Gənc bəstəkarımız beynəlxalq müsabiqədə birinci yeri tutub

Türkər Qasımzadə gələn il İtaliyada keçiriləcək musiqi festivalları qaliblərinin qala konsertinə dəvət alıb

"Fəzada davamlılığın nadir formaları" adlı gənc bəstəkarlar müsabiqəsi Avstraliyanın Melburn şəhərində yerləşən İtaliya Mədəniyyət İnstitutu tərəfindən keçirilir. Müsabiqəyə dünya şöhrətli italiyalı bəstəkar, dirijor-maestro Carlo Forlivesi başçılıq edir. Bu festival-müsabiqə əvvəlcə Yaponiyada, ikinci dəfə isə Avstraliyada təşkil olunmuşdur. Festivalın məqsədinə dünyanın bir çox ölkəsində konsertlərin təşkili, yeni yazılan musiqinin təbliği və gənc bəstəkarların üzə çıxarılmasına xidmət məsələləri daxildir.

İtaliya Mədəniyyət İnstitutunun keçirdiyi bu festival-müsabiqə digər musiqi tədbirlərindən seçilir: hər dəfə orijinal musiqi konsepsiyaları təqdim edilir. Builki festivalın ideyası onunla şərtlənirdi ki, dünyanın bir sıra ölkələrindən olan, italyan dilini bilməyən gənc bəstəkarlar mətnlə musiqinin üzvi əlaqəsini necə ifadə etmək bacarıqlarını nümayiş etdirsinlər. Yəni italiyan dilindəki mətnə öz yaradıcılıq prizmalarından baxıb, fərqli yanaşma tərzlərini sərgiləsinlər. Bu məqsədlə 20 gənc italyan şairinin şeirləri finalistlərə yollanmış və onlardan yazılacaq əsərlərdən material və ya mənbə kimi istifadə olunması xahiş edilmişdi.

Dünyanın bir çox ölkəsindən 60 bəstəkar öz əsərlərini müsabiqədə iştirak etmək üçün göndərmişdi. Dünya musiqi dairələrində kifayət qədər tanınmış italyan, alman, avstriyalı mütəxəssislərdən ibarət münsiflər heyəti həmin əsərlərin içərisindən 11-ni seçmişdi. Finala çıxan gənc bəstəkarların arasında Türkər Qasımzadənin də yer alması Azərbaycan musiqi mədəniyyətinin Avropa məkanında özünə daim layiqli yer tutması deməkdir.

Müsabiqənin ikinci turu isə həmin bəstəkarlardan 4-nün seçilərək əsərlərinin Adelaida səhnəsində ifa olunmasına həsr edilmişdir. Müsabiqənin qalibinin həmyerlimiz Türkər Qasımzadənin olması nəinki sevindiricidir, bu, hətta, gənc musiqiçilərimizin qələbəsinin davamlılığı deməkdir.

Gənc bəstəkarımızın italyan şairi Vivian Lamarquenin şeirinə yazdığı fortepiano üçün "Vu cumpra" əsəri pianist Kenci Fujimira tərəfindən Adelaidada ifa olunarkən radio vasitəsilə Avstraliyaya yayımlanmışdır.

İlk beynəlxalq musiqi festivalında respublikamızı təmsil edən gənc bəstəkar Türkər Qasımzadə hazırda Heydər Əliyev Fondunun və Təhsil Nazirliyinin dəstəyi ilə Nyu-York Konservatoriyasının bəstəkarlıq üzrə magistraturasında təhsilini davam etdirir.

M.SADIQZADƏ

Azərbaycan.- 2010.- 31 oktyabr.- S. 7.