Monqolustanın Baş Dövlət Gömrük İdarəsi ilə Azərbaycan Dövlət Gömrük Komitəsi arasında əməkdaşlıq protokolu imzalanmışdır

 

Oktyabrın 28-də Dövlət Gömrük Komitəsində (DGK) Monqolustan Baş Dövlət Gömrük İdarəsinin nümayəndə heyəti ilə görüş keçirilmişdir.

Dövlət Gömrük Komitəsinin sədri Aydın Əliyev tədbiri açaraq bildirmişdir ki, görüşdən məqsəd kadrların hazırlanması və peşəkarlıq səviyyəsinin yüksəldilməsi ilə bağlı birgə əməkdaşlıq protokolunun imzalanmasıdır.

Azərbaycan ilə Monqolustan arasında dostluğun qədim tarixi kökləri olduğunu vurğulayan DGK-nın sədri sənədin imzalanması ilə əməkdaşlıq sahəsində yeni səhifə açılacağına əminliyini ifadə etmişdir.

A.Əliyev ümummilli lider Heydər Əliyevin Azərbaycanda rəhbərliyə qayıdışından sonra respublikada aparılan genişmiqyaslı sosial-iqtisadi islahatlar barədə qonağa ətraflı məlumat vermişdir. Son illər ölkənin gömrük xidməti sahəsində də xeyli iş görüldüyünü söyləyən DGK-nın sədri Azərbaycan iqtisadiyyatının inkişafında xüsusi çəkisi olan komitənin yeni informasiya texnologiyalarına və maddi-texniki bazaya malik olduğunu vurğulamışdır.

Azərbaycana gəlişindən məmnunluq duyduğunu bildirən Monqolustan Baş Dövlət Gömrük İdarəsinin sədri Derjye Tseveenjava ölkələrimiz arasında çoxillik dostluq və hərtərəfli əməkdaşlıq münasibətlərinin olduğunu vurğulamışdır. Azərbaycanda təhsil alan Monqolustan gənclərinin öz ölkəsinin iqtisadiyyatının inkişafında fəal rol oynadığını nəzərə çatdırmışdır.

Bildirilmişdir ki, Azərbaycanla Monqolustanın gömrük təşkilatları arasında yaranmış əlaqələrin inkişafı narkotik vasitələrin qeyri-qanuni daşınmasının və satışının qarşısının alınmasında müstəsna əhəmiyyət kəsb edəcəkdir. Azərbaycan qısa zaman kəsiyində iqtisadiyyatın bütün sahələrində mühüm irəliləyişlərə nail olmuşdur. Narkotiklərlə mübarizə, gömrük qurumlarının modernləşdirilməsi, qabaqcıl texnologiyalardan istifadə sahəsində Azərbaycanın böyük təcrübəsi örnək ola bilər.

Sonra Azərbaycan Dövlət Gömrük Komitəsi və Monqolustan Baş Dövlət Gömrük İdarəsi arasında kadrların hazırlanması və peşəkarlıq səviyyəsinin yüksəldilməsi sahəsində əməkdaşlıq protokolu imzalanmışdır.

 

 

AzərTAc

 

Azərbaycan.- 2010.- 29 oktyabr.- S. 11.