Yeni Azərbaycan Partiyasının Gəncədə keçirdiyi respublika müşavirəsi başa çatmışdır

Yeni Azərbaycan Partiyasının şəhər və rayon təşkilatları sədrlərinin Gəncədə keçirilən respublika müşavirəsi başa çatmışdır.

Tədbirin ikinci günü YAP Gəncə şəhər təşkilatının iş təcrübəsinin öyrənilməsi və təbliği, eləcə də qarşıdan gələn parlament seçkilərinə partiyadaxili hazırlığın vəziyyəti müzakirə edilmişdir.

Yeni Azərbaycan Partiyasının sədr müavini - icra katibi Əli Əhmədov işgüzar şəraitdə keçən müşavirənin gələcək fəaliyyət üçün əhəmiyyətindən danışmış, 500 min nəfərdən artıq üzvü olan bu siyasi qurumun ölkənin inkişafındakı rolu və mövqeyi barədə ətraflı məlumat vermişdir.

Sonra YAP Gəncə şəhər təşkilatının sədri İsrafil İsmayılov videoçarxın köməyi ilə rəhbərlik etdiyi təşkilatın iş üsulları, onun üzvlərinin respublikanın, eləcə də şəhərin ictimai-siyasi həyatındakı rolunun yüksəldilməsi istiqamətində həyata keçirilən tədbirlərlə bağlı məruzə ilə çıxış etmişdir.

Əli Əhmədov qarşıdan gələn parlament seçkilərinə hazırlıqla əlaqədar görüləsi işlərdən danışmış, respublikamızın həyatında mühüm hadisəyə çevriləcək bu siyasi kampaniyada Yeni Azərbaycan Partiyasının nailiyyət qazanması üçün həlli vacib məsələləri diqqətə çatdırmışdır.

Müşavirə iştirakçıları aparılan müzakirələrdə fəallıqla iştirak etmiş, təkliflərini bildirmişlər.

Əli Əhmədov müşavirəyə yekun vurmuşdur.

AzərTAc

Azərbaycan.- 2010.- 16 may.- S. 2.