Ümummilli lider Heydər Əliyevin və şəhidlərin xatirəsinə ehtiram

Azərbaycanda səfərdə olan Litva seymi sədrinin birinci müavini Raymondas Şukisın başçılıq etdiyi nümayəndə heyəti martın 3-də Fəxri xiyabana gəlmişdir.

Litvalı qonaqlar xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad etmiş, məzarı önünə gül-çiçək dəstələri düzmüşlər.

***

Qonaqlar Şəhidlər xiyabanında Azərbaycanın azadlığı və suverenliyi uğrunda mübarizədə canlarından keçmiş qəhrəman Vətən övladlarının məzarları üzərinə tər çiçəklər düzmüşlər.

R.Şukis jurnalistlərə müsahibəsində bildirmişdir ki, səfərdən məqsəd Avropa İttifaqının üzvü kimi Avropa Komissiyasının tvininq layihəsi üzrə təcrübələrini bölüşməkdir. Bu layihə çərçivəsində biz Avropa İttifaqı barədə müxtəlif mövzular ətrafında, o cümlədən qurumda müzakirəyə çıxarılan məsələlərin qəbulu və parlamentlərin rolu haqqında təcrübə mübadiləsi də aparacağıq. Bu isə bir neçə istiqamətdə təşkilati və hüquqi təcrübənin əldə olunmasına xidmət edəcəkdir.

AzərTAc

Azərbaycan.- 2010.- 4 mart.- S. 3.