Azərbaycanın Rusiyadakı səfirliyində Ulyanovsk vilayətinin təqdimatı olmuşdur

Azərbaycanın Rusiyadakı səfirliyində Ulyanovsk vilayətinin təqdimatı olmuşdur. Təqdimat mərasimində Rusiya Federasiyasının bu subyektinin nüfuzlu nümayəndə heyəti və ölkəmizin işgüzar dairələrinin nümayəndələri iştirak etmişlər.

Azərbaycanın Rusiyadakı səfiri Polad Bülbüloğlu Azərbaycan ilə Ulyanovsk vilayəti arasında münasibətlərin xüsusi xarakter daşımasını vurğulayaraq qeyd etmişdir ki, bizi birləşdirən dostluq telləri və işgüzar əlaqələr ən yüksək səviyyədədir. O xatırlatmışdır ki, Rusiyada yalnız Ulyanovsk şəhərində Azərbaycanın iki görkəmli şəxsiyyətinə - ümummilli lider Heydər Əliyevə və Nəriman Nərimanova abidə ucaldılmışdır. Səfir bu yaxınlarda Ulyanovsk vilayətində Azərbaycan Prezidenti İlham Əliyevin və Rusiya Prezidenti Dmitri Medvedevin görüşünü də xatırladaraq qeyd etmişdir ki, Ulyanovsk vilayəti ilə ölkəmiz arasında birbaşa əlaqələr əməkdaşlıq haqqında imzalanmış sənədlər əsasında həyata keçirilir və respublika ilə Rusiyanın regionları arasında birbaşa əlaqələrin bu formasını hər iki ölkə alqışlayır.

Azərbaycanlı diplomat ölkəmizin uğurlu iqtisadi inkişafı, iki ölkə arasında ticarət-iqtisadi əlaqələrin yüksək səviyyəsi və dövlətlərarası münasibətlərin strateji xarakteri barədə söhbət açmışdır.

Ulyanovsk vilayət hökuməti sədrinin birinci müavini Aleksandr Yakunin vilayətin investisiya imkanlarının və sənaye potensialının təqdimatını keçirmək imkanı yaradılmasına görə ölkəmizin səfirinə dərin təşəkkürünü bildirmişdir. O, Azərbaycanın Ulyanovsk vilayətinin mühüm tərəfdaşlarından biri olduğunu xüsusi vurğulayaraq Azərbaycan Prezidenti İlham Əliyevə vilayətə xeyirxah münasibətinə görə səmimi təşəkkürünü bildirmişdir. A.Yakunin xatırlatmışdır ki, vilayətdəki körpünün açılış mərasimində Azərbaycan dövlətinin başçısı İlham Əliyev Rusiya Prezidenti Dmitri Medvedevlə bərabər iştirak etmişdir. "Bu, bizim üçün çox əlamətdar hadisədir və biz bunu yüksək qiymətləndiririk", - deyən A.Yakunin vilayət sakinlərinin Azərbaycan xalqının ümummilli lideri, dəfələrlə Ulyanovskda olmuş Heydər Əliyevə xüsusi rəğbətindən söhbət açmışdır. O demişdir: "Biz bu insana həmişə çox ehtiramla yanaşırıq, onu müqəddəs hesab edirik". Aleksandr Yakunin Azərbaycanın işgüzar dairələrinin nümayəndələrini əməkdaşlığa və bu regiona sərmayə qoyulmasında daha fəal olmağa çağırmış, ölkəmizdən olan sahibkarlar üçün ən əlverişli rejim yaradılacağını vəd etmişdir.

Ulyanovsk vilayət hökuməti sədrinin müavini Vildan Zinnuroviç vilayətin sənaye potensialı barədə ətraflı məlumat vermiş, iqtisadiyyatın ən cəlbedici sahələri və investorlar üçün güzəştli vergi rejimi üzərində dayanmışdır. Vilayət iqtisadiyyatının inkişafının prioritet istiqamətləri arasında təyyarəqayırma, maşınqayırma, müdafiə sənayesi, yüngül sənaye, metal emalı və başqa sahələrin adı çəkilmiş, qeyd edilmişdir ki, bu sahələrdə Azərbaycan şirkətləri və ayrı-ayrı sahibkarlar fəal iştirak edə bilərlər.

"Ulyanovsk vilayətinin inkişafı korporasiyası" Açıq Səhmdar Cəmiyyətinin baş direktoru Dmitri Ryabov da regionda infrastrukturun və elm-təhsil potensialının yüksək inkişaf etməsindən danışmışdır.

Səfirliyin foyesində Ulyanovsk vilayətinin iri sənaye müəssisələri və vilayət iqtisadiyyatının ayrı-ayrı sahələri üzrə reklam stendləri nümayiş etdirilmişdir.

Asya HACIZADƏ,

AzərTAc-ın xüsusi müxbiri

Moskva

Azərbaycan.- 2010.- 25 may.- S. 8.