Azərbaycan Prezidenti İlham Əliyev Oman Sultanlığının ölkəmizdə yeni təyin olunmuş səfirinin etimadnaməsini qəbul etmişdir

Azərbaycan Respublikasının Prezidenti İlham Əliyev oktyabrın 12-də Oman Sultanlığının ölkəmizdə yeni təyin olunmuş fövqəladə və səlahiyyətli səfiri Qais Salim Ali Al Saidin etimadnaməsini qəbul etmişdir.

Səfir fəxri qarovul dəstəsinin önündən keçdi.

Səfir Qais Salim Ali Al Said etimadnaməsini Prezident İlham Əliyevə təqdim etdi.

Sonra Azərbaycan Prezidenti səfirlə söhbət etdi.

Dövlətimizin başçısı ölkələrimiz arasında ikitərəfli münasibətlərin yaxşı inkişaf etdiyini bildirdi. Prezident İlham Əliyev Oman Sultanlığının Azərbaycanın mövqeyini beynəlxalq təşkilatlarda, xüsusilə BMT-də aparılan müzakirələrdə dəstəkləməsinin ölkəmizdə böyük minnətdarlıq hissi doğurduğunu dedi. Azərbaycan ilə Oman Sultanlığı arasında siyasi əlaqələrin yaxşı səviyyədə olduğunu qeyd edən dövlətimizin başçısı bu əlaqələrin iqtisadi sahəyə də müsbət təsir göstərəcəyinə ümidvar olduğunu bildirdi.

Səfir ölkələrimiz arasında əlaqələrin inkişafı ilə bağlı xoş sözlərə görə Prezident İlham Əliyevə minnətdarlıq etdi, Oman Sultanı Qabus bin Said Al Saidin salamlarını dövlətimizin başçısına çatdırdı. Səfir ikitərəfli münasibətlərimizin daha da inkişaf edəcəyinə ümidvar olduğunu söylədi.

Dövlətimizin başçısı Oman Sultanı Qabus bin Said Al Saidin salamlarına görə minnətdarlığını bildirdi, onun da salamlarını Omanın dövlət başçısına çatdırmağı xahiş etdi.

AzərTAc

Azərbaycan.- 2010.- 13 oktyabr.- S. 2.