Azərbaycanın ilk peykinin istehsalı ilə əlaqədar əsas müqavilə imzalanmışdır

Mayın 27-də Azərbaycan Respublikası Rabitə və İnformasiya Texnologiyaları Nazirliyinin (RİTN) Beynəlxalq Əlaqələr və Hesablaşma Mərkəzi (BƏHM) ilə ABŞ-ın aparıcı peyk istehsalçısı olan "Orbital Sciences Corporation" şirkəti arasında Azərbaycanın ilk telekommunikasiya peykinin istehsalı ilə əlaqədar əsas müqavilə imzalanmışdır.

Müqaviləni BƏHM-in direktoru Cəlil Cəfərov və "Orbital Sciences Corporation" şirkətinin vitse-prezidenti Maykl Larkin uyğun hökumət təşkilatlarının tövsiyələri nəzərə alınmaqla və məsləhətçi şirkətlərlə razılaşdırılmış variantda imzalamışlar.

Mayın 25-də isə İstanbulda Azərbaycan tərəfi ilə Malayziyanın "Measat Satellite Systems" şirkəti arasında orbital mövqenin birgə istifadəsini nəzərdə tutan müqavilə bağlanmışdır.

Rabitə və informasiya texnologiyaları naziri Əli Abbasov bildirmişdir ki, peykin hazırlanması istiqamətində aparılan işlər Azərbaycan Prezidentinin müvafiq sərəncamları əsasında həyata keçirilir. Bu layihə Azərbaycanda kosmik sənayenin yaradılması və ölkəmizin dünya kosmik bazarına çıxarılması üzrə aparılan işlərin başlanğıcıdır. Peykin "Orbital Sciences Corporation" şirkəti tərəfindən 26 ay müddətində istehsal ediləcəyi və 2012-ci ilin iyul-avqust aylarında geostasionar orbitə çıxarılacağı nəzərdə tutulmuşdur.

Azərbaycan.- 2010.- 28 may.- S. 6.