Ermənistanın işğal siyasətinə beynəlxalq aləmdə etiraz güclənir

Zəbt olunan Dağlıq Qarabağda separatçı rejimin keçirdiyi "seçki"ni dünya ictimaiyyəti qətiyyətlə pisləyir

Beynəlxalq hüquq müstəvisində Ermənistanın işğalçı dövlət olduğunu tam şəkildə sübuta yetirən, bu ölkə üzərində ciddi diplomatik qələbə qazanan Azərbaycanın sözügedən sahə üzrə fəaliyyətini daha da genişləndirməsi qarşı tərəfdə böyük narahatlığa, təşvişə yol açmaqdadır. Çünki Azərbaycanın uğurla həyata keçirdiyi hücumçu diplomatiya sayəsində Ermənistanın onsuz da yaxşı olmayan beynəlxalq imici daha bərbad vəziyyətə düşməkdə, onun işğalçı ölkə, terroru, soyqırımı tarix boyu siyasətinin əsas elementi olaraq istifadə etdiyindən dünya daha dolğun faktlar, sübutlar əsasında xəbərdar olur. Məsələyə diplomatiya, beynəlxalq hüquq kontekstindən yanaşıldıqda kifayət qədər aydın görünür ki, Ermənistan, sözün əsl mənasında, küncə sıxışdırılmış vəziyyətdədir və bu dövlətin Dağlıq Qarabağ münaqişəsi ilə əlaqədar dünyanı aldatmağa xidmət edən yalançı manevrlərinə artıq yer qalmayıb.

Beynəlxalq hüququn norma və prinsiplərini kobud şəkildə pozan "seçki"

İndi dünya birmənalı şəkildə Ermənistanın Azərbaycan ərazilərini işğal etməsi faktını qəbul edir, beynəlxalq hüquq normalarına uyğun olaraq onu işğal altında saxladığı əraziləri azad etməyə çağırır. BMT, Avropa Şurası və digər nüfuzlu beynəlxalq təşkilatların qəbul etdikləri müvafiq qətnamələrdə, o cümlədən münaqişənin dinc yolla çözülməsi üçün vasitəçilik missiyasını yerinə yetirən ATƏT-in Minsk qrupunun irəli sürdüyü həll variantlarında Ermənistanın işğalçı dövlət kimi təqdim olunması bunun faktiki sübutudur. Lakin dünya birliyi Ermənistanı işğalçı dövlət qismində qəbul etməsinə baxmayaraq, sözügedən ölkə hələ də Azərbaycan ərazilərindən öz silahlı qüvvələrini çıxarmağa tələsmir, burada yaratdığı separatçı rejimə hərtərəfli dəstəyini davam etdirir, hətta onun fəaliyyətinə hüquqi don geyindirməyə çalışır. Elə mayın 23-də qanlı işğal nəticəsində Dağlıq Qarabağda yaradılmış separatçı rejimin keçirdiyi "parlament seçkisi" də bu qəbildən olan növbəti cəhddən başqa bir şey deyil.

Ermənilər zəbt olunmuş ərazilərdə bundan əvvəl də analoji "seçki" şouları təşkil etmişdilər. Lakin bunun adi "seçki tamaşası"ndan başqa bir şey olmadığına sonda özləri də şahid olmuşdular. Bu dəfə də vəziyyət istisnalıq təşkil etmir. Əksinə, analoji hallar Ermənistanın işğalçı siyasətinin ifşa edilməsinə təkan verən məqamlardan biri kimi çıxış edir. Bunu işğal edilmiş ərazilərdə keçirilən qanunsuz "seçki"nin dünya miqyasında növbəti dəfə sərt şəkildə tənqid obyektinə çevrilməsi də təsdiq edir.

Bu məsələyə Azərbaycan tərəfindən də kifayət qədər sərt reaksiya verilib. Xarici İşlər Nazirliyinin bəyanatında bildirilir ki, Azərbaycanın işğal olunmuş ərazilərindəki tanınmamış separatçı rejim azərbaycanlı əhalinin etnik təmizlənməsi əsasında Ermənistan tərəfindən təşkil olunmuş qanunsuz qurumdan başqa bir şey deyil: "Qondarma "seçkilər" Ermənistanın anneksiya siyasətini ört-basdır etmək məqsədilə keçirilir və Azərbaycanın ərazilərinin davam etməkdə olan işğalının nəticələrinin möhkəmləndirilməsinə yönəlmişdir.

Bu kimi "seçkilər"in keçirilməsi Azərbaycan Respublikasının Konstitusiyasının müvafiq müddəalarını və beynəlxalq hüququn norma və prinsiplərini kobud şəkildə pozur, çünki sözügedən "seçkilər" Dağlıq Qarabağın əzəli azərbaycanlı əhalisi olmadan aparılır və beləliklə, heç bir hüquqi qüvvəyə malik deyildir.

Azərbaycan Respublikasının Dağlıq Qarabağ bölgəsində keçirilən hər hansı seçkilər yalnız o vaxt ədalətli və azad qiymətləndirilə bilər ki, oradan qovulmuş azərbaycanlı əhali həmin seçkilərin keçirilməsində bütünlüklə, birbaşa və bərabər şəkildə bölgənin erməni əhalisi ilə bərabər qanuni və demokratik seçkilərdə iştirak etsinlər. Bu cür seçkilərin keçirilməsi yalnız erməni işğalçı qüvvələrinin işğal olunmuş ərazilərdən çıxarılması, bölgədə həyatın normallaşdırılması, Dağlıq Qarabağın erməni və azərbaycanlı icmaları arasında dialoq və əməkdaşlığın bərpası üçün zəruri şəraitin yaradılmasından sonra mümkün olacaqdır".

Mərkəzi Seçki Komissiyası tərəfindən qəbul edilmiş bəyanatda da Ermənistanın Azərbaycan Respublikası ərazilərinin 20 faizindən çoxunu işğal etdiyi, etnik təmizləmə apararaq bir milyondan artıq azərbaycanlı əhalinin həmin ərazilərdən çıxarıldığı bildirilir: "Ermənistan Azərbaycan ərazilərində Azərbaycan Respublikası vətəndaşlarının əsas insan hüquq və azadlıqlarını pozub "Dağlıq Qarabağ Respublikası" deyilən qondarma bir qurum yaradaraq orada dəfələrlə seçki görüntüsü yaratmağa cəhd edib. Azərbaycanın işğal altında olan torpaqlarında yeni seçki oyunu beynəlxalq hüquq normalarına, Azərbaycan Respublikasının Konstitusiyasına və qanunlarına tamamilə ziddir. Bu həm də Ermənistanın siyasi hakimiyyət dairələrinin işğalın əsl mahiyyətini və səbəblərini artıq dərk etməkdə olan beynəlxalq ictimaiyyəti və dünya dövlətlərini çaşdırmaq, sülh danışıqlarına əngəl törətmək cəhdidir".

Bəyanatda bildirilir ki, işğal altında olan ərazilərdə seçkilər və referendumlar yalnız həmin torpaqlar azad edildikdən, Azərbaycanın ərazi bütövlüyü tam bərpa olunduqdan və həmin ərazilərdə yaşamış insanlar öz daimi yaşayış yerlərinə qayıtdıqdan sonra Azərbaycan Konstitusiyasına və qanunlarına əsasən keçirilə bilər: "MSK Azərbaycan dövlətinin suverenliyinə və ərazi bütövlüyünə qarşı yönəlmiş belə "seçkiləri" qanunsuz hesab edir və tanımır, beynəlxalq ictimaiyyəti də buna çağırır".

