Niderland Azərbaycanla ikitərəfli münasibətlərin genişləndirilməsində maraqlıdır

Ölkəmizdə səfərdə olan Niderland Krallığı Senatının sədri Rene van der Linden sentyabrın 8-də Milli Məclisə gəldi. Əvvəlcə Milli Məclisin iclas zalı, yeni inzibati binası ilə tanış olan qonaq deputatların fəaliyyəti üçün yaradılmış şəraiti yüksək qiymətləndirdi. Heydər Əliyev xatirə zalında ulu öndərin zəngin həyat yolunu, siyasi və dövlətçilik fəaliyyətini əks etdirən çoxsaylı eksponatlarla tanış olan Niderland Senatının sədri Xatirə kitabına ürək sözlərini yazdı.

Sonra Rene van der Linden Milli Məclisin Sədri Oqtay Əsədovla görüşdü. Qonağı salamlayan Oqtay Əsədov onun Azərbaycana qarşı xoş münasibəti ilə tanındığını qeyd etdi: "Siz Avropa Şurası Parlament Assambleyasının sədri olarkən bu təşkilatla Azərbaycan arasında əlaqələrin dərinləşməsinə böyük töhfələr vermisiniz. Çox şadıq ki, sizin Azərbaycanın dövlət başçısı ilə gözəl münasibətləriniz var".

Oqtay Əsədov bildirdi ki, Rene Van der Linden AŞ PA-ya sədrliyi dövründə olduğu kimi yenə də Azərbaycanın dostu olaraq qalır. Niderland Senatının sədri seçildikdən dərhal sonra sizin təşəbbüsünüzlə Niderland-Azərbaycan parlamentlərarası dostluq qrupunun yaradılması bunu bir daha təsdiqləyir. Oqtay Əsədov bu qrupa məhz Rene van der Lindenin rəhbərlik etməsini onun Azərbaycana dost münasibətinin bariz təzahürü kimi dəyərləndirdi. Milli Məclisin Sədri bu səfərdən sonra Azərbaycanla Niderland arasında parlamentlərarası əlaqələrin daha da dərinləşəcəyinə və yüksələn xətlə inkişaf edəcəyinə əminliyini ifadə etdi.

Rene van der Lindenin AŞ PