Təbib qüdrətli Naftalan

"Naftalan həm coğrafi baxımdan strateji nöqtədir, həm də iqtisadi baxımdan çox mühüm bir şəhərdir. Burada müasir səviyyənin təşkil olunması mütləq və mütləq olmalıdır".

İlham ƏLİYEV

Dövlət başçısı İlham Əliyevin uğurlu yaz günlərinin birində bu şəfa ocağına tarixi səfəri Naftalanın inkişafında yeni mərhələ açdı. Şəhərin vəziyyəti ilə tanış olan Prezident Naftalanın dünyada neft ilə müalicə aparıldığı yeganə kurort olduğunu söylədi. Dövlət başçısı təbib qüdrətli, ölkə şöhrətli bu müalicə-sağlamlıq ocağının müasir səviyyəyə qaldırılmasının vacibliyini xüsusi vurğuladı və ilkin tədbirlərin görülməsi üçün ehtiyat fondundan bir milyon manat pul ayırdı. Ərazinin genişləndirilməsi məqsədilə Goranboy rayonundan 489 hektar torpaq sahəsi Naftalana verildi. Şəhərdə rəhbərlik səriştəli kadrlarla möhkəmləndirildi. Beləliklə, Naftalanda yüksəlişin yeni mərhələsi başlandı.

İlk öncə bir çox sosial problemlər həll edildi. Goran dəmiryol stansiyasından Naftalana gələn avtomobil yolu yenidən quruldu. Goranboy qaz paylayıcı stansiyasından Naftalana 14,5 kilometr uzunluğunda əsas xətt çəkildi. Şəhər daxilində istismara yaramayan metal boruların yerinə plastik borular qoyuldu. Çoxmərtəbəli binaların liftləri yeniləri ilə əvəz edildi. Qazanxanalar bərpa olundu, istilik sistemləri təzələndi. Binaların dam örtükləri və fasadlar müasir üslubda təmir edildi. İllər boyu baxımsız qalan küçələr və səkilər sistemli surətdə sahmana salındı. Heydər Əliyev, Səməd Vurğun və Nəriman Nərimanov parklarında, xəstəxananın ətrafında, şəhərin giriş və çıxış yollarında, özəl sanatoriyaların ərazilərində on minlərlə ağac və gül kolları əkildi. Magistral yollar boyunca milli üslubda bədii tərtibatlı istinad divarları tikildi.

Bütün bunlarla yanaşı, iqtisadiyyatın yüksəlməsi üçün əsaslı tədbirlər görülür. Bu günlərdə doqquz aylığın yekunları müzakirə edilərkən qeyd olundu ki, ötən ilin müvafiq dövrünə nisbətən istehsalın həcmi on bir faiz artmışdır. Sahibkarlığa geniş meydan açılır. Özəl bölmənin inkişafına xüsusi fikir verilir.

Ən əsası odur ki, "Azərbaycan Respublikasında kurortların 2009-2018-ci illərdə inkişafı üzrə Dövlət Proqramı" uğurla yerinə yetirilir. "Çinar" sanatoriyası müasir üslubda yenidən qurulub. Şəhərin mənzərəli yerlərindən birində daha bir sanatoriyanın inşası başa çatmaq üzrədir. İndi burada son tamamlama və abadlıq işləri görülür.

Hər yerdə qızğın iş gedir. Şəhər təsərrüfatının ən müxtəlif sahələri demək olar ki, yenidən qurulur. Problemlər həll olunduqca daha geniş məsələlərdən söhbət gedir. Uşaq bağçası-körpələr evi və yeddiillik uşaq musiqi məktəbi, habelə, şəhər xəstəxanası və poliklinika üçün müasir binaların tikilməsi, olimpiya idman kompleksinin, məişət tullantıları zavodunun inşası nəzərdə tutulub. İcra hakimiyyətinin başçısı Natiq Aslanov deyir ki, indi biz Naftalan problemini öyrənən elmi-tədqiqat institutu filialının yaradılması və müalicəvi neftdən dərman preparatları hazırlayan zavodun açılması üçün çalışırıq.

Naftalan tədricən inkişaf edir, müasirləşir, öz əvvəlki şöhrətini qaytarmağa çalışır. YAP Naftalan şəhər təşkilatının sədri Möhübbət Bədəlov deyir ki, uzun illərdir mən bu yerlərdə çalışıram. Hələ heç vaxtı bu qədər qızğın iş getdiyini, ardıcıl, sistemli, səriştəli işlərin aparıldığını görməmişəm. Naftalan göz görə-görə inkişaf edir, tanınmaz olur.

Çox keçməz ki, bu şəfa mərkəzi əvvəlki illərdə olduğu kimi ölkə əhalisi üçün genişmiqyaslı müalicə-sağlamlıq mərkəzinə çevrilər.

Əhməd İSAYEV

Azərbaycan.-2010.-14 noyabr.-S.7.