Azərbaycanın BMT-dəki daimi nümayəndəsi, səfir Aqşin Mehdiyev isə işğal olunmuş ərazilərimizdə vəziyyətlə bağlı BMT Baş Assambleyasına və Təhlükəsizlik Şurasına məktub ünvanlayıb. Məktubda bildirilir ki, Ermənistanın başladığı silahlı münaqişə nəticəsində Azərbaycan ərazisinin beşdə biri işğal olunub, təxminən hər səkkiz adamdan biri qaçqın və ya məcburi köçkünə çevrilib: "Bu münaqişə zamanı ən ağır beynəlxalq cinayətlər törədilib. Ermənistan Azərbaycanın ərazisini işğal etmək, Ermənistanın siyasi, hərbi, iqtisadi dəstəyi sayəsində mövcud olan etnik separatist qurum yaratmaq üçün hərbi güc tətbiq edib. Beynəlxalq səviyyədə qəbul olunub ki, Azərbaycanın əraziləri işğal altındadır, müvafiq beynəlxalq hüquq normalarına əsasən Ermənistan işğalçı dövlətdir".

O da bildirilir ki, Ermənistanın işğalçılıq siyasəti və təcrübəsi, həmçinin Azərbaycanın işğal olunmuş ərazilərindəki qanunsuz hərəkətləri göstərir ki, Ermənistan həmin ərazilərin anneksiyasını davam etdirmək niyyətindədir: "Birinci dəfə deyil ki, Ermənistan Respublikası açıq-aşkar BMT Nizamnaməsinin, beynəlxalq hüququn fundamental prinsiplərinin, həmçinin Azərbaycan Respublikasının Konstitusiyasının və milli qanunvericiliyinin ziddinə olaraq, Azərbaycanın işğal olunmuş Dağlıq Qarabağ bölgəsində qondarma "seçki" keçirir. Demokratiyanı zorla təbliğ etmək olmaz və qanunsuzluqla qanuni hüquqlar yaratmaq mümkün deyil. Burada isbata ehtiyac yoxdur. Buna görə də davam edən təcavüz, işğal və Azərbaycanın işğal olunmuş ərazilərində etnik təmizləmə fonunda təşkil olunmuş hər hansı səsvermə prosesi hüquqi cəhətdən etibarlı sayıla bilməz və beynəlxalq hüquqda Azərbaycan ərazisi kimi qəbul olunmuş bu ərazilərin əvvəlki hüquqi statusuna ziyan vurur".

Dünya ictimaiyyətindən "seçki tamaşası"na sərt etiraz

Azərbaycanın işğal edilmiş ərazilərində keçirilən "seçki tamaşası"na dünya ictimaiyyəti, beynəlxalq təşkilatlar tərəfindən də sərt etiraz nümayiş etdirilir. Qardaş Türkiyə ilk olaraq bununla bağlı sərt mövqe nümayiş etdirib. Türkiyənin Xarici İşlər Nazirliyinin Dağlıq Qarabağ separatçılarının keçirməyə hazırlaşdığı "parlament seçkisi"ni pisləyən sərt bəyanatında rəsmi Ankaranın bu "seçki"ni tanımadığı bildirilir: "Azərbaycanın işğal olunmuş ərazilərində beynəlxalq hüquq normaları kobud şəkildə pozulur".

Sənəddə o da göstərilir ki, separatçıların bu əməlləri BMT Təhlükəsizlik Şurasının qətnamələrinə və ATƏT-in Minsk qrupunun prinsiplərinə ziddir: "Türkiyə Azərbaycanın ərazi bütövlüyünü dəstəkləyir və onun işğal olunmuş torpaqlarında "parlament seçkisi"nin keçirilməsini yolverilməz sayır. Bu "seçki"nin heç bir hüquqi əsası yoxdur və onun nəticələri tanınmayacaq".

