Bakıda "İslam Konfransı Təşkilatının üzv ölkələri arasında ticarətin gücləndirilməsi üçün Yol xəritəsinin hazırlanması"na dair Ticarətin Maliyyələşdirilməsi üzrə Beynəlxalq İslam Korporasiyasının iclası başlanmışdır

İyunun 21-də Bakıda İslam İnkişaf Bankının illik toplantısı "İslam Konfransı Təşkilatının üzv ölkələri arasında ticarətin gücləndirilməsi üçün Yol xəritəsinin hazırlanması"na dair Ticarətin Maliyyələşdirilməsi üzrə Beynəlxalq İslam Korporasiyasının iclası öz işinə başlamışdır.

İclasda islam ölkələrinin iqtisadiyyatı üçün xüsusi proqram çərçivəsində ticari yardımlar üzrə müvafiq Yol xəritəsinin həyata keçirilməsi, bununla əlaqədar milli və regional yardım prioritetlərinin müəyyənləşməsi məsələləri müzakirə olunur.

Azərbaycanın iqtisadi inkişaf naziri Şahin Mustafayev iclası açaraq ölkəmizin iqtisadiyyatı, biznes mühiti və investisiya imkanları barədə iştirakçılara ətraflı məlumat vermişdir.

Nazir vurğulamışdır ki, Azərbaycanda sosial-iqtisadi, ictimai-siyasi sahədə vəziyyət çox müsbətdir. Ölkəmizdə azad yaşamaq, yaratmaq və işləmək üçün bütün şərait vardır. Azərbaycan ən sürətlə inkişaf edən, sabit, möhkəm, dünyada öz rolunu oynayan ölkədir. Təsadüfi deyildir ki, beynəlxalq maliyyə qurumları da Azərbaycanda aparılan islahatları görür, qiymətləndirir və mükafatlandırırlar. Azərbaycan xarici sərmayələr üçün çox məqbul bir yerdir.

İslam İnkişaf Bankının (İİB) prezidenti Əhməd Məhəmməd Əli İİB-in Müdirlər Şurasının 35-ci illik toplantısına ev sahibliyi etdiyi üçün Azərbaycan Respublikasının rəhbərliyinə təşəkkür etmiş, bankla Azərbaycan arasında sıx əməkdaşlığın olduğunu vurğulamışdır.

Ə.M.Əli İslam Konfransı Təşkilatının üzvü olan ölkələr arasında Yol xəritəsinin əhəmiyyətindən danışaraq qeyd etmişdir ki, bu layihə dövlətlər arasında ticarətin gücləndirilməsinə, bu sahədə əlaqələrin mükəmməl qurulmasına kömək edəcəkdir.

Onun sözlərinə görə, 2005-2010-cu illərdə İİB artıq bir çox ölkələrə böyük vəsaitlər ayırmışdır. Bu gün bankın əsas məqsədi üzv dövlətlərin ekspertlərinin diqqətini İslam Konfransı Təşkilatının üzvü olan ölkələr arasında ticarətin gücləndirilməsi üçün Yol xəritəsinin hazırlanması işinə yönəltməkdir. İİB-in əsas məqsədi islam ölkələri ilə ticarətin həcmini ən azı 10 dəfə artırmaqdır.

Digər çıxış edənlər iclasda müzakirə edilən məsələlərə münasibətlərini bildirmişlər. Vurğulanmışdır ki, Yol xəritəsi İİB-in üzvü olan ölkələr arasında əməkdaşlığı daha da inkişaf etdirəcək və yeni nailiyyətlərin qazanılmasına səbəb olacaqdır.

Qonaqlar həmçinin Azərbaycanda mövcud əlverişli iqtisadi mühiti də xüsusi qeyd etmişlər. Vurğulanmışdır ki, bu mühit xarici sərmayədarlar üçün cəlbedicidir.

Bundan əlavə, iclasda inzibati və texniki məsələlər, bir sıra üzv ölkələrdə yeni inkişaf layihələrinin maliyyələşdirilməsi, banka üzv olmayan ölkələrdə müsəlman icmaları üçün qrant və yardımlar da müzakirə edilmişdir.

İclas öz işini iyunun 22-də davam etdirəcəkdir.

Azərbaycan.- 2010.- 22 iyun- S. 2.