Uşaq incəsənət məktəbinin şagirdi "Kapellhaus"da solo konsert vermişdir

Alman-Azərbaycan Mədəniyyət Birliyi "Kapellhaus"da 3 nömrəli uşaq incəsənət məktəbinin 8-ci sinif şagirdi Nilufər Cəfərlinin solo konserti olmuşdur.

Məktəbin direktoru Dəyanət Quliyev bildirmişdir ki, gənc və istedadlı musiqiçi N.Cəfərlinin ifasındakı dəqiqlik onu yaşıdlarından fərqləndirir. Bugünkü konsertin proqramında Azərbaycan və xarici bəstəkarların əsərləri yer almışdır.

N.Cəfərli Cövdət Hacıyev, Adil Bəbirov və Azər Dadaşovun əsərləri ilə yanaşı, Bax, Şopen, List və Motsartın da əsərlərini məharətlə ifa etmişdir. Gənc musiqiçinin ifası alqışlarla qarşılanmışdır.

AzərTAc

Azərbaycan.- 2010.- 25 may.- S. 14.