Xarici İşlər Nazirliyində

İyunun 24-də Azərbaycanın xarici işlər naziri Elmar Məmmədyarov İraq Respublikasının ölkəmizdə yeni təyin olunmuş səfiri Heydər Şiya Qubeyşi əl-Bərrak ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, etimadnamənin surətini nazirə təqdim edən H.Şiya Qubeyşi əl-Bərrak ölkəmizdə səfir təyin olunmasından məmnunluğunu diqqətə çatdırmışdır. Ölkələrimiz arasında bir sıra sahələrdə əməkdaşlığın inkişafı üçün geniş potensialın olduğunu vurğulayan diplomat İraq-Azərbaycan əlaqələrinin genişləndirilməsi istiqamətində çalışacağını bildirmişdir. Nazir E.Məmmədyarov Azərbaycanda səfir təyin olunması münasibətilə H.Şiya Qubeyşi əl-Bərrakı təbrik etmiş, ölkələrimiz arasında əlaqələrin intensivləşdirilməsi üçün mövcud imkanlardan səmərəli istifadə edilməsinin məqsədəmüvafiqliyini vurğulamışdır.

* * *

İyunun 24-də Azərbaycanın xarici işlər naziri Elmar Məmmədyarov Avstriya-Azərbaycan Ticarət Palatasının üzvü Qabriel Lanski və AŞPA-nın sabiq sədri, Beynəlxalq Sülh İnstitutunun direktoru Piter Şider ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə tərəflər Azərbaycan-Avstriya əlaqələrinin cari vəziyyətini və inkişaf perspektivlərini müzakirə etmiş, ölkəmizdə Avstriyanın səfirliyinin açılmasının iqtisadi, mədəni və digər sahələrdə münasibətlərin daha da inkişafına təkan verəcəyini vurğulamışlar. Azərbaycan ilə Avstriya arasında əlaqələrin inkişafı üçün geniş potensialın olduğu və bundan səmərəli istifadə edilməsinin məqsədəmüvafiqliyi bildirilmişdir. Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.

Azərbaycan.- 2010.- 25 iyun- S. 6.