Daşkənddə öz işinə başlayan Asiya İnkişaf Bankı Direktorlar Şurasının 43-cü illik iclasında Azərbaycanın iqtisadi uğurları yüksək qiymətləndirilmişdir

Özbəkistanın paytaxtı Daşkənddə Asiya İnkişaf Bankı (AİB) Direktorlar Şurasının 43-cü illik iclası işə başlamışdır.

İclasda Azərbaycanı maliyyə naziri Samir Şərifovun rəhbərliyi ilə nümayəndə heyəti təmsil edir.

Forum çərçivəsində AİB-nın prezidenti Xaruxiko Kuroda yerli və xarici jurnalistlər üçün keçirdiyi mətbuat konfransında bankın son vaxtlar Asiya ölkələrində həyata keçirdiyi böyük layihələr haqqında məlumat vermişdir. Onun sözlərinə görə, 2009-cu ildə üzv ölkələrin iqtisadiyyatına 16 milyard dollar vəsait qoyulmuşdur. Bu vəsait əsasən səhiyyənin, təhsilin, infrastrukturların möhkəmləndirilməsi və digər mühüm sahələrin inkişafına xərclənmişdir. Bankın rəhbəri demişdir ki, hazırda maliyyə-iqtisadi böhrandan əziyyət çəkən olkələrdə bərpa prosesi başlanmışdır.

AİB-nın prezidenti Xaruxiko Kuroda Azərbaycanda aparılan uğurlu iqtisadi siyasətin nəticələrini yüksək qiymətləndirmişdir. O bildirmişdir ki, Azərbaycan Mərkəzi Asiya və Qafqaz dövlətləri arasında ən yüksək sürətlə inkişaf etmiş ölkəyə çevrilmişdir və bu istiqamətdə uğurlu layihələr həyata keçirilir.

Qulu KƏNGƏRLİ,

AzərTAc-ın xüsusi müxbiri

Daşkənd

Azərbaycan.- 2010.- 4 may.- S. 6.