Nüfuzlu "The National" qəzetində "Qafqaz münaqişəsi bu faciəni daha böyük dəhşətə çevirəcək" adlı məqalə dərc olunmuşdur

Birləşmiş Ərəb Əmirliklərində (BƏƏ) nəşr edilən və bölgədə geniş oxucu kütləsinə malik "The National" qəzetinin 25 fevral nömrəsində Azərbaycanın bu ölkədəki səfiri Elxan Qəhrəmanovun və azərbaycanlı iş adamlarının iştirakı ilə Dubayda keçirilmiş Xocalı soyqırımının 18-ci ildönümünə həsr olunmuş tədbirə dair "Qafqaz münaqişəsi bu faciəni daha böyük dəhşətə çevirəcək" adlı məqalə dərc olunmuşdur.

Səfirlikdən bildirmişlər ki, jurnalist Frank Kanenin məqaləsində Sovet İttifaqının dağılmasından sonra Ermənistanın silahlı qüvvələri tərəfindən Azərbaycanın tarixi torpağı olan Qarabağın dağlıq ərazisində Xocalının işğal olunduğu barədə məlumat verilir.

Məqalədə yazılır ki, 1992-ci il fevralın 25-dən 26-na keçən gecə erməni silahlı dəstələri keçmiş SSRİ-nin 366-cı motoatıcı alayının zirehli texnikası və hərbi heyətinin köməyi ilə Xocalını mühasirəyə almışlar. Bu, Azərbaycan torpaqlarının işğalının genişləndirilməsi üçün tərtib olunmuş planın bir hissəsi idi. Onlar Xocalıda yaşayan dinc əhaliyə mühasirədən çıxmaq üçün bir yol təklif etmişlər. Yaşlı kişilər, qadın və uşaqlar mühasirədən çıxmaq istəyərkən erməni silahlı qüvvələri tərəfindən hücuma məruz qalmışlar. Bu, 613 nəfərin ölümünə və minlərlə insanın ağır yaralanmasına səbəb olmuşdur.

Müəllif xatırlatmışdır ki, jurnalist Tomas Qolts "Azerbaijan Dairy" kitabında bu hadisəni Azərbaycanın tarixində ən qanlı və dəhşətli səhifə adlandırmışdır.

Frank Kane yazır: "Mən azərbaycanlı xanım ilə evliyəm. Münaqişə ilə bağlı ermənilər bütün olanları təkzib edirlər və bildirirlər ki, onların əsgərləri Azərbaycanın Silahlı Qüvvələri tərəfindən hücuma məruz qalmış və bu atışma hər iki tərəfdən çoxlu itki ilə nəticələnmişdir. Lakin bu bəyanat sizin Xocalı ilə bağlı təsəvvürünüzü tam formalaşdırmayacaqdır. Çünki Dubayda Xocalı soyqırımının 18-ci ildönümü ilə bağlı keçirilmiş tədbirdə insanı dəhşətə gətirən və ruhunu titrədən faciəni əks etdirən şəkillərin və videonun şahidi olduq. Bu şəkillər o qədər dəhşətli idi ki, Vyetnamın Lai və İraqın Fəluca hadisələrinin davamı kimi görünürdü. Burada insanların hərbi maşınlarla vəhşicəsinə qətlə yetirilməsi göstərilmişdir. Azərbaycan tərəfinin əlində faciənin törədilməsində iştirak edən 31 nəfərin adı olan siyahı vardır. İnterpola və beynəlxalq məhkəmələrə bu şəxslərin həbs olunması və cinayət məsuliyyətinə cəlb edilməsi ilə bağlı müraciətlər hələ heç bir nəticə verməmişdir. Dubaydakı tədbir Xocalıdakı müsəlmanların qətlini əks etdirirmiş və bu, Yaxın Şərq ölkələrinin diqqətinə də çatdırılmışdır".

Məqalədə qeyd olunur ki, Azərbaycan hökuməti beynəlxalq ictimaiyyətə Dağlıq Qarabağın Azərbaycanın tarixi torpağı olduğunu təsdiq etmək istəyir. Bu, dəfələrlə BMT tərəfindən təsdiqlənmişdir. Ermənistan-Azərbaycan, Dağlıq Qarabağ münaqişəsi körfəz ölkələrinə və dünya enerji sənayesinə mənfi təsir edir. Son illərdə BƏƏ Azərbaycan ilə ticarət əlaqələrini nəzərəçarpacaq dərəcədə artırmışdır. Mərkəzi Asiyanın böyük hissəsi hesab edilən Cənubi Qafqazdakı neft və qaz ehtiyatları ABŞ və Avropa enerji sərmayəçilərinin regiona diqqətini daha da artırır. Ərazidəki istənilən münaqişə Xəzər regionunda enerji təhlükəsizliyinə təsir edə bilər. Belə ki, münaqişə yenidən başlaya bilər.

Yazıda Azərbaycanın xarici işlər nazirinin "Əgər Ermənistan münaqişənin həlli ilə bağlı müsbət addım atmasa, Cənubi Qafqazda "Böyük müharibə"nin yenidən başlaması qaçılmazdır. Bu isə yenidən Xocalı faciəsi kimi qlobal fəlakətlərin təkrarlanmasına gətirib çıxaracaqdır" sözlərinə də istinad olunmuşdur.

AzərTAc

Azərbaycan.- 2010.- 3 mart.- S. 4.