Parlamentin fəaliyyətinin əsas istiqamətləri təməli ulu öndər Heydər Əliyev tərəfindən qoyulmuş hüquqi, demokratik və dünyəvi dövlətin yaradılması prosesini davam etdirməkdən ibarət olmuşdur

Müsahibimiz Azərbaycan Respublikası Milli Məclisinin Sədri, YAP Siyasi Şurasının üzvü Oqtay Əsədovdur

- Oqtay müəllim, artıq üçüncü çağırış Azərbaycan Respublikası Milli Məclisinin beşillik fəaliyyəti sona çatmaqdadır. Parlamentin spikeri kimi ötən beş ili necə xarakterizə edərdiniz?

- Məlum həqiqətdir ki, ölkəmizin əldə etdiyi uğurların qazanılmasında milli dövlətçilik sistemində özünəməxsus yeri olan Azərbaycan parlamentinin də mühüm rolu var. Milli Məclis dünyadakı mütərəqqi inkişaf meyllərinin Azərbaycanda öz əksini tapmasında dövlət başçısına səlahiyyətləri çərçivəsində dəstək verir.

Müstəqilliyimizin memarı, ulu öndər Heydər Əliyevin uzaqgörən ideyalarının reallığa çevrilməsi, bu siyasətin Prezident İlham Əliyev tərəfindən müasir dövrün tələblərinə uyğunlaşdırılması, qısa zaman kəsiyində ölkəmizdə milli-mənəvi dəyərlərə əsaslanan sivil cəmiyyət qurmağa imkan verdi. Bu nailiyyətin əldə edilməsi üçün ölkə parlamenti, o cümlədən üçüncü çağırış Milli Məclis də var qüvvəsi ilə çalışmışdır. Ulu öndərin ölməz ideyalarına sadiq qalaraq Avropa dəyərlərindən bəhrələnən qanunverici orqan ölkənin müasir inkişaf strategiyasının yaradılmasında özünəməxsus rol oynamışdır.

Bu baxımdan Prezident İlham Əliyev mütərəqqi prinsiplərə söykənən müasir cəmiyyət quruculuğunda, ölkənin rifahı naminə həyata keçirilən islahatların hüquqi bazasının yaradılmasında Milli Məclisin rolunu yüksək qiymətləndirmişdir.

Parlamentin ötən dövrdəki fəaliyyəti barədə danışarkən qeyd etmək lazımdır ki, demokratik əsaslarla seçilmiş üçüncü çağırış Milli Məclis ölkə qanunvericiliyinin inkişafı sahəsində yeni mərhələnin başlanğıcını qoymuşdur. Çoxpartiyalı sistem əsasında fəaliyyət göstərən Milli Məclis öz fəaliyyətini qüvvədə olan qanunvericiliyə uyğun surətdə həyata keçirmişdir. Parlamentin fəaliyyətinin əsas istiqamətləri təməli ulu öndər Heydər Əliyev tərəfindən qoyulmuş hüquqi, demokratik və dünyəvi dövlətin yaradılması prosesini davam etdirməkdən ibarət olmuşdur. Bu gün inamla deyə bilərik ki, hazırda müstəqil Azərbaycanın bütün sahələr üzrə qanunvericilik bazası mövcuddur. Qəbul olunmuş Konstitusiya qanunları, məcəllələr, qanunlar, təsdiq edilmiş konvensiyalar və sazişlər cəmiyyət və dövlət həyatında yaranan münasibətləri tənzimləməyə xidmət edir.

Parlament həyatında ötən dövrün ən mühüm hadisələrindən biri 2009-cu il sentyabrın 25-də Milli Məclisin yeni korpusunun istifadəyə verilməsi oldu. Yeni korpusun açılışında Prezident İlham Əliyev və ölkənin birinci xanımı Mehriban xanım Əliyeva iştirak etdilər. Heç şübhəsiz, parlamentdə aparılan dünya standartlarına uyğun quruculuq və bərpa işləri müstəqil Azərbaycanın iqtisadi qüdrətindən xəbər verir.

Bu gün Milli Məclisin siması tamamilə yenilənmişdir. Parlamentin binası və maddi-texniki bazası yenidən qurulmuşdur. Milli Məclisə gələn xarici qonaqlar burada millət vəkilləri üçün yaradılmış şəraitə heyran qaldıqlarını dəfələrlə vurğulamışlar. Burada müasir İclas zalı, ümummilli lider Heydər Əliyevə həsr olunmuş Xatirə zalı, zəngin kitabxana vardır.