Avropa İttifaqı da separatçı rejimin keçirdiyi "parlament seçkisi"ni qanunsuz adlandırıb. Qurumun Xarici Əlaqələr üzrə nümayəndəsi Ketrin Eştonun yaydığı bəyanatda qeyd edilir ki, həmin seçkinin heç bir qanuni əsası olmayacaq: "Bu seçki Qarabağ sülh danışıqlarının nəticəsini bəri başdan müəyyən etməməlidir". Ketrin Eşton daha sonra qeyd edib: "Mən xatırlatmaq istəyirəm ki, Avropa İttifaqı Dağlıq Qarabağda keçirilən "parlament seçkiləri"ni hüquqi və konstitusiya çərçivəsində tanımır".

ABŞ Dövlət Departamenti isə bəyan edir ki, Birləşmiş Ştatlar daxil olmaqla dünyanın heç bir dövləti "Dağlıq Qarabağ Respublikası" və orada mayın 23-də keçirilən "parlament seçkiləri"ni tanımır. Bildirilir ki, Birləşmiş Ştatlar ATƏT-in Minsk qrupunun münaqişənin dinc yolla nizamlanması üsullarının tapılması səylərini dəstəkləyir. Minsk qrupu həmsədrlərindən biri kimi, ABŞ münaqişə tərəfləri olan Ermənistan və Azərbaycanla işləyərək Helsinki Yekun Aktının zorakılıqdan çəkinmə, öz müqəddəratını təyinetmə və ərazi bütövlüyünün qorunması prinsiplərinə əsaslanaraq münaqişənin uzunmüddətli həlli yolunu axtarır.

Avropa İttifaqı işğal olunmuş ərazilərdən Ermənistan silahlı qüvvələrinin çıxarılmasını tələb edir

Azərbaycan diplomatiyasının Dağlıq Qarabağ münaqişəsi ilə əlaqədar daha bir uğuru isə beynəlxalq miqyasda Ermənistana işğal etdiyi ərazilərdən öz silahlı qüvvələrini çıxarmasına dair müraciətlərin sayının çoxalması və bunun konkret rəsmi sənədlərdə əksini tapmasıdır. Bu kontekstdə isə Avropa Parlamentinin Cənubi Qafqazla bağlı qəbul etdiyi "Avropa İttifaqının Cənubi Qafqazda strategiyasına tələb" adlı yeni qətnamə xüsusi diqqət cəlb edir. Bolqarıstandan olan deputat Yevgeni Kirillovun hazırladığı qətnamədə bildirilir ki, Azərbaycan, Ermənistan və Gürcüstan 2004-cü ildən Avropa Qonşuluq Siyasəti çərçivəsində Avropa İttifaqı ilə tərəfdaşlıq etsələr də, bölgə ilə bağlı kompleks regional strategiya mövcud deyil. Bildirilir ki, Avropa İttifaqı Dağlıq Qarabağ və Gürcüstandakı münaqişələrlə əlaqədar bu regionla münasibətində mürəkkəb geosiyasi situasiya ilə üzləşir, həmçinin Ermənistan-Türkiyə münasibətlərində də gərginlik mövcuddur. Regionda münaqişəli situasiyaların qəbulolunmazlığını bildirən Avropa Parlamenti Ermənistanı öz silahlı qüvvələrini işğal etdikləri Azərbaycan torpaqlarından çıxarmağa çağırır. Qətnamədə bildirilir ki, münaqişələrin mövcudluğu iqtisadi və sosial inkişaf qarşısında ən böyük maneədir. Bununla yanaşı, Avropa deputatları Dağlıq Qarabağ münaqişəsi zamanı və ya münaqişə ilə əlaqədar evlərini tərk edərək yüz minlərlə qaçqın və məcburi köçkünlərin didərgin qalmaları faktı və onların geri qayıtmaq hüquqları da daxil olmaqla, hüquqlarının inkar olunması ilə əlaqədar öz ciddi narahatlıqlarını bildirirlər və bu hüquqların birmənalı və qeyd-şərtsiz tanınmasına çağıraraq onların təcili reallaşdırılmasını xüsusilə qeyd edirlər. Beləliklə, qarşıdan gələn aylar ərzində münaqişənin həlli cəhdlərinin sürətləndirilməsinə, beynəlxalq səviyyədə əsası olmayan və zor gücünə yaradılmış status-kvonun qorunub saxlanılmasından imtina etməyə çağıraraq Avropa Parlamenti bütün işğal olunmuş Azərbaycan torpaqlarından Ermənistanın silahlı qüvvələrinin çıxarılmasını tələb edir.

Onu da bildirək ki, Dağlıq Qarabağ üzrə qətnamə layihəsi BMT Baş Assambleyasının 64-cü və hətta növbəti 65-ci sessiyasının gündəliyində qalacaq. Bununla bağlı yayılan məlumata görə, BMT Baş Assambleyasının 65-ci sessiyasında Dağlıq Qarabağ münaqişəsi ilə bağlı iki məsələyə baxılacaq. Bunlardan biri "GUAM məkanında həlli uzadılan münaqişələr, onların beynəlxalq sülh, təhlükəsizlik və inkişafa təsiri", digəri isə "Azərbaycanın işğal olunmuş ərazilərində vəziyyət" adlı qətnamə layihələridir. BMT İnformasiya Mərkəzi bildirir ki, bu məsələlərə 64-cü sessiyada hələ baxılmayıb və onlar gündəlikdə durur. Onların 65-ci sessiyanın ilkin gündəliyinə salınması 64-cü sessiyada qəbul olunacaq qərarlardan asılıdır.

BMT-nin Avrasiya ölkələri üzrə eksperti Robert Katler qeyd edib ki, BMT bu vaxtadək Qafqaz regionunda həlli uzadılan münaqişələrin nizamlanmasına real töhfə verə bilməyib: "Bunu BMT-nin uğursuzluğu kimi qiymətləndirmək mühüm deyil, amma bu faktdır".

Mayın 20-də Tacikistanın paytaxtı Düşənbədə keçirilən İslam Konfransı Təşkilatı Xarici İşlər Nazirləri Şurasının 37-ci sessiyasının yekun iclasında isə Dialoq və Əməkdaşlıq uğrunda İslam Konfransı Gənclər Forumunun (İKGF) fəaliyyəti haqqında qətnamə qəbul edilib. Qətnamədə xüsusi bəndlə İKT üzv dövlətləri, həmçinin İKT-yə bağlı beynəlxalq institutlar "Xocalıya ədalət" kampaniyasının fəaliyyətində aktiv iştiraka və faciənin həm beynəlxalq, həm də milli səviyyədə insanlığa qarşı törədilmiş cinayət kimi tanınmasına çağırılıb. Sənəd BMT-dən sonra ikinci böyük beynəlxalq təşkilat olan İKT-yə üzv 57 dövlətin xarici siyasət idarələri rəhbərlərinin Xocalı faciəsinin miqyasının təyin edilməsi baxımından insanlığa qarşı törədilmiş cinayət ifadəsini özündə ehtiva edərək, hadisənin xarakteri haqqında birmənalı olaraq mövqe bildirən ilk qətnamədir. Qeyd olunan ifadə həm siyasi, həm də beynəlxalq-hüquqi tərkibə malikdir, beynəlxalq humanitar hüququn bir çox ciddi pozuntularını, o cümlədən genosid cinayətini əhatə edir.

Hesab olunur ki, sənədin konsensusla qəbul edilməsi, həmçinin buna qədər üzv ölkələrin XİN ekspertləri tərəfindən təsdiq edilməsi İKT-nin Xocalı faciəsinin həqiqi xarakteri haqqında əminliyinin güclənməsinin göstəricisidir. Bu sənəd Xocalı faciəsinə cari ilin yanvar ayında İKT Parlamentlər İttifaqı (İKT Pİ) tərəfindən verilən qiyməti təkrarlayır və ümumilikdə Xocalıdakı qətliamın İKT-yə üzv dövlətlərin parlamentləri tərəfindən insanlığa qarşı törədilmiş cinayət kimi tanınması, eləcə də tanınma haqda məsələnin beynəlxalq səviyyəyə qaldırılması üçün ciddi siyasi-hüquqi zəmin hazırlayır. Xatırladaq ki, "Xocalıya ədalət" beynəlxalq məlumat və təşviqat kampaniyasına 2009-cu ildə beynəlxalq səviyyədə start verilib. Hazırda kampaniyanın fəaliyyəti 35-dən artıq İKT və həmçinin Avropa və Latın Amerikası ölkələrini əhatə edir.

