Slovakiya əməkdaşlığa böyük maraq göstərir

Martın 15-də Azərbaycanın xarici işlər naziri Elmar Məmmədyarov ölkəmizdə rəsmi səfərdə olan Slovakiyanın xarici işlər naziri Miroslav Layçak ilə görüşmüşdür.

Görüşdən sonra birgə mətbuat konfransı keçirən nazirlər müzakirə olunan məsələlər haqqında məlumat vermişlər.

Nazir E.Məmmədyarov bildirmişdir ki, görüşdə Ermənistan-Azərbaycan, Dağlıq Qarabağ münaqişəsi, ölkələrimiz arasında əlaqələr, xüsusilə də "Şərq tərəfdaşlığı" proqramı çərçivəsində əməkdaşlıq və digər məsələlər müzakirə edilmişdir.

E.Məmmədyarov vurğulamışdır ki, Azərbaycan ilə Slovakiya arasında siyasi baxımdan əlaqələr yüksək səviyyədə olsa da, iqtisadi əməkdaşlıq istənilən səviyyədə deyildir. Bunun üçün ikitərəfli əlaqələri daha da inkişaf etdirmək vacibdir.

M.Layçak Slovakiyanın Azərbaycan ilə enerji, kənd təsərrüfatı, elektrik stansiyalarının tikintisi, ətraf mühitin qorunması, inşaat və bir çox sahələrdə əməkdaşlığa böyük maraq göstərdiyini demişdir.

Azərbaycanlı həmkarı ilə görüşdə enerji təhlükəsizliyi məsələlərini müzakirə etdiyini deyən slovakiyalı nazir vurğulamışdır ki, bu məsələ Avropa İttifaqı və Slovakiya üçün çox vacibdir: "Biz bu məsələdə Azərbaycanın hansı vacib rola malik olduğunu bilirik".

AzərTAc

Azərbaycan.- 2010.- 16 mart.- S. 2.