Bir sözlə, Milli Məclisin ötən beş ildəki fəaliyyətinə nəzər saldıqda görürük ki, parlament ölkədə uğurla həyata keçirilən islahatların və demokratiyanın daha da inkişaf etdirilməsinə, qanunvericlik fəaliyyətində dünyanın aparıcı ölkələrinin təcrübəsinin tətbiqinə öz layiqli töhfələrini vermişdir.

- Azərbaycanın üçüncü çağırış Milli Məclisi bir sıra vacib qanunverici aktların hazırlanıb qəbul edilməsində ciddi, genişmiqyaslı fəaliyyət göstərmişdir. Bununla yanaşı, Azərbaycanın bir sıra mühüm qanunverici aktları Avropa standartlarına uyğunlaşdırıldı. Bu sahədə Milli Məclisin fəaliyyətini necə dəyərləndirirsiniz?

- Bildiyiniz kimi, Azərbaycanın qanunvericilik sistemində mühüm istiqamətlərdən biri demokratiyanın daha da dərinləşməsi, insan hüquq və azadlıqlarının təmin olunmasının hüquqi bazasının yaradılması və onun təkmilləşdirilməsindən ibarətdir. Təsadüfi deyildir ki, ölkə Konstitusiyasının müddəalarının üçdə ikisi məhz bu məsələlərə həsr olunmuşdur.

Diqqətinizə çatdırım ki, Üçüncü çağırış Milli Məclisin fəaliyyəti dövründə parlamentin 155 iclası keçirilmiş, 1058 qanun və qərar qəbul olunmuşdur.

Ötən dövrdə Milli Məclis ölkə qanunvericiliyinin, o cümlədən Seçki Məcəlləsinin təkmilləşdirilməsini diqqət mərkəzində saxlamış, Seçki Məcəlləsinə və “Sərbəst toplaşmaq azadlığı haqqında” Qanuna zəruri dəyişikliklər və əlavələr etmişdir. Bu dəyişikliklər vətəndaşların əsas hüquqlarından biri olan seçmək, seçilmək və siyasi azadlıqlardan istifadə etmək hüququnun daha yüksək səviyyədə təmin olunması baxımından əhəmiyyətlidir.

Milli Məclis ölkəmizdə insan hüquqlarının qorunmasını, demokratik proseslərin daha geniş vüsət almasını özündə ehtiva edən bir sıra qanunları - “Azərbaycan Respublikasının İnsan hüquqları üzrə müvəkkili (ombudsman) haqqında” Konstitusiya Qanununda dəyişikliklər edilməsi barədə Konstitusiya qanununu, “Qeyri-hökumət təşkilatları (ictimai birliklər və fondlar) haqqında”, “Fərdi məlumatlar haqqında”, “Dini etiqad azadlığı haqqında” sənədlərə əlavələr və dəyişikliklər edilməsi barədə qanunları qəbul etmiş, Avropa Şurasının “İnsan alverinə qarşı mübarizə haqqında” Konvensiyasını təsdiqləmişdir. Bu sahədə qəbul edilmiş “Gender (kişi və qadınların) bərabərliyinin təminatları haqqında” və “Məişət zorakılığının qarşısının alınması haqqında” qanunlar da mühüm sənədlərdəndir.

Ötən dövrdə parlament söz və mətbuat azadlığını da diqqətdən kənarda qoymamış, “Kütləvi informasiya vasitələri haqqında”, “Televiziya və radio yayımı haqqında”, “İctimai televiziya və radio yayımı haqqında”, “Məlumat azadlığı haqqında”, “İnformasiya əldə etmək haqqında” sənədlərə əlavələr və dəyişikliklər etmişdir.

Milli Məclis hüquq-mühafizə orqanlarının işinin təkmilləşdirilməsi, cəmiyyətdaxili proseslərin nizama salınmasının hüquqi tənzimlənməsi, milli təhlükəsizliyin təmin olunması kimi məsələləri də daim diqqətdə saxlamışdır. Milli Məclisdə bu sahədə atılmış mühüm addımlardan biri İnsanlığa qarşı cinayətləri müəyyən edən qanunun qüvvəsinin geriyə şamil olunması məsələsinin öz hüquqi həllini tapması olmuşdur. Siyasi və hüquqi əhəmiyyətə malik olan bu məsələ “Beynəlxalq cinayətlərə görə məsuliyyət müəyyən edən Qanunun qüvvəsinin geriyə şamil olunması haqqında” Konstitusiya Qanununda təsbit olunmuşdur.

