Azərbaycan-Rusiya əlaqələri intensiv inkişaf edir

Oktyabrın 28-də Milli Məclisin Sədri Oqtay Əsədov Rusiya Federasiyası Dövlət Duması və Federasiya Şurasının üzvləri ilə görüşmüşdür. Rusiya qanunvericilik orqanının təmsilçilərini Azərbaycanda görməkdən məmnunluq ifadə edən Oqtay Əsədov ölkələrimiz arasında münasibətlərin dinamik inkişaf etdiyini bildirdi. Qeyd etdi ki, ölkələrarası münasibətlərin inkişafında dövlət başçılarının qarşılıqlı səfərləri mühüm rol oynayır.

Milli Məclisin Sədri oktyabrın 27-də Azərbaycan Respublikasının Prezidenti İlham Əliyevin Rusiya Federasiyasına işgüzar səfərini xatırlatdı. Bildirdi ki, elə həmin gün Həştərxanda Azərbaycan xalqının ümummilli lideri Heydər Əliyevin abidəsinin açılış mərasimi olub: "Bu hadisə Azərbaycan və Rusiya arasında əlaqələrin yüksək səviyyədə inkişafının daha bir bariz göstəricisidir".

Oqtay Əsədov bildirdi ki, Azərbaycan və Rusiya arasında münasibətlər daim yüksələn xətt üzrə inkişaf edir. Bu münasibətlər müxtəlif sferaları, o cümlədən iqtisadi, ticarət əlaqələrini özündə ehtiva edir. Milli Məclisin Sədri qeyd etdi ki, ötən il özünün zirvə nöqtəsinə çatan qlobal maliyyə böhranı şəraitində ölkələrimiz arasında qarşılıqlı ticarət dövriyyəsinin həcmi 1 milyard dollardan çox olub. Hazırda isə bu rəqəm 2 milyard dolları keçib.

Dövlətlərarası münasibətlərin inkişafında parlamentlərin də mühüm rol oynadığını bildirən Oqtay Əsədov Milli Məclisdə Azərbaycan-Rusiya parlamentlərarası dostluq qrupunun fəaliyyət göstərdiyini xatırlatdı. Sədr cari ilin noyabrın 7-də Azərbaycanda yeni parlament seçkilərinin keçiriləcəyini də bildirdi. Milli Məclisin Sədri parlament seçkilərinin demokratik, azad, şəffaf və ədalətli keçirilməsi üçün bütün zəruri işlərin görüldüyünü qeyd etdi.

Rusiya Federasiyası Dövlət Dumasının Konstitusiya qanunvericiliyi və dövlət quruculuğu komitəsinin sədri Vladimir Pligin ölkələrarası münasibətlərin intensiv inkişafının hər iki dövlətin maraqlarına cavab verdiyini vurğuladı. Azərbaycanda sürətli tərəqqinin yaşandığını və ölkənin günü-gündən abadlaşdığını bildirən Vladimir Pligin bunun real təsdiqi kimi paytaxt Bakının simasının qısa zaman ərzində çox dəyişdiyini qeyd etdi: "Bura möhtəşəm şəhərdir. Mən 3-4 il əvvəl Bakıda olmuşdum. O vaxtdan indiyə qədər şəhər olduqca dəyişib, gözəlləşib. Siz bu görülən işlərlə fəxr edə bilərsiniz".

Pligin onu da qeyd etdi ki, Azərbaycan və Rusiya münasibətlərinin inkişafında dövlət başçıları, onların qarşılıqlı səfərləri həqiqətən də mühüm rol oynayır. O, Azərbaycanın Rusiya ilə, eyni zamanda Rusiyanın da Azərbaycanla əlaqələrinin daimi inkişafında maraqlı olduqlarını bildirdi.

Görüşdə tərəfləri maraqlandıran digər məsələlər ətrafında da fikir mübadiləsi aparıldı.

Azərbaycan.- 2010.- 29 oktyabr.- S. 3.