Moskva Linqvistika Universitetinin Azərbaycan Dili və Mədəniyyəti Mərkəzində Novruz bayramı qeyd edilmişdir

Moskva Dövlət Linqvistika Universitetinin Azərbaycan Dili və Mədəniyyəti Mərkəzində bahar bayramı Novruza həsr edilmiş tədbir keçirilmişdir.

Bu ali məktəbin tərcümə fakültəsinin Azərbaycan dili müəllimi, Bakı Slavyan Universitetinin professoru Bella Musayeva tədbir iştirakçılarını salamlayaraq demişdir ki, Novruz ən humanist ənənələri təcəssüm etdirir. Azərbaycan xalqının ən əziz bayramlarından olan Novruz uğur, dostluq və səmimiyyət rəmzidir. Təsadüfi deyildir ki, BMT-nin Baş Məclisi Novruz bayramının beynəlxalq miqyasda qeyd edilməsini qərara almışdır.

Universitetdə Azərbaycan dilini öyrənən tələbələr Novruz mövzusunda səhnəciklər göstərmiş, Bakı haqqında Azərbaycan dilində şeirlər və xalq mahnılarımızı oxumuşlar. Tələbə İlya Ostaşko Molla Pənah Vaqifin və Cabir Novruzun sözlərinə özünün bəstələdiyi mahnıları ifa etmişdir. Bahar qız rolunda çıxış edən tələbə Mariya Ryabova tədbir iştirakçılarının xüsusi rəğbətini qazanmışdır.

Səhnədə quraşdırılmış monitorda Bakıda, İçərişəhərin Qoşa Qala qapısı ətrafında bayram şənliyindən çəkilmiş fraqmentlər nümayiş etdirilmişdir. Qonaqlara Novruz bayramı münasibətilə hazırlanan ənənəvi şirniyyat təklif edilmişdir.

MDB ölkələrinin və Baltikyanı dövlətlərin dillərini öyrənən tələbələr, həmçinin universitetin professor-müəllim heyətinin nümayəndələri ürək sözlərini söyləmiş, şənlik iştirakçılarını bayram münasibətilə təbrik etmişlər.

Qeyd etmək lazımdır ki, universitetin tələbələri iki il ərzində Azərbaycan dilinin öyrənilməsi sahəsində ciddi uğurlar qazanmış, xalqımızın dilini və mədəniyyətini sevmişlər. Gülhüseyn Hüseynoğlunun "Azərbaycan dili haqqında lirik düşüncələr" adlı mənsur şeirində dilimizə sevgi hissləri çox səmimi təsir bağışlamışdır. Yeri gəlmişkən, bu şeirləri rus dilinə tələbələr özləri tərcümə etmişlər.

Asya HACIZADƏ,

AzərTAc-ın xüsusi müxbiri

Moskva

Azərbaycan.- 2010.- 21 mart.- S. 8.