Astanada Mənəvi mədəniyyət üzrə Dünya Forumu öz işinə başlamışdır

Oktyabrın 18-də Astanada Mənəvi mədəniyyət üzrə Ümumdünya Forumu öz işinə başlamışdır.

Tədbirdə dünyanın 71 ölkəsindən gəlmiş ictimai-siyasi, ədəbiyyat, mədəniyyət və incəsənət xadimləri, dünya şöhrətli alimlər, elmi-mədəni elitanın nümayəndələri iştirak edirlər.

Dörd yüzdən artıq nümayəndənin iştirak etdiyi tədbirdə Azərbaycanı ölkəmizin Rusiyadakı səfiri Polad Bülbüloğlu, Polşadakı səfirimiz Həsən Həsənov, Azərbaycan Yazıçılar Birliyinin sədri Anar, tarix elmləri doktoru Zaur Həsənov, Beynəlxalq İnformasiyalaşdırma Akademiyasının akademiki Maya Bədəlbəyli və digər şəxslər təmsil edirlər.

Forum iştirakçılarını Qazaxıstan Senatının sədri Qasımcomərt Tokayev salamlamış, Prezident Nursultan Nazarbayevin müraciətini oxumuşdur.

Müraciətdə deylir: "Əminəm ki, Mənəvi mədəniyyət üzrə Dünya Forumunun keçirilməsi mənəviyyatın gücləndirilməsi, mədəniyyətlərarası dialoqun genişləndirilməsi, müasir dünyanın sivil yolla inkişafında mühüm addım olacaqdır".

Forum oktyabrın 20-dək davam edəcəkdir.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.-2010.-19 oktyabr.- S. 3.