Serbiya Prezidenti Boris Tadiç Milli Məclisdə olmuşdur

Azərbaycanda rəsmi səfərdə olan Serbiya Respublikasının Prezidenti Boris Tadiç mayın 13-də Milli Məclisə gəlmişdir.

Parlamentin binası önündə ali qonağı Milli Məclisin Sədri Oqtay Əsədov və digər rəsmi şəxslər qarşılamışlar.

Serbiya Prezidenti Milli Məclisin iclas salonuna baxmış, parlamentin binasındakı Heydər Əliyev Xatirə zalında olmuşdur. Burada qonağa ümummilli liderin həyat və fəaliyyəti, xarici ölkə rəhbərlərinin, dövlət və hökumət üzvlərinin müxtəlif illərdə Azərbaycana səfərləri zamanı Heydər Əliyevlə görüşlərini əks etdirən fotoşəkillər, tarixi sənədlər, eləcə də Azərbaycan parlamentinin formalaşmasında və xarici ölkə parlamentləri ilə əlaqələrin qurulmasında ulu öndərin xidmətləri barədə məlumat verilmişdir.

Sonra Milli Məclisin Sədri Oqtay Əsədov ilə Serbiya Prezidenti Boris Tadiçin görüşü olmuşdur.

Oqtay Əsədov ölkələrimiz arasında əlaqələrin qədim tarixindən danışmış, müstəqilliyimizi bərpa etdikdən sonra münasibətlərimizin yeni müstəvidə inkişaf etdiyini bildirmiş və bunu müsbət dəyərləndirmişdir. Milli Məclisin Sədri bildirmişdir ki, münasibətlərimizin belə yüksək səviyyəyə çatmasında dövlətlərimizin başçılarının müstəsna xidmətləri vardır. Dövlətlərimizin başçılarının siyasi iradəsi bütün sahələrdə əməkdaşlığımızın genişlənməsinə təkan verəcəkdir. Hesab edirik ki, parlament sədrlərinin, eləcə də digər dövlət və hökumət üzvlərinin qarşılıqlı səfərləri hər iki tərəfə fayda gətirəcəkdir. Sizin bu səfəriniz zamanı imzalanmış sənədlər də əməkdaşlığımızın hərtərəfli inkişafı üçün möhkəm hüquqi baza yaratmışdır.

Milli Məclisin Sədri dövlətlərimiz arasındakı münasibətlərin möhkəmlənməsində parlamentlərin rolunu qeyd etmiş, hər iki ölkənin parlamentində dostluq qruplarının yaradıldığını bildirmişdir.

Ermənistan-Azərbaycan, Dağlıq Qarabağ münaqişəsi barədə məlumat verən Oqtay Əsədov bu məsələdə Azərbaycanın haqlı mövqeyini və ərazi bütövlüyünü dəstəklədiyinə görə Serbiyanın dövlət başçısına minnətdarlıq etmiş, həmin siyasətin dəyişməyəcəyinə ümidvar olduğunu bildirmişdir.

Prezident Boris Tadiç Azərbaycanda olmaqdan məmnun qaldığını vurğulamış və demişdir: "Bu, mənim Serbiya Prezidenti kimi Azərbaycana ilk səfərimdir. Bu, həm də o deməkdir ki, biz tarix yazırıq. Səfərimizin əsas məqsədi sadəcə, xalqlarımızın üzləşdiyi problemləri müzakirə etmək deyil, həm də əməkdaşlığımızın daha da genişləndirilməsinə dair fikir mübadiləsi aparmaqdır".

Ali qonaq bildirmişdir ki, Serbiyada və Azərbaycanda çoxlu sayda millətlər, xalqlar, dinlər və təriqətlər vardır. Biz slavyan dil qrupuna daxil olsaq da, dilimizdə çoxlu türk sözləri vardır. Bu bizi daha da yaxınlaşdırır. Serbiya Prezidenti dost ölkələrimiz arasında əlaqələrin inkişafı üçün bundan sonra da əlindən gələni əsirgəməyəcəyini bildirmişdir.

Dağlıq Qarabağ münaqişəsinə toxunan qonaq demişdir ki, Serbiya Azərbaycanın ərazi bütövlüyünü daim dəstəkləyəcəkdir. Bu bizim üçün prinsip məsələsidir.

Prezident Boris Tadiç parlamentlərin rolundan danışaraq qanunverici orqanlar arasında əməkdaşlığı yüksək dəyərləndirmiş, Azərbaycan parlamentinə gələcək fəaliyyətində uğurlar arzulamışdır.

AzərTAc

Azərbaycan.- 2010.- 14 may.- S. 3.