AŞ PA-da Dağlıq Qarabağ üzrə Alt Komitənin fəaliyyətinin bərpası Ermənistanı ciddi təşvişə salıb

Ermənistanın Dağlıq Qarabağ münaqişəsi ilə bağlı daha bir narahatlığı isə Avropa Şurası Parlament Assambleyasının (AŞ PA) Bürosunun Dağlıq Qarabağ üzrə Alt Komitəsinin fəaliyyətinin bərpa olunmasıdır. Xatırladaq ki, AŞ PA prezidenti Mövlud Çavuşoğlu da sözügedən komitənin fəaliyyətinin bərpa olunacağını bildirib. Çavuşoğlu AŞ PA sədri seçilənə qədər də Alt Komitənin yaradılması məsələsinin təşkilatın gündəmində olduğunu qeyd edib.

AŞ PA-nın Dağlıq Qarabağ məsələsi üzrə dəqiq mövqeyi 2005-ci ildə qəbul olunmuş 1416 saylı qətnamədə əksini tapıb. Xatırladaq ki, Ermənistanın Azərbaycana diplomatik məğlubiyyətinin əsas göstəricilərindən biri kimi qiymətləndirilən 1416 saylı qətnamə 2005-ci il yanvarın 25-də qəbul edilib. Bu qətnamə AŞ PA tərəfindən Ermənistanın işğalçılıq siyasətinə qarşı hüquqi müstəvidə atdığı ən ciddi zərbələrdən sayılır. Belə ki, burada yer alan müddəalar bir daha Ermənistanın işğalçı dövlət olduğunu təsdiqləyir, Dağlıq Qarabağ regionunun isə separatçı qüvvələrin nəzarəti altında olduğu vurğulanır. Bununla bağlı qətnamənin xülasə hissəsində qeyd olunur: "Azərbaycan ərazisinin böyük bir hissəsi hələ də Ermənistan qoşunlarının işğalı altındadır. Hərbi əməliyyatlar və bu əməliyyatlardan qabaq geniş surətdə yayılmış etnik düşmənçilik etnik mənsubiyyətinə görə insanların geniş miqyasda yerlərindən qovulmasına və dəhşətli etnik təmizləmə konsepsiyasını xatırladan monoetnik ərazilərin yaradılmasına gətirib çıxarmışdır. Dağlıq Qarabağ regionu hələ də separatçı qüvvələrin nəzarəti altındadır. Assambleya üzv dövlət tərəfindən xarici ərazinin işğal edilməsini bu dövlətin Avropa Şurası qarşısında götürdüyü öhdəliyinin ciddi pozulması halı olduğunu bir daha təkrar edir və münaqişə ərazisindən olan məcburi köçkünlərin təhlükəsizlik şəraitində və ləyaqətlə öz evlərinə qayıtmaq hüquqlarının olduğunu bir daha təsdiqləyir".

