Budapeştdə V beynəlxalq

elmi konfrans işə başlamışdır

Noyabrın 22-də Azərbaycanın Budapeştdəki səfirliyində "Azərbaycan-Macarıstan: mədəniyyətlərin dialoqu" seriyasından V beynəlxalq elmi konfrans işə başlamışdır. İclasda Azərbaycan, Macarıstan, Ukrayna, Türkiyə və Polşadan 50-dək alim iştirak edir. Konfrans Azərbaycanın Macarıstandakı səfirliyinin təşəbbüsü, Diasporla İş üzrə Dövlət Komitəsinin dəstəyi, Azərbaycan Milli Elmlər Akademiyasının (AMEA) və Macarıstan Elmlər Akademiyasının (MEA) iştirakı ilə hər il təşkil olunur.

Konfrans iştirakçılarına təbrik nitqi ilə müraciət edən Azərbaycanın Macarıstandakı səfiri Vilayət Quliyev demişdir: "Macarıstan və Azərbaycan arasında məsafəyə baxmayaraq, iki xalq həmişə bir-birinə qarşı yaxınlıq və doğmalıq hiss etmişdir. Artıq beşinci dəfə keçirilən illik elmi konfrans qardaş ölkələr arasında əlaqələrin möhkəmlənməsinə növbəti töhfədir".

Sonra söz konfransın birinci iş gününün moderatorları - Avropa Folklor İnstitutunun direktoru Mixay Hoppala və AMEA-nın Memarlıq və İncəsənət İnstitutunun direktoru Ərtegin Salamzadəyə verilmişdir. Onlar 2006-cı ildən etibarən Azərbaycanın Macarıstandakı səfirliyində keçirilən ötən konfranslar barədə qısa məlumat verərək bildirmişlər ki, məruzəçilərin sayının artması hər il təşkil olunan bu tədbirə elmi ictimaiyyətin marağının artdığını göstərir. Səfirin elmi forumun iştirakçılarına ünvanlanan təbrikinə qoşulan moderatorlar ümidvar olduqlarını bildirmişlər ki, konfransın işi səmərəli, çıxışlar isə maraqlı və orijinal olacaqdır.

Naxçıvan Dövlət Universitetinin rektoru, Milli Məclisin deputatı, akademik İsa Həbibbəyli konfrans iştirakçılarını salamlayaraq, Azərbaycan səfirliyinə rəmzi hədiyyə təqdim etmişdir.

Konfrans 4 gün davam edəcəkdir. Birinci gün etnologiya, arxeologiya və folklor, ikinci gün ədəbiyyat və dilçilik, üçüncü gün tarix və etnologiya, dördüncü gün isə iqtisadiyyat və hüquq məsələləri müzakirə ediləcəkdir.

AzərTAc

Azərbaycan.- 2010.- 23 noyabr.- S.7.