İtaliya və Azərbaycan alimləri ölkəmizdəki palçıq vulkanlarında tədqiqatlar aparır

İtaliyanın Milli Tədqiqatlar Şurasının Geologiya Elmləri və Təbii Sərvətlər İnstitutunun mütəxəssisləri Anjelo Minissale və Marko Bonini ölkəmizdəki palçıq vulkanlarında tədqiqatlar aparmaq üçün Azərbaycan Milli Elmlər Akademiyası (AMEA) Geologiya İnstitutuna gəlmişlər.

Yeddigünlük səfər çərçivəsində Ayrantökən, Daşgil, Qoturdağ, Bahar, Pirəkəşkül, Şıxzəyirli, Üçtəpə və digər palçıq vulkanlarına ekspedisiyalar edilir, İtaliyada analiz etmək üçün vulkanlardan palçıq və su nümunələri götürülür. Ekspedisiyalar Geologiya İnstitutunun Neft və qaz geologiyası və geokimyası şöbəsinin rəhbəri, AMEA-nın müxbir üzvü Əkpər Feyzullayevin rəhbərliyi ilə həyata keçirilir.

Tədqiqatlardan məqsəd palçıq vulkanlarının yerləşdiyi ərazilərdə mövcud olan tektonik qabarma və qırılmaların vulkan fəallığı ilə əlaqəsi, həmçinin vulkanlar arasında bu baxımdan olan fərqləri öyrənməkdir. Müxtəlif palçıq vulkanlarından çıxan metan və radioaktiv qazların tərkibi arasındakı fərqlərin bu geoloji xüsusiyyətlə əlaqəsini müəyyən etmək də tədqiqatların hədəflərindəndir.

Ə.Feyzullayevin dediyinə görə, indiyəcən bu istiqamətdə Azərbaycanda müasir üsullarla fundamental tədqiqatlar aparılmayıb. Səbəb İtaliyadakı kimi yüksək səviyyəli laborator şəraitin burada mövcud olmamasıdır. Xatırladaq ki, dünyanın 36 ölkəsində, o cümlədən İtaliyada ümumən 1000-dən artıq palçıq vulkanı vardır ki, onların 300-dən çoxu Azərbaycandadır. A.Minissalenin dediyinə görə, İtaliyadakı bu tip vulkanlar buradakı kimi sayca çox və quruluşca böyük olmasalar da, hər iki ölkə çökmə hövzələrinin geoloji inkişaf tarixinə görə çox oxşardır. Həm bu amil, həm də vulkanlarımızın geoloji üstünlüklərə malik olması italiyalı alimləri tədqiqatlar üçün məhz Azərbaycana yönəltmişdir.

Ağahüseyn ŞÜKÜROV

Azərbaycan.- 2010.- 26 may.- S. 11.