Güllələnmiş heykəllərin fəryadı

Minlərlə günahsız insanın qanını tökməklə kifayətlənməyən erməni cəlladları cansız heykəlləri də gülləbaran etdilər. Çox qəribədir, düşmən əsirliyindən azad edilmiş, Vətənə, doğmalar arasına gətirilən "yaralı" Xan qızının, Üzeyir bəyin, böyük nəğməkar Bülbülün üzlərində donmuş ifadə elə bil bu gün daha təsirli görünür.

Sanki qəmli Natəvanın baxışları uzaqlara dikilib, həsrətdən üzülübmüş kimi.

Varımdı sinədə dərdü-qəmü nəhan ölürəm,

Fəda olum sənə, gəl eylə imtəhan, ölürəm –

demək istəyir.

Erməni mənəviyyatsızlığına, qəddarlığına yaxşı bələd olan Üzeyir bəy də fikrə dalıb. Gözləri bu günün Koroğlusunu, onun qoç dəlilərini axtarır. Həmişə şaqraq cəh-cəhləri ilə könülləri riqqətə gətirən nəğməkar Bülbül də dərin xəyaldadır. Donmuş dodaqları elə bil bu saat "Sənsiz" fəryadı çəkəcək. Güllələnmiş heykəllərdən göründüyü kimi, erməni cəlladları dünyanın heç bir xalqına mənsub olmayan vəhşilik törətməkdən, cansız heykəlləri bərbad hala gətirməkdən belə çəkinməmişlər. Təəssüf ki, işğal olunmuş torpaqlarımızda yüzlərlə belə qiymətli heykəlin, milli memarlıq abidələrinin, qiymətli muzey əşyalarının taleyi hələ də düşmən əlindədir...

Zəkurə Quliyeva

Azərbaycan.- 2010.- 8 may.- S. 14.