

Ölkələrimiz arasında diplomatik münasibətlər yaradılandan sonrakı 18 ildə Çin-Azərbaycan münasibətləri sağlam və sabit şəkildə inkişaf edir. Qarşılıqlı siyasi etimad möhkəmlənir, qarşılıqlı faydalı ticari-iqtisadi əməkdaşlıq genişlənir, mədəni əlaqələr və mübadilələr sürətlənir. Biz ümdə maraqlarımızla bağlı mühüm məsələlərdə bir-birimizi dəstəkləyir və bir-birimizə kömək edirik. Uzunmüddətli və sabit Çin-Azərbaycan dostluq münasibətlərinin inkişaf etməsi həqiqətən ölkələrimizin və xalqlarımızın xeyrinə olmuşdur. Biz dostluq və tərəfdaşlıq münasibətlərini daim yeni səviyyəyə çatdırmaq üçün Zati-alilərinizlə birlikdə səy göstərməyə hazırıq.

Ölkənizə tərəqqi və qüdrət, xalqınıza firavanlıq və səadət arzulayıram.

Zati-alilərinizə möhkəm cansağlığı diləyir və ən xoş arzularımı bildirirəm.

Dərin hörmətlə,

Hu SZİNTAO,

Çin Xalq Respublikasının Sədri

Azərbaycan.- 2010.- 1 iyun- S. 1.