Respublika günü Londonda qeyd olunmuşdur

28 May - Respublika günü münasibətilə Azərbaycanın Böyük Britaniyadakı səfirliyinin təşkilatçılığı ilə Londonda tədbir keçirilmişdir.

Bu barədə səfirlikdən AzərTAc-a verilmiş məlumatda bildirilir ki, tədbirdə Böyük Britaniyanın Xarici İşlər Nazirliyi və digər dövlət qurumlarının nümayəndələri, parlamentin üzvləri, Londonda akkreditə olunan diplomatik korpusun üzvləri, Beynəlxalq Dəniz Təşkilatı, Avropa Yenidənqurma və İnkişaf Bankının yüksək rəsmiləri, diaspor təşkilatlarının təmsilçiləri, mətbuat nümayəndələri, Britaniyada yaşayan Azərbaycan və türk icmasının üzvləri iştirak etmişlər.

Qəbulun keçirildiyi zalda quraşdırılmış geniş ekranda 28 May - Respublika gününün tarixi əhəmiyyətini, Azərbaycan Demokratik Respublikasının qurulmasını və ölkəmizin mövcud vəziyyətini əks etdirən film nümayiş etdirilmişdir.

Bundan əlavə, "İRS" jurnalının Respublika gününə həsr edilmiş xüsusi sayı, eləcə də Azərbaycanın tarixi, mədəniyyəti və iqtisadiyyatına həsr edilmiş çoxsaylı məlumat kitabçaları, jurnallar qəbulda iştirak edən qonaqlara paylanmışdır.

AzərTAc

Azərbaycan.- 2010.- 28 may.- S. 6.