Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası ölkədə QHT-lərin vəziyyəti haqqında ilk milli hesabatını təqdim etmişdir

İyunun 25-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Azərbaycan Respublikasında QHT-lərin mövcud vəziyyətinə dair ilk Milli Hesabatını təqdim etmişdir.

Tədbirdə Prezident Administrasiyasının ictimai-siyasi məsələlər şöbəsinin müdiri Əli Həsənov, yerli və xarici QHT-lərin, beynəlxalq təşkilatların, Bakıda fəaliyyət göstərən səfirliklərin təmsilçiləri iştirak etmişlər.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev qeyd etmişdir ki, Milli Hesabat ölkənin QHT sektorunun tarixini, inkişaf mərhələlərini və mövcud durumunu obyektiv əks etdirən mühüm sənəddir. Hesabatda QHT-lərin fəaliyyətinin on ildən artıq bir dövrü hərtərəfli təhlil edilmiş və bölmələr üzrə zəruri nəticələr çıxarılmışdır.

Milli Hesabatın Azərbaycanın QHT sektoru haqqında beynəlxalq arenada da obyektiv təsəvvürün yaranmasına töhfə verəcəyini vurğulayan A.Quliyev sənədin ingiliscəyə tərcümə edilərək, hər iki dildə ictimaiyyətə təqdim olunacağını bildirmişdir.

Qeyd edilmişdir ki, QHT-lərə Dövlət Dəstəyi Şurasının yaradılması bu sektora dövlətin qayğı göstərməsi işini xeyli asanlaşdırmışdır. 2008-ci ildən etibarən QHT-lərin maliyyələşməsinə dövlət yardımı əhəmiyyətli dərəcədə artmışdır. Şuranın xətti ilə 2008-ci ildə 1,2 milyon, 2009-cu ildə 2,068 milyon, bu il isə 2,1 milyon manat maliyyə vəsaiti müsabiqə əsasında QHT-lər arasında bölüşdürülmüşdür.

Ölkədə QHT-lərin fəaliyyəti və inkişafı üçün əlverişli şəraitin yaradıldığını bildirən şura sədri ötən il QHT sektorunun maliyyə dövriyyəsinin 21 milyon 638 min manat olduğunu diqqətə çatdırmışdır. Bu ilin 6 ayı ərzində isə bu rəqəm 12 milyon 738 min manat təşkil edir.

Prezident Administrasiyasının ictimai-siyasi məsələlər şöbəsinin müdiri Əli Həsənov tədbirdə çıxış edərək bildirmişdir ki, ölkədə QHT-lərin vəziyyəti haqqında Milli Hesabatın təqdim olunması və müzakirəsi Azərbaycan cəmiyyətində QHT sektorunun inkişafının göstəricisidir.

QHT-lər və dövlət münasibətlərinin tarixindən danışan Ə.Həsənov Azərbaycanda qeyri-hökumət təşkilatlarının yaranması mərhələsindən 1995-ci ilədək olan dövrün mürəkkəb ictimai-siyasi vəziyyətdə keçdiyini bildirmişdir. Şöbə müdiri 1995-ci ilədək olan dövrü Azərbaycanda siyasi fəaliyyətin, QHT-lərin əsaslarının və dövlətin siyasi təşkilatlarla, QHT-lərlə bağlı fəaliyyətinin formalaşması mərhələsi kimi dəyərləndirmişdir.

1995-ci ildə Konstitusiyanın qəbulu və parlamentin formalaşdırılmasından sonra cəmiyyətdəki debatlar parlamentə keçirilərək QHT-lərə və siyasi partiyalara öz mövqelərini göstərmək, beynəlxalq təcrübənin öyrənilməsi və Azərbaycanda tətbiq edilməsi mərhələsi başlanmışdır. 2000-ci ilədək QHT-lərin fəaliyyəti siyasi fəaliyyətlə qarışdırılmış, onlar fəal siyasətə qoşulmuş və Azərbaycanda hakimiyyət uğrunda mübarizə aparmışlar.

2000-ci ildən etibarən Azərbaycan dövlətinin beynəlxalq təcrübəyə əsaslanan QHT siyasətinin formalaşmağa başladığını deyən Ə.Həsənov qeyd etmişdir ki, bu gün dövlət QHT-ləri tərəfdaş kimi dəyərləndirir. Azərbaycan hökumətinin reallaşdırdığı siyasətin mahiyyəti ondan ibarətdir ki, cəmiyyətin idarə edilməsindən dövlətin daxili və xarici siyasətinin formalaşmasınadək bütün məsələlərdə vətəndaşların istəyi, arzusu və təşəbbüsləri nəzərə alınsın. Odur ki, 2000-ci ildən bu günədək olan dövr Azərbaycanda QHT-lər ilə dövlətin, siyasi partiyaların və vətəndaşların münasibətlərinin konseptual əsaslarının formalaşması dövrü kimi dəyərləndirilə bilər.

Şöbə müdiri bildirmişdir ki, bu gün QHT-lərin bütün qanadlarının iştirakı ilə hesabatın hazırlanması və təqdimatı sevindirici haldır. Dövlətin QHT-lərə verdiyi dəstəyi Azərbaycanın bugünkü vəziyyətində bunu qənaətbəxş hesab etmək olar. QHT-lərə Azərbaycan dövlətinin dəstəyi bilavasitə şura vasitəsilə həyata keçirilir. Bundan əlavə, Azərbaycanın mərkəzi və yerli icra hakimiyyəti orqanları da QHT donorları funksiyasında çıxış edirlər.

Ə.Həsənov bildirmişdir ki, ölkə QHT-lərinin dünyadakı müsbət təcrübəni mənimsəyərək öz fəaliyyətlərində əks etdirməsi, yeni təşəbbüslərlə çıxış etməsi, dünya miqyasında rəqabət apara bilməsi, sosial fəallığın artırılması, dövlətin daxili və xarici fəaliyyətində fəal iştirakı Azərbaycan dövlətinin marağında olan məsələlərdir.

Digər çıxışlarda bildirilmişdir ki, ilk Milli Hesabat QHT sektorundakı mövcud vəziyyətin öyrənilməsi və çətinliklərin müəyyən edilərək aradan qaldırılması baxımından çox mühüm sənəddir. Çıxışlarda, həmçinin ölkənin QHT həyatının inkişaf dinamikasının reallığa uyğun şəkildə, dəqiq faktlarla Milli Hesabatda əks olunmasının ictimai sektorun bundan sonrakı tədqiqatçıları üçün əhəmiyyəti vurğulanmış, fikir və təkliflər səsləndirilmişdir.

AzərTAc

Azərbaycan.- 2010.- 26 iyun- S. 4.