"Oracle Exadata Business" forumu keçirilmişdir

Noyabrın 26-da "Avropa" hotelində Rabitə və İnformasiya Texnologiyaları Nazirliyinin dəstəyi və SayberNet, FORS Europe və Oracle şirkətlərinin təşkilatçılığı ilə "Oracle Exadata Business" forumu keçirilmişdir.

Dövlət müəssisələri və kommersiya şirkətlərinin nümayəndələri üçün təşkil olunan tədbir inteqrallaşdırılmış vahid soft+hardware Oracle Exadata Machine V2 həllinə həsr olunmuşdur.

Tədbirdə rabitə və informasiya texnologiyaları nazirinin müavini Elmir Vəlizadə, SayberNet şirkətinin direktoru İlham Namazov, FORS və Oracle şirkətlərinin rəhbərləri və mütəxəssisləri çıxış edərək dünyanın ən böyük məlumat bazası idarəetmə sistemi olan Oracle şirkəti və onun Azərbaycan müəssisələri üçün vacib olan üstün cəhətləri haqqında məlumat vermişlər. Bildirilmişdir ki, bu sistemin köməyi ilə məlumatların emal edilməsi sürəti 10 dəfədən 70 dəfəyə qədər artmışdır.

Forumda Azərbaycanda dövlət müəssisələrinin və şirkətlərinin idarə olunmasının effektivliyinin Oracle Exadata vasitəsilə artırılması, gündəlik idarəçilik və informasiya məsələlərin "qaynar" rejimdə həll olunması barədə danışılmışdır. Tədbirdə Oracle Exadata həlli üzərində qurulan "Smart Scans", "Hybrid Columnar Compression (HCC)", "Smart Flash Cache", "Automatic Storage Management (ASM)", "Storage Indexes" və "In-Memory Parallelism" və s. yeni texnologiyalar təqdim olunmuşdur.

Forumda dövlət müəssisələrinin və şirkətlərin rəhbərləri, informasiya texnologiyaları üzrə mütəxəssislər, analitiklər iştirak etmişlər.

Azərbaycan.- 2010.- 27 noyabr.- S. 5.