Slovakiya ölkəmizlə əlaqələrin inkişafında maraqlıdır

Slovakiyanın xarici işlər naziri Miroslav Layçak martın 15-də Milli Məclisin Sədri Oqtay Əsədov ilə görüşmüşdür.

Oqtay Əsədov demişdir ki, Azərbaycan müstəqilliyini bərpa etdikdən sonra bütün ölkələr, o cümlədən Slovakiya ilə əlaqələrin inkişafına xüsusi önəm verir. Bu günə qədər ölkələrimiz arasında 20-dək sənəd imzalanmışdır. Bu sənədlər münasibətlərimizi daha da genişləndirmək üçün zəmin yaradır.

Milli Məclisin Sədri əlaqələrimizin daha da inkişaf etdirilməsi üçün belə sənədlərin sayının artırılmasının, hökumətlərarası komissiyanın yaradılmasının vacibliyini vurğulamışdır. O qeyd etmişdir ki, Milli Məclisdə Azərbaycan-Slovakiya parlamentlərarası işçi qrupu fəaliyyət göstərir və belə bir qrupun qarşı tərəfdə də yaradılması daha məqsədəuyğundur.

Sonra Oqtay Əsədov Azərbaycanın iqtisadi inkişafı, regionda və Avropada sülhün, enerji təhlükəsizliyinin qorunmasında rolu, inkişafa mane olan Ermənistan-Azərbaycan, Dağlıq Qarabağ münaqişəsi barədə ətraflı məlumat vermiş, problemin yalnız Azərbaycanın ərazi bütövlüyü çərçivəsində həllinin mümkünlüyünü, eləcə də rəsmi Bakının ədalətli mövqeyini diqqətə çatdırmışdır.

Bakıda olmasından məmnunluq duyduğunu bildirən Miroslav Layçak demişdir ki, Slovakiya Azərbaycan ilə əlaqələrin inkişafında maraqlıdır. Azərbaycanın iqtisadi inkişafı, qlobal maliyyə böhranının təsirinə çox az məruz qalması diqqət mərkəzindədir.

O demişdir ki, Slovakiya müstəqillik qazandıqdan sonra Avropa strukturlarına inteqrasiya edir. Bu istiqamətdə Azərbaycan ilə əməkdaşlıq hər iki tərəfin maraq dairəsindədir.

Sonra görüşdə ölkələrimiz arasında siyasi, iqtisadi, mədəni, elm, təhsil və başqa sahələrdə əməkdaşlıq, eləcə də qarşılıqlı maraq kəsb edən digər məsələlər ətrafında fikir mübadiləsi aparılmışdır.

AzərTAc

Azərbaycan.- 2010.- 16 mart.- S. 2.