Bu qətnamənin ən mühüm cəhəti Ermənistanın Azərbaycan torpaqlarını işğal etməsinin Avropda fəaliyyət göstərən beynəlxalq təşkilat səviyyəsində ilk dəfə belə açıq etiraf edilməsi və bunun presedent yaratmasıdır. Kifayət qədər obyektiv xarakter daşıyan bu qətnamənin ardınca AŞ PA-nın qəbul etdiyi 1690 saylı tövsiyə Ermənistana daha bir zərbə oldu. Çünki Avropa Şurasının Nazirlər Komitəsinə ünvanlanan tövsiyələrdə bilavasitə 1416 saylı qətnamənin şərtlərinə istinad edilir. Qətnaməyə istinadən Nazirlər Komitəsinə ünvanlanan tövsiyələrin birinci bəndində qeyd olunur: "Müvafiq tərəfləri təkidlə BMT Təhlükəsizlik Şurasının 822, 853, 874 və 884 saylı qətnamələrinə əməl etməyə, xüsusilə istənilən hərbi əməliyyatlardan çəkinməyə və silahlı qüvvələri Azərbaycanın işğal edilmiş bütün ərazilərindən çıxarmağa çağırmaq". Həmçinin tövsiyələrdə 1416 saylı qətnamənin milli, ikitərəfli və beynəlxalq səviyyələrdə dəstəklənməsi üçün üzv dövlətlərin hökumətlərinə göndərilməsinə də diqqət yetirilir.

Onu da xatırladaq ki, AŞ PA Bürosunun Dağlıq Qarabağ üzrə Alt Komitəsi britaniyalı deputat lord Rassel Constonun AŞ PA sədri postuna seçildiyi günə kimi, yəni 2007-ci ilə qədər davam etdi. Düzdür, sonrakı dövrdə Rassel Conston AŞ PA-da Azərbaycan və Ermənistan nümayəndə heyətlərinin görüşünü təşkil etsə də, adıçəkilən komitə fəaliyyətsiz qaldı. İndi isə komitə yenidən fəaliyyətini bərpa edir və bu, ermənilərin ciddi narahatlığına səbəb olub. Məsələn, "Daşnaksütyun" partiyasının deputat fraksiyasının rəhbəri Vaan Ovannisyan bildirir ki, ölkə hakimiyyətinin Mövlud Çavuşoğlunun AŞ PA Bürosunun Dağlıq Qarabağ üzrə Alt Komitəsinin bərpası təklifinə konstruktiv yanaşması yolverilməzdir. Onun fikrincə, Alt Komitənin bərpası Ermənistan üçün faciəvi nəticələrə səbəb ola bilər: "Ermənistanın AŞ PA-dakı nümayəndə heyəti Mövlud Çavuşoğlunun təşəbbüsünün baş tutmaması üçün əlindən gələni etməlidir".

Hakim koalisiyada yer alan "Çiçəklənən Ermənistan" partiyası da sözügedən komitənin bərpasına etiraz edir. Bununla bağlı erməni deputat Naira Zoqrabyan bildirib ki, komitənin fəaliyyətinin bərpası Ermənistanın lehinə deyil: "Əgər Mövlud Çavuşoğlu Alt Komitənin bərpasına nail olsa, Ermənistanın AŞ PA-dakı nümayəndə heyəti onun işini birmənalı şəkildə boykot etməlidir".

Azərbaycan tərəfinin mövqeyi ondan ibarətdir ki, Ermənistan-Azərbaycan, Dağlıq Qarabağ münaqişəsi həll olunmayana qədər sözügedən komitə fəaliyyətinin bərpası, eləcə də münaqişənin daim diqqət mərkəzində saxlanması lazımdır. Həqiqətən də Dağlıq Qarabağ münaqişəsinin daim dünyanın diqqət mərkəzində qalması üçün AŞ PA, eləcə də onun Bürosunun Dağlıq Qarabağ üzrə Alt Komitəsi vacib tribunalardan sayılır.

Beləliklə, proseslərin gedişi göstərir ki, beynəlxalq hüquq müstəvisində Azərbaycanın Ermənistan üzərində qazandığı diplomatik üstünlüyünün miqyası daha da genişlənir. Şübəhsiz ki, bu, həm də işğal altındakı ərazilərin azad olunması prosesini bir qədər də sürətləndirəcək.

Rasim BAYRAMOV

Azərbaycan.- 2010.- 23 may.- S. 6.