"Əməkdar hüquqşünas" fəxri adı təntənəli şəraitdə təqdim olunmuşdur

Məhkəmə-Hüquq Şurasında keçirilən tədbirdə əsası ümummilli lider Heydər Əliyev tərəfindən qoyulmuş mütərəqqi hüquqi islahatların həyata keçirilməsində səmərəli fəaliyyətlərinə və vəzifələrini nümunəvi yerinə yetirdiklərinə görə dövlətimizin başçısı tərəfindən "Əməkdar hüquqşünas" fəxri adına layiq görülmüş bir qrup hüquqşünasa fəxri adlar təqdim olunmuşdur.

Tədbirdə çıxış edən Məhkəmə-Hüquq Şurasının sədri, ədliyyə naziri Fikrət Məmmədov demişdir ki, milli dövlətçiliyimizin qurucusu Heydər Əliyev müasir hüquq sistemimizin də müəllifidir. Onun bilavasitə rəhbərliyi ilə həyata keçirilən çoxşaxəli hüquqi islahatların müsbət nəticələri göz qarşısındadır. Əbədiyaşar liderimizin dövlət inkişafı kursunun Prezident İlham Əliyevin rəhbərliyi ilə uğurla davam etdirildiyini söyləyən nazir "Əməkdar hüquqşünas" fəxri adına layiq görülmüş hüquqşünaslara bu yüksək təltifin məhz Heydər Əliyevin doğum günü təqdim olunduğunu vurğulamışdır.

Sonra "Əməkdar hüquqşünas" fəxri adının vəsiqəsi və döş nişanı təntənəli təqdim edilmişdir.

Bu fəxri ada layiq görülmüş hüquqşünaslar çıxış edərək onların fəaliyyətinə verilmiş yüksək qiymətə görə Prezident İlham Əliyevə dərin minnətdarlıqlarını ifadə etmiş, təqdimetmə mərasiminin bu əlamətdar gündə keçirilməsinin üzərlərinə böyük məsuliyyət qoyduğunu söyləmişlər. Təltif olunanlar Heydər Əliyevin tərəqqipərvər ideyalarının və yüksək amallarının həyata keçirilməsi üçün bundan sonra da əzmlə çalışacaqlarına söz vermişlər.

AzərTAc

Azərbaycan.- 2010.- 12 may.- S. 6.