Azərbaycanın nümayəndəsi Londonda keçirilən Avropa Mühasiblər və Auditorlar Federasiyasının illik ümumi yığıncağında iştirak etmişdir

Azərbaycan Respublikası Auditorlar Palatasının sədri, professor Vahid Novruzov Avropa Mühasiblər və Auditorlar Federasiyasının (EFAA) London şəhərində keçirilən illik ümumi yığıncağında və EFAA-nın təşkil etdiyi "Kiçik və orta ölçülü müəssisələr üçün maliyyə hesabatlığı və Kiçik və Orta Biznes Təcrübəsinə dair Beynəlxalq Mərkəzin Avropada kiçik və orta ölçülü müəssisələrə göstərdiyi biznes dəstəyi: kiçik və orta ölçülü müəssisələr və Kiçik və Orta Biznes Təcrübəsinə dair Beynəlxalq Mərkəzin qarşısında duran problemlər və onların həlli imkanları" mövzusunda beynəlxalq konfransda iştirak etmişdir.

Azərbaycanın 2003-cü ildən üzv olduğu EFAA 12 ölkədən olan 150 mindən çox mühasib və auditoru özündə birləşdirir. Bu beynəlxalq qurum mühasibat və auditin inkişafı, iqtisadiyyatın aktual problemlərinin həllində bu amillərin daha fəal rol oynaması üçün təklif və tövsiyələr hazırlayaraq onların tətbiqinə nəzarət edir.

Auditorlar Palatasından bildirmişlər ki, Azərbaycan təmsilçisi səfər müddətində bir sıra ölkələrin nümayəndələri ilə keçirdiyi işgüzar görüşlər zamanı ölkəmizdə dövlət quruculuğu və iqtisadi islahatların aparılması, maliyyə şəffaflığının təmin edilməsi istiqamətində həyata keçirilən tədbirlər və əldə edilən uğurlar barədə məlumat vermiş, müvafiq əyani materiallar çatdırmışdır.

Beynəlxalq tədbir zamanı EFAA-nın icraçı direktoru Federiko Diomedanın Azərbaycana işgüzar səfərinin ilkin şərtləri razılaşdırılmış, həmçinin Macarıstan, Hollandiya və İngiltərə təmsilçiləri ilə gələcək əməkdaşlıq barədə müzakirələr aparılmışdır.

Səfərin yekunlarına dair əldə edilən nəticələr ölkəmizdə beynəlxalq mühasibat və audit standartlarının tətbiqi, maliyyə şəffaflığının artırılması və korrupsiyaya qarşı mübarizə istiqamətində Azərbaycan Prezidenti İlham Əliyev tərəfindən qarşıya qoyulmuş vəzifələrin icrasında əhəmiyyətli rol oynayacaqdır.

AzərTAc

Azərbaycan.- 2010.- 26 may.- S. 7.