Prezident İlham Əliyev Rusiyada "İlin adamı" elan olundu

Azərbaycanın malik olduğu strateyi-coğrafi mövqe və zəngin karbohidrogen ehtiyatları ölkəmizin iqtisadi potensialını daim gücləndirməyə, dünya iqtisadiyyatına daha sıx inteqrasiyaya geniş imkanlar açmışdır. Cənubi Qafqazda sülhün, təhlükəsizliyin, qlobal eneryi və kommunikasiya layihələrinin həyata keçirilməsində əsas söz sahibi olan ölkəmizin beynəlxalq aləmdə nüfuzu ildən-ilə artmaqdadır. Son yeddi ildə Azərbaycanda uğurla gerçəkləşdirilən sosial-iqtisadi strategiya vətəndaşlarımızın rifah halının davamlı yüksəlişinə gətirib çıxarmışdır.

Azərbaycanda neftdən əldə olunan vəsaitlərin qeyri-neft sektorunun inkişafına yönəldilməsi və bu sahədə böyük nailiyyətlərin əldə olunması respublikamızın inkişaf modelinin düzgün seçilməsindən irəli gəlir. İnfrastrukturun yeniləşdirilməsi insanların firavan və rahat yaşayışı, sahibkarlığın dinamik inkişafı bu gün həm də ölkənin milli təhlükəsizliyi ilə bağlı məsələlərdir.

Müasir tələblərə cavab verən infrastruktur yaratmadan sahibkarlığın, turizmin, qeyri-neft sektorunun inkişafından, mədəni-intellektual yüksəlişdən danışmaq qeyri-mümkündür. Dövlət investisiyaları hesabına əhəmiyyətli infrastruktur, kommunal və sosial obyektlərin inşası və yenidən qurulması da məhz qeyd olunan məqsədlərin gerçəkləşdirilməsi baxımından vacibdir. Ümumbəşəri sivilizasiyanın çox yüksək səviyyəyə çatdığı bir şəraitdə Azərbaycanın hər bir vətəndaşının normal yaşayışı üçün kommunal xidmətlərin səviyyəsinin yüksəldilməsi, zəruri infrastruktur layihələrinin gerçəkləşdirilməsi, əhalinin fasiləsiz olaraq elektrik enerjisi, təbii qaz, içməli su ilə təminatı, yolların bərpası və yenidən çəkilişi, zəruri abadlıq işlərinin aparılması dövlətin əsas vəzifələrindən sayılır. Bütün bunlar isə nəticə etibarilə Azərbaycan insanının mədəni-intellektual səviyyəsinin yüksəlməsinə, mənəvi-əxlaqi dəyərlərin cəmiyyətdə əsas meyara çevrilməsinə xidmət edir. Ötən bir ildə Bakıya Oğuz-Qəbələ zonasından su kəmərinin çəkilişi davam etdirilmiş, paytaxtda yeni körpülər, yolötürücülər, piyada keçidləri istifadəyə verilmiş, respublika əhəmiyyətli yollarda əsaslı yenidənqurma işləri aparılmış, paytaxtda və regionlarda yeni təhsil, səhiyyə, mədəniyyət, olimpiya-idman kompleksləri istifadəyə verilmişdir.

2010-cu ilin dövlət büdcəsində dövlət əsaslı kapital qoyuluşları üçün 3,6 milyard manatdan çox vəsaitin nəzərdə tutulması da kifayət qədər çətin bir mərhələdə büdcənin investisiya yönümlüyünün qorunub saxlanıldığını deməyə əsas verir. Bu il Oğuz-Qəbələ-Bakı su kəməri, Taxtakörpü su anbarı, Samur-Abşeron su kanalı, Şəmkirçay su anbarı kimi qlobal layihələrin reallaşdırılması xüsusi diqqət mərkəzində olacaqdır.

Dövlət əsaslı vəsait qoyuluşu xərclərinin strukturunu təkmilləşdirmək, həmin vəsaitdən səmərəli istifadəyə nəzarəti gücləndirmək, dövlət zəmanəti ilə iqtisadiyyata cəlb olunan, habelə dövlət büdcəsində dövlət investisiya xərcləri üçün nəzərdə tutulan vəsaitləri istiqamətlər üzrə düzgün yönəltmək qarşıdakı il üçün prioritet məqsədlər sırasındadır. Dövlət investisiya siyasəti ilə müvafiq iqtisadi inkişaf proqramları arasında əlaqələri möhkəmləndirmək, bu vəsaitlərin, ilk növbədə, 2010-cu ildə başa çatdırılması nəzərdə tutulan layihələrin maliyyələşdirilməsinə yönəldilməsi də əsas vəzifə kimi qarşıda durur.

