Yaponiya-Azərbaycan investisiya forumu keçirilmişdir

Tokio şəhərində Azərbaycan Respublikası ilə Yaponiya arasında iqtisadi əməkdaşlıq üzrə Dövlət Komissiyasının 6-cı iclası çərçivəsində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Yaponiya-Azərbaycan investisiya forumu keçirilmişdir.

Nazirliyin mətbuat xidmətindən bildirmişlər ki, tədbirdə Azərbaycan və Yaponiya tərəfindən dövlət rəsmiləri ilə yanaşı, kənd təsərrüfatı, bankçılıq, turizm, ticarət, əczaçılıq, tikinti, sənaye, nəqliyyat və digər sahələrdə fəaliyyət göstərən 200-ə yaxın iş adamı iştirak etmişdir.

İnvestisiya forumunda Komissiyanın həmsədrləri - Azərbaycan Respublikası Baş nazirinin müavini Abid Şərifov və "ITOCHU" Korporasiyasının prezidenti Akiro Yokota çıxış etmişlər.

Azərbaycanı təmsil edən dövlət rəsmiləri ölkəmizin iqtisadi potensialı, o cümlədən alternativ və bərpa olunan enerji resursları, kənd təsərrüfatı məhsullarının istehsalı və emalı, turizm və digər sahələrin inkişaf perspektivləri, AZPROMO-nun prezidenti Adil Məmmədov isə Azərbaycanın biznes imkanları və investisiya mühiti ilə bağlı təqdimatlarla çıxış etmişlər.

Forumun rəsmi hissəsindən sonra iş adamları arasında görüşlər keçirilmişdir. Görüşlərdə sahibkarlar arasındakı mövcud əlaqələr və əməkdaşlığın daha da genişləndirilməsi imkanları müzakirə edilmişdir.

Azərbaycan.- 2010.- 19 may.- S. 4.