ATƏT Parlament Assambleyasının sessiyaları davam edir

Almatıda ATƏT-in "Avrasiya ölçüsü" Parlament Forumu və qurumun sessiyası mayın 15-də davam etmişdir. Azərbaycan Milli Məclisinin deputatlarının da iştirak etdiyi tədbirdə ekoloji problemlər, bazar iqtisadiyyatına aid məsələlər müzakirə olunmuşdur.

"Avrasiya: inkişaf edən bazarlar və artan çağırışlar" mövzusunda məruzələr dinlənilmiş, iqtisadi inkişaf, ticarət, resursların idarə edilməsi, ekoloji problemlər ətrafında müzakirələr aparılmışdır.

Çıxışlarda Mərkəzi Asiyada yerləşən su hövzələrinin və su ehtiyatlarının səmərəsiz və mübahisəli istifadəsindən, eləcə də Xəzər dənizinin çirklənməsindən narahatlıq ifadə olunmuşdur.

Azərbaycan nümayəndə heyətinin üzvü, Milli Məclisin Aqrar siyasət komitəsinin sədri Eldar İbrahimov qlobal maliyyə böhranı şəraitində Azərbaycanın iqtisadi inkişafı barədə ətraflı məlumat vermişdir. O demişdir ki, Azərbaycan özünün neft və qaz ehtiyatlarından səmərəli istifadə edir və ölkəmizin iqtisadi böhranla üzləşməməsini şərtləndirən əsas amillərdən biri də budur.

Tədbirdə Azərbaycanın dünyanın bir çox neft və qaz şirkətləri ilə sıx əməkdaşlıq etdiyi, zəngin təbii ehtiyatları, beynəlxalq ticari əlaqələrinin genişlənməsi xüsusi vurğulanmışdır. Azərbaycanda alternativ enerji mənbələrindən istifadə barədə də iştirakçılara məlumat verilmişdir. Ermənistanın Azərbaycan təbiətinə, mədəni irsinə vurduğu ziyan, o cümlədən meşə zolaqlarının məhv edilməsi, Azərbaycan çaylarına ermənilər tərəfindən zəhərli maddələrin axıdılması da diqqətə çatdırılmışdır.

Azərbaycan.- 2010.- 16 may.- S. 2.