Uşaq Muğam Festivalı davam edir

Son zamanlar ölkəmizdə qədim irsimizin öyrənilməsi və təbliği ilə bağlı yüksək səviyyədə işlərin aparılmasına diqqət güclənmişdir.

Azərbaycan Mədəniyyətinin Dostları Fondunun təşəbbüsü ilə görkəmli muğam ustalarımızın antologiyasının işıq üzü görməsi, ölkə Prezidenti cənab İlham Əliyevin təşəbbüsü ilə respublikada Muğam Mərkəzinin yaradılması deməyə əsas verir ki, bu işlərin regionlarda da aparılması üçün yerli təşkilatların diqqətinə ehtiyac var.

II Beynəlxalq Uşaq Muğam Festivalının təşkili və keçirilməsi ilə bağlı Türkiyə, Hindistan, Özbəkistan və Türkmənistan respublikalarının əlaqədar qurumları ilə aparılan danışıqlar və yazışmalar öz bəhrəsini verməkdədir. Bu ölkələrdən 2010-cu ilin oktyabr ayında R.Behbudov adına Dövlət Mahnı Teatrında final mərhələsi ilə başa çatacaq, yuxarıda adıçəkilən festivalda iştirak edəcək nümayəndə heyətlərinin, artıq beynəlxalq statusu almış birgə layihəyə qatılacaqları öz təsdiqini tapmışdır.

Bölgələr üzrə yaradıcı qrupla birgə gənc istedadların seçiminə 2010-cu ilin may ayından start verilib. Belə ki, respublika Gənclər və İdman Nazirliyinin dəstəyi ilə təşkilat komitəsi fəaliyyətə başlayıb. Bütün seçmə turlar və final mərhələsi İctimai Televiziya və Radio Yayımları Şirkətinin "Təşkilat Komitəsi"nə daxil edilmiş yaradıcı qrupu tərəfindən ətraflı surətdə işıqlandırılır (1-ci seçim turu Qarabağ zonası üzrə Ağcabədidə keçirilib, növbəti turun Şirvan zonası üzrə Qəbələ rayonunda keçirilməsi nəzərdə tutulur. Daha sonra Gəncə və Bakı mərhələləri iş planına daxildir).

"Kainat" Gənclik Mərkəzi bu il də istedadların üzə çıxmasında bütün mövcud imkanlardan istifadəyə etməyə çalışır. Təşkilat komitəsi və onun işçi qrupunun üzvləri II Beynəlxalq Uşaq Muğam Festivalının uğurla başa çatacağına ümid bəsləyir.

Azərbaycan.- 2010.- 12 iyun- S. 7.