Bu dövrdə Mülki Məcəlləyə, Cinayət Məcəlləsinə, Cinayət-Prosessual Məcəlləsinə, Mülki Prosessual Məcəlləyə, İnzibati Xətalar Məcəlləsinə, “Konstitusiya Məhkəməsi haqqında”, “Məhkəmələr və hakimlər haqqında”, “Məhkəmə hüquq Şurası haqqında”, “Polis haqqında”, “Prokurorluq haqqında”, “Notariat haqqında”, “Yol hərəkəti haqqında” qanunlara əlavə və dəyişikliklər edilmişdir.

Parlament bələdiyyələrin fəaliyyətini təkmilləşdirmək məqsədi ilə də bir sıra qanun və qərarlar qəbul etmiş, bu sahədəki qanunvericiliyi dövrün tələblərinə uyğunlaşdırmışdır.

Üçüncü çağırış Milli Məclis ordu quruculuğu və hərbçilərimizin anti-terror əməliyyatlarda iştirakını da diqqət mərkəzində saxlamışdır. Belə ki, ilk dəfə olaraq müstəqil Azərbaycanın Hərbi Doktrinası geniş müzakirələrdən sonra təsdiq olunmuşdur. Ötən dövrdə deputatlar fövqəladə hallar orqanlarında xidmət keçən şəxslərin hüquqi vəziyyətini əks etdirən mühüm sənəd kimi “Fövqəladə hallar orqanlarında xidmət keçmə haqqında” qanun layihəsini də müzakirə edərək qəbul etmişlər.

Milli Məclis iqtisadi sahəyə də xüsusi diqqət ayıraraq, sahibkarlığın inkişafı, iqtisadi sahənin qanunvericilik bazasının təkmilləşdirilməsi üçün “Sahibkarlıq fəaliyyəti subyektlərinin dövlət qeydiyyatının “bir pəncərə” prinsipinə uyğun təşkili ilə əlaqədar Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə” qanun qəbul etmişdir.

Parlamentdə qəbul edilmiş “Xüsusi iqtisadi zonalar haqqında”, “Əmanətlərin sığortalanması haqqında” qanunlar dünyada baş verən proseslər fonunda mühüm əhəmiyyətə malikdir. “Sığorta fəaliyyəti haqqında”, “Bank olmayan kredit təşkilatları haqqında” qanunlar, “Xarici investisiyaların qorunması haqqında”, “Gömrük tarifi haqqında” sənədlərə edilmiş dəyişiklik və əlavələr ölkə iqtisadiyyatının gücləndirilməsinə xidmət edir.

Qloballaşan dünyamızda ölkənin ərzaq təhlükəsizliyi ilə bağlı dövlət proqramının həyata keçirilməsində hüquqi bazanın yaradılmasını, nəqliyyat sisteminin inkişafının əhəmiyyətini nəzərə alaraq, parlament bu sahələrdə də bir sıra vacib qanunların qəbuluna nail olmuşdur.

Əhalinin sosial müdafiəsinin gücləndirilməsi də həmişə Milli Məclisin diqqət mərkəzində olmuşdur. Ölkəmizdə aparılan pensiya islahatları çərçivəsində qəbul edilən “Əmək pensiyaları haqqında” və “Sosial müavinətlər haqqında” qanunlar əhalinin sosial təminatının daha da gücləndirilməsinə, sığorta-pensiya sistemində mütərəqqi dünya təcrübəsinə uyğun mexanizmlərin qurulmasına şərait yaratmışdır.

Sosial sahədə qəbul olunmuş “Onkoloji yardım haqqında”, “Dərman vasitələri haqqında”, “İnsanın immun çatışmazlığı virusunun törətdiyi xəstəliklə mübarizə haqqında” qanunlar, “Özəl tibb fəaliyyəti haqqında” sənədə edilən dəyişikliklər də əhalinin sağlamlığının qorunması və tibb sahəsinin günün tələbləri səviyyəsində inkişaf etdirilməsi baxımından mühüm əhəmiyyət kəsb edir.