Ölkənin müəyyən edilmiş strateji iqtisadi siyasətinə uyğun olaraq 2010-cu ildə sosial müdafiə və sosial təminat xərclərinin, o cümlədən əhalinin yoxsulluq səviyyəsinin azaldılmasında mühüm əhəmiyyəti olan minimum əməkhaqqının, yaşa görə əmək pensiyalarının baza hissəsinin, sosial müavinətlərin və digər sosial təyinatlı xərclərin, tələbələrin və aspirantların təqaüdlərinin sabit şəkildə maliyyələşdirilməsi qarşıya məqsəd kimi qoyulmuşdur. Eyni zamanda, pensiyaların baza hissəsinin yaşayış minimumuna yaxınlaşdırılması, dövlət büdcəsindən maliyyələşən müəssisələrdə əməkhaqqı sisteminin təkmilləşdirilməsi, ölkənin pensiya sistemində islahatların dərinləşdirilməsi nəzərdə tutulmuşdur.

Azərbaycanın son illərdə sürətli inkişaf və tərəqqi yolunda inamla irəliləməsi, makroiqtisadi uğurlara imza atması dövlət büdcəsində də real əksini tapır. Respublikamızın son illərdəki büdcəsinə nəzər saldıqda həyata keçirilən iqtisadi islahatların milli maraq və mənafe baxımından səmərəliliyi bir daha təsdiqlənir. MDB dövlətlərinin büdcə vəsaitləri 2003-2008-ci illərdə 15-20 faiz artdığı halda, respublikamızda bu göstərici üzrə fərq 8 dəfədən çoxdur. Azərbaycanın büdcə gəlirlərinin illik artım tempi ötən dövrdə orta hesabla 30-40 faiz artımla müşayiət olunmuşdur. Qlobal böhranla müşayiət olunan 2008-2009-cu illərdə dövlət büdcəsinin 10 milyard manatı ötməsi kifayət qədər yüksək göstəricidir. Prezident İlham Əliyev bildirmişdir: "Azərbaycan iqtisadiyyatı son illər ərzində dünyada ən sürətlə inkişaf edən iqtisadiyyatdır. Bunu həm iqtisadi göstəricilər əyani şəkildə sübut edir, eyni zamanda Azərbaycanda görülən işlər göz qabağındadır. Bizim iqtisadiyyat 6 il ərzində təxminən 3 dəfə artıbdır. Bu, dünyada analoqu olmayan inkişafdır. Hətta bütün dünya üçün ağır olan 2009-cu ildə bizim iqtisadiyyatımız 9,3 faiz artıb. Ümumi daxili məhsulun artması onu göstərir ki, Azərbaycan iqtisadiyyatı dayanıqlıdır, çoxşaxəlidir və uğurludur.

Bütün bu işlərin təməlində apardığımız islahatlar, ölkəmizin hərtərəfli inkişafı, regionların sosial-iqtisadi inkişafının icrası ilə bağlı görülən tədbirlər, regional proqramın birinci mərhələsinin uğurla başa çatdırılması və Azərbaycanda gözəl investisiya mühitinin yaradılması dayanır. Bu gün Azərbaycanda investisiyalar həm xaricdən daxil edilir, həm də ancaq son bir neçə il ərzində daxili investisiyalar xarici investisiyaları üstələyir. Bu onu göstərir ki, artıq Azərbaycan dövləti və Azərbaycan şirkətləri öz ölkəsinə böyük sərmayə qoyulması istiqamətində önəmli addımlar atırlar".

Ölkə rəhbərliyi tərəfindən ardıcıl və məqsədyönlü şəkildə həyata keçirilən çoxşaxəli islahatlar əhalinin maddi rifah halının yaxşılaşmasına, makroiqtisadi sabitliyin təmin olunmasına, davamlı inkişafa gətirib çıxarmışdır. Dövlət başçısının 2009-cu ildə imzaladığı 181 qanun, 169 fərman, 562 sərəncam ölkənin demokratik inkişafına, iqtisadi qüdrətinin artmasına, idarəetmə strukturunun təkmilləşməsinə xidmət etmişdir. Əhalinin rifahının yüksəldilməsi, yoxsulluğun və işsizliyin aradan qaldırılması, ölkədə müasir infrastrukturun yaradılması məqsədilə 60-a yaxın dövlət proqramı qəbul edilmiş, onların bir çoxunun icrası başa çatdırılmış, daha uzunmüddətli proqramlar ardıcıl olaraq həyata keçirilməkdədir. Təkcə 2009-cu ildə 10-dan artıq proqramın qəbul olunması deyilənlərə əyani misaldır. Qəbul olunan yeni dövlət proqramlarında qarşıdakı illərdə ölkə iqtisadiyyatında inkişaf tempinin qorunub saxlanılması, sosial-iqtisadi islahatların əvvəlki illərdə olduğu kimi, davam etdirilməsi, əhalinin maddi rifahının təmin olunması, sosial şəraitinin yaxşılaşması, investisiya qoyuluşlarının həyata keçirilməsi, iqtisadiyyatın diversifikasiyası və digər tədbirlərin görülməsi nəzərdə tutulub.

