Lənkəranda Novruz şənlikləri

Doğma Vətənimizin hər yerində olduğu kimi, Lənkəranda da Novruz böyük sevinclə, şən əhvali-ruhiyyə ilə qarşılanır. Hər yerdə səliqə-sahman yaradılıb, təmizlik işləri aparılıb, evlərdə səməni göyərdilib, paxlava, şəkərbura bişirilib, xonçalar bəzədilib. Novruz tədbirlərinə artıq start verilib. Mart ayının 14-də səhər ayrı-ayrı idarə, müəssisə və təşkilatların kollektivləri şəhərin giriş qapısı sayılan, Lənkəranın tarixini, adət-ənənələrini özündə əks etdirən "Xalq sənətkarlığı" şəhərciyinə gəldilər. Burada müxtəlif yerlərdə "Novruz bayramınız mübarək!", "Elimizə bahar gəlir" pannoları, şüarlar asılmışdır. Saat 11-də Qala qapıları önündə bayram şənliyi başladı.

Lənkəran Şəhər İcra Hakimiyyətinin başçısı Tofiq İbrahimov, Milli Məclisin deputatları, paytaxt Bakıdan, habelə qonşu rayonlardan gələn qonaqlar tədbirin keçirildiyi Qala qapılarının qarşısına gəlirlər. Qədim saz havasının müşayiətiylə Dədə Qorqud tədbir iştirakçılarını təbrik edərək deyir: "Ey igid ərənlərimiz, xanım-xatın qızlarımız, qutlu olsun dövlətimiz! Qadir Tanrı sizi namərdə möhtac etməsin. Qarşı yatan dağlar sizə yaylaq olsun. Haqq yandıran çırağınız sönməsin. Yandırın bayram tonqalını! Qoy dostlarımız görüb sevinsinlər ki, Oğuz elində toy-bayramdır."

Qala divarlarının üstündə məşəllər yandırılır. Şənliyə gələnlər şəhərcikdə rayon tarix-diyarşünaslıq muzeyinin sıra ilə düzülmüş qədim eksponatları, tətbiqi sənət nümunələri, uşaq rəssamlıq məktəbinin müəllim və şagirdlərinin əl işləri, Lənkəran mətbəxi, emal müəssisələrinin istehsal etdiyi məhsullar, milli, maddi-mənəvi irsimiz ilə tanış olurlar. İncəsənət ustaları, bədii özfəaliyyət kollektivləri xalqımızın min illər yol keçib gələn adət-ənənələrini nümayiş etdirirlər. Rəqs və folklor kollektivlərinin, muğam ifaçılarının, idmançıların çıxışları maraqla qarşılanır.

Tədbirin aparıcısı gur səslə ulu öndər Heydər Əliyevin Novruz bayramı haqqında dediyi bu sözləri xatırladır: "Novruz hər bir azərbaycanlının qəlbinin bayramıdır, hər bir insanın, ailənin bayramıdır, bizim müstəqil Azərbaycan Respublikasının bayramıdır. Novruz dostluq, mehribanlıq, mərhəmət, mədəniyyət bayramıdır, xalqın qəhrəmanlığını, rəşadətini, şücaətini nümayiş etdirən bayramdır".

Şöhrəti aləmə yayılan "Nənələr" folklor ansamblı ölkəmizdə etnik azlıqlara, onların tarixinə, mədəniyyətinə göstərilən sayğıya parlaq nümunədir. Həmişə olduğu kimi, bu dəfə də onların oxuduqları nəğmələr hərarətlə qarşılandı.

"Cəngi" musiqisi altında çatılan Novruz tonqalı bayrama yeni çalar qatdı:

Zərdüştlərin ruhu tək

Alovlan, ərşə dirən.

Yurdumuzdan zülmətlər

Qoy düşsün pərən-pərən.

Lənkəran son illər inkişaf etmiş, daha abad və yaraşıqlı olmuşdur. Prezident İlham Əliyev Lənkərana səfərində burada görülən işləri bəyəndiyini dəfələrlə qeyd edib: "Lənkəranda mən dəfələrlə olmuşam, bölgəyə bu səfərimdən çox məmnunam. Şadam ki, Lənkəranda yenə də böyük inkişaf və dəyişiklik görürəm. Xüsusən, rayonun abadlaşdırılması sahəsində aparılan işlər razılıq doğurur... Bütün bu işlər Lənkəranın keçmiş şöhrətini özünə qaytarır".

Qara zurnanın sədaları altında Kosa, Keçəl və Bahar qız faytonda meydana daxil olurlar. Kosa ilə Keçəlin deyişməsi başlayır:

- A kosa-kosa, gəlsənə!

Gəlib salam versənə!

Çömçəni doldursana!

Kosanı yola salsana!

- A uyruğu, uyruğu,

Saqqalı it quyruğu.

Kosam bir oyun eylər,

Quzunu qoyun eylər.

Yığar bayram düyüsün,

Keçəlin toyun eylər.

Tonqalın ətrafında şənlik iştirakçılarının rəqsi davam edir. Bahar qız tamaşaçıları təbrik edir:

- Əzizlərimiz! Sizi Novruz bayramı münasibəti ilə təbrik edirəm! Ömrünüz bahar çiçəkləri kimi təravətli və ətirli olsun!

Sonra Kosa, Keçəl və Bahar qız tamaşaçılarla rəqs edirlər. İdmançılar, meydan qəhrəmanları tonqal üstündən atılırlar.

Lənkəranda 300 nəfərdən ibarət rus icması fəaliyyət göstərir. Onlar da Novruz şənliklərində iştirak edir, sevinir, deyib-gülürlər. İcmanın sədri Lidiya Karyagina bildirdi ki, icmanın üzvlərinin hamısı Lənkəranda doğulub boya-başa çatıb. Elə buna görə də Novruz hər birimiz üçün doğmadır, əzizdir. Onunla tədbirə gəlmiş Marina Kositsinanı və oğlanları Vitya və Vadimi bizə təqdim edir.

Onu da qeyd edək ki, Novruzla bağlı martın 13-də Lənkəranda dəmir yolu vağzalı meydanında böyük yarmarka keçirilib. 30 firma və şirkət 200 tondan çox ərzaq məhsullarını bazar qiymətindən 20-30 faiz aşağı qiymətə satıb. Şəhər icra hakimiyyəti imkansız, kimsəsiz ailələri, şəhid ailələrini, Qarabağ əlillərini, veteranları bayram sovqatı ilə təbrik edib. Lənkəran sabaha inamla addımlayır. Baharın gəlişi ilə təbiət oyanır, insanların ürəyində yeni arzular cücərir.

Seyran CAVADOV

Azərbaycan.- 2010.- 19 mart.- S. 6.