Parlament cəmiyyətimizin azyaşlı üzvlərini də diqqətdən kənarda qoymamış, onların sosial müdafiəsini gücləndirmək məqsədilə “Əlilliyin və uşaqların sağlamlıq imkanları məhdudluğunun qarşısının alınması, əlillərin və sağlamlıq imkanları məhdud uşaqların reabilitasiyası və sosial müdafiəsi haqqında”, “Gənclər siyasəti haqqında”, “Uşaq hüquqları haqqında”, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanunlara əlavə və dəyişikliklər etmişdir.

Qəbul olunmuş qanunlar sırasında “Təhsil haqqında” Qanunun qəbulunu üçüncü çağırış Milli Məclisin ən böyük uğurlarından biri hesab etmək olar. Uzun illərdən bəri geniş ictimaiyyətin böyük marağına səbəb olan bu sənəd təhsil sistemi üzrə digər qanunların qəbul edilməsində baza rolunu oynayacaqdır.

- Milli Məclisin beynəlxalq müstəvidə fəaliyyəti haqqında nə deyə bilərsiniz? Xüsusilə Azərbaycan parlamentinin Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılması istiqamətində atdığı addımlar nədən ibarət olmuşdur?

- Hər kəsə məlumdur ki, Azərbaycan Prezidenti İlham Əliyevin həyata keçirdiyi uğurlu xarici siyasət ölkəmizin beynəlxalq arenada və regionda nüfuzunu yüksəltmiş, onun mövqelərini möhkəmləndirmişdir. Parlamentlərarası əlaqələr də dövlətimizin beynəlxalq əməkdaşlığının mühüm istiqamətlərindən biri kimi fəaliyyət göstərmiş, Azərbaycanın milli maraqlarının təmin olunmasına yönəldilmişdir.

Milli Məclisin nümayəndə heyətlərinin beynəlxalq qurumlarda iştirakı, xarici ölkələrin parlament rəhbərliyi və beynəlxalq təşkilatların təmsilçiləri ilə keçirilən görüşlər ölkənin xarici siyasətinin tərkib hissəsi olmaqla dövlətimizin, o cümlədən parlamentin əlaqələrinin genişləndirilməsində əhəmiyyətli rol oynayır. Bu görüşlər zamanı aparılan danışıqlarda Azərbaycanın ən ağrılı problemi olan Dağlıq Qarabağ münaqişəsi ilə bağlı məsələ əsas mövzu kimi qabardılmış, bizi narahat edən məsələlərin dünya ictimaiyyətinə çatdırılması, beynəlxalq qurumların nəzərinin bu məsələyə cəlb edilməsi diqqət mərkəzində olmuşdur.

Parlamentlərarası əlaqələrin inkişafında xarici ölkələrin qanunvericilik orqanları ilə dostluq qrupları mühüm rol oynayır. Bu gün parlamentdə 70-dən çox ölkənin qanunvericilik orqanı ilə parlamentlərarası əlaqələr üzrə işçi qrupları fəaliyyət göstərir. Bu qruplar qanun yaradıcılığı sahəsində təcrübə və informasiya mübadiləsinə, parlamentlər səviyyəsində əməkdaşlığın genişləndirilməsinə misilsiz töhfələr verirlər.

Bundan başqa, parlament regionda və dünya miqyasında Azərbaycanın milli maraqları ilə bağlı hadisələrə də münasibət bildirmişdir. Azərbaycan parlamenti Fransa Milli Məclisində “erməni soyqırımı”nın inkar edilməsinə görə cəza müəyyən edən qanun layihəsinin qəbulu ilə əlaqədar 2006-cı il oktyabrın 13-də bu ədalətsiz aktın qəbul olunmasına öz qəti etirazını bildirmişdi. 2007-ci ilin fevralın 27-də Xocalı faciəsinin 15-ci ildönümü münasibəti ilə parlament bəyanat verərək Xocalı soyqırımını bütün insanlığa qarşı ən ağır cinayət kimi dəyərləndirilmiş, 20-ci əsrin Xatın, Lidiçe, Babiy Yar kimi faciələri ilə bir sırada dayandığı vurğulamışdı. Milli Məclis özünün 2009-ci il 15 dekabr tarixli müraciətində ABŞ Konqresi tərəfindən 2010-cu maliyyə ili üçün Dağlıq Qarabağa maliyyə vəsaiti ayrılmasına öz etirazını bildirmişdir.