Qlobal iqtisadi böhran şəraitində ölkəmizin ötən illərdə qazandığı iqtisadi nailiyyətləri qoruyub saxlaması və davamlı inkişafı böyük uzaqgörənliklə həyata keçirilən inkişaf strategiyasının bariz nəticəsidir. Azərbaycanın iqtisadi sahədə əldə etdiyi uğurlar artıq beynəlxalq aləmdə "Azərbaycan modeli" kimi öyrənilir, nümunə göstərilir. Ölkəmizin davamlı inkişaf yolunda olacağını müxtəlif beynəlxalq təşkilatlar da təsdiqləyirlər. Dünya ölkələrində iqtisadi artım 1-2 faizlik templə müşahidə olunduğu halda respublikamızda inkişaf indiqatoru 8 faizdən aşağı proqnozlaşdırılmır. Beynəlxalq Valyuta Fondu 2010-cu ildə Azərbaycanda ümumi daxili məhsulun (ÜDM) artım sürətinin 12,5 faiz, Dünya Bankı 7,8 faiz, Avropa Yenidənqurma və İnkişaf Bankı 6 faiz, Asiya İnkişaf Bankı isə 6,7 faiz proqnozlaşdırırlar. Region ölkələrinin proqnoz göstəriciləri arasında ən yaxşı nəticə də məhz ölkəmizə aiddir.

Azərbaycan Prezidenti İlham Əliyevin uğurla həyata keçirdiyi iqtisadi inkişaf strategiyası ölkəmizin qlobal böhran şəraitində də davamlı inkişafını təmin etmiş və böyük uğurların əldə edilməsinə şərait yaratmışdır. Ölkəmizin əldə etdiyi uğurlar beynəlxalq qurumlar tərəfindən də ardıcıl olaraq izlənilir və öz qiymətini alır. Bu günlərdə Rusiyada təsis edilmiş "İlin adamı-2009" Qran-pri mükafatına layiq görülən insanların adları açıqlanmışdır. Ölkə başçısı İlham Əliyev də bu ali mükafata layiq görülmüşdür. Xatırladaq ki, bu mükafat il ərzində öz ölkələrinin ictimai, siyasi və dövlət mənafelərinə xidmət işində ən parlaq nəticələr göstərmiş insanlara təqdim edilir. Bu mükafat Rusiyanın RBK informasiya agentliyi tərəfindən təsis edilmişdir. Mükafatın təsisçiləri bildirirlər ki, "İlin adamı" öz ölkəsinin inkişafının mühüm meyillərini təcəssüm etdirən, onun gələcəyini formalaşdıran insanlardır. Qeyd edək ki, mükafatın laureatlarını müəyyənləşdirən nüfuzlu ekspertlər şurasına tanınmış siyasətçilər, ictimai və siyasi xadimlər, ən iri şirkətlərin rəhbərləri, elm və mədəniyyət xadimləri, KİV nümayəndələri daxildirlər.

Builki laureatların seçimi iqtisadi böhran fonunda keçmiş və qaliblərin tərkibi də çox cəhətdən bu amilə əsasən müəyyən edilmişdir. Laureatların çoxunun qələbəsi məhz onların böhrana qarşı uğurlu mübarizəsi sayəsində təmin edilmişdir.

Dünya maliyyə böhranı şəraitində ölkəmizin inkişaf tempini qoruyub saxlaması və sosial-iqtisadi islahatların ardıcıl olaraq davam etdirilməsi beynəlxalq qurumlar tərəfindən də yüksək qiymətləndirilir. Əldə olunan nəticələr deməyə əsas verir ki, Azərbaycan iqtisadi inkişaf yolunda inamla irəliləyərək daha böyük nailiyyətlərə imza atacaq və dünyanın ən qüdrətli dövlətləri sırasında yer alacaqdır.

E.HACIALIYEV

Azərbaycan.- 2010.-4 mart.- S. 3.