Yadınızdadırsa, 2010-cu ilin əvvəlində ABŞ Konqresi Nümayəndələr Palatasının Xarici əlaqələr komitəsinin qondarma “erməni soyqırımı”na dair qəbul etdiyi qərar Azərbaycan ictimaiyyətində dərin narahatlıq doğurmuşdu. Bunu nəzərə alan Milli Məclis 2010-cu il martın 5-də ABŞ Konqresinə müraciət edərək erməni lobbisinin maraqlarına xidmət edən bu addımı Cənubi Qafqazda yeni problemlərə yol aça biləcək qərar kimi dəyərləndirmişdir. Məlum olduğu kimi, sonrakı mərhələdə bu proses dayandırıldı.

Qeyd etmək lazımdır ki, ölkəmizin nüfuzlu beynəlxalq qurumlardakı nümayəndəlikləri ilə birlikdə deputatlarımız da Azərbaycanın beynəlxalq arenada siyasi imicinin yüksəlməsi naminə səmərəli fəaliyyət göstərirlər. Parlamentlərarası əməkdaşlıq müstəvisində aparılan bu siyasət artıq öz nəticələrini verməkdədir. Bu gün BMT, Avropa Şurası, ATƏT və digər qurumlarda ölkəmizlə, regionla bağlı qəbul edilən sənədlərdə Azərbaycanın milli maraqları öz əksini tapmaqdadır. Heç də təsadüfi deyildir ki, İtaliya və Almaniya kimi nüfuzlu dövlətlərin qanunvericilik orqanları Cənubi Qafqazla əlaqədar qəbul etdikləri qətnamələrdə Dağlıq Qarabağ münaqişəsi ilə əlaqədar Azərbaycanın haqlı mövqeyini dəstəkləmişlər. Bütün bunlar Azərbaycan parlament diplomatiyasının uğurlarından xəbər verir.

Hazırda Milli Məclis Parlamentlərarası İttifaqın, Avropa Şurası Parlament Assambleyasının, MDB Parlament Assambleyasının, ATƏT Parlament Assambleyasının, Qara Dəniz İqtisadi Əməkdaşlıq Təşkilatı Parlament Məclisinin, GUAM Parlament Assambleyasının, İslam Konfransı Təşkilatı Parlament Məclisinin tam hüquqlu, NATO Parlament Assambleyasının isə assosiativ üzvüdür. Milli Məclis Avropa Parlamenti, Avropa İttifaqının “Şərq Tərəfdaşlığı” proqramı çərçivəsində yaradılmış Avronest parlament təşkilatı və digər mötəbər beynəlxalq qurumlarla da sıx əməkdaşlıq edir. Millət vəkilləri bu təşkilatlarda Ermənistan-Azərbaycan, Dağlıq Qarabağ münaqişəsi barədə həqiqətləri dünya ictimaiyyətinə çatdırırlar.

Bu gün Milli Məclis yeni regional qurumların yaradılmasında da fəal iştirak edir. Belə ki, 2009-cu il sentyabrın 29-da Milli Məclisdə Türkdilli Ölkələrin Parlament Assambleyasının – TürkPA-nın birinci plenar iclasının keçirilməsi bütün türk dünyası üçün mühüm əhəmiyyətli hadisə oldu. Belə bir tədbirin Bakıda keçirilməsi isə həqiqətən qürurvericidir. Bundan başqa, təşkilatın Katibliyinin 4 il müddətinə Bakıda fəaliyyət göstərməsi qərara alınmışdır.

Ötən dövrdə Milli Məclis rəhbərliyinin xarici ölkələrə səfərləri, beynəlxalq qurumların tədbirlərində iştirakı parlament diplomatiyamızın inkişafına öz müsbət təsirini göstərmişdir. Milli Məclis Sədrinin başçılığı ilə nümayəndə heyəti Türkiyədə, Rusiyada, İranda, Polşada, Fransada, İtaliyada, Cənubi Koreyada, Yunanıstanda, Rumıniyada, Bolqarıstanda və digər ölkələrdə rəsmi səfərlərdə olmuş, MDB PA-nın, AŞPA-nın, QDİƏT PM-in tədbirlərində, Parlament Sədrlərinin Avropa toplantısında və bir sıra ölkə parlamentlərinin yubiley tədbirlərində iştirak etmişdir.

Ötən dövrdə Türkiyə, Ukrayna, Gürcüstan, Polşa, Slovakiya, Koreya Respublikası, Türkmənistan, İsveçrə Konfederasiyası, Serbiya, Xorvatiya, Litva prezidentləri, bir sıra ölkələrin və beynəlxalq təşkilatların nümayəndə heyətləri parlamentdə olmuş, Milli Məclisin Sədri ilə parlamentlərarası əməkdaşlığın inkişafı barədə fikir mübadiləsi aparmışlar.

Göründüyü kimi, parlament diplomatiyası ölkənin beynəlxalq aləmdə milli maraqlarının təmin olunması baxımından çox önəmlidir. Milli Məclis dünyanın mötəbər beynəlxalq təşkilatları və parlamentləri ilə uğurlu əməkdaşlığı davam etdirərək, dövlətimizin və xalqımızın haqq işinin beynəlxalq aləmdə dəstəklənməsi naminə öz səlahiyyətləri çərçivəsində bütün imkanlardan istifadə edir.

- Bu gün ölkəmiz iqtisadi, sosial inkişafına görə dünyanın aparıcı dövlətlərindən birinə çevrilmişdir. Əlbəttə ki, bu uğurların kökündə əsası Ulu Öndər Heydər Əliyev tərəfindən qoyulmuş və bu gün Azərbaycan Prezidenti İlham Əliyev tərəfindən davam etdirilən siyasi kurs dayanır. Xalqımız Azərbaycanın firavan gələcəyini, inkişafını müəyyənləşdirən Heydər Əliyev siyasi kursunu birmənalı şəkildə dəstəkləyir. Bu baxımdan, xalq-hakimiyyət vəhdətinin qarşıdan gələn parlament seçkilərinin nəticələrinə təsiri haqqında fikirlərinizi bilmək istərdik. Ümumiyyətlə, ölkəmizdə seçkiqabağı mühiti necə dəyərləndirirsiniz?

- Son illərdə ölkənin ictimai-siyasi həyatında baş vermiş mühüm əhəmiyyətli hadisələrdən biri də 2008-ci ilin 15 oktyabrında keçirilmiş Prezident seçkiləri oldu. Bu seçkilərdə Azərbaycan vətəndaşları ölkənin növbəti beş ilə idarə olunmasını milli tariximizdə görkəmli yer tutan ulu öndər Heydər Əliyevin siyasi varisi İlham Əliyevə həvalə etdilər. Xalqımızın bu seçimi ölkədə ötən dövrdə görülən işlərin və aparılan islahatların dəstəklənməsi anlamına gəlir.

YAP olaraq biz dəfələrlə bəyan etmişik ki, qarşıdan gələn parlament seçkilərində bizim uğurlarımızın əsasında dayanan ən böyük amil Prezident İlham Əliyevin həyata keçirdiyi siyasətin seçicilər tərəfindən yüksək qiymətləndirilməsidir. Azərbaycan iqtisadiyyatının sürətli inkişafı, bu inkişafın əsasında digər sahələrdə əldə olunan əhəmiyyətli irəliləyişlər, insanların rifahının, yaşayışının yüksəlməsi, Azərbaycanın beynəlxalq aləmdə və regionda mövqelərinin güclənməsi - bütün bunların hamısı onu deməyə əsas verir ki, xalq-hakimiyyət vəhdəti qarşıdan gələn parlament seçkilərinin nəticələrinə birbaşa təsir edəcəkdir. Çünki YAP-ın indiyədək həyata keçirdiyi siyasətin əsasını insanlara xidmət amili təşkil etmişdir.

Bu gün Azərbaycandakı seçkiqabağı mühitə gəlincə isə, onu deyə bilərəm ki, mən ölkədəki seçkiqabağı mühiti normal hesab edirəm. Bu gün həm ölkəmizdəki siyasi şərait, həm də lazımi seçki qanunvericiliyinin mövcudluğu demokratik, ədalətli seçki keçirməyə münbit zəmin yaradır.

Ölkənin aparıcı siyasi qüvvəsi olan Yeni Azərbaycan Partiyası da seçkiqabağı mühitə uyğun fəaliyyətini davam etdirir. Artıq YAP müxtəlif dairələrdən öz namizədlərini müəyyən etmiş və cəmiyyətə açıqlamışdır. Bu gün Azərbaycanda seçkinin azad, demokratik və şəffaf keçirilməsi üçün dövlət tərəfindən edilməli olan bütün işlər həyata keçirilmişdir. Ona görə də əminəm ki, qarşıdan gələn parlament seçkiləri də tam demokratik, şəffaf və beynəlxalq standartlara uyğun formada keçiriləcək, Azərbaycanın beynəlxalq nüfuzunu daha da yüksəldəcəkdir.

Azərbaycan.- 2010.- 2 oktyabr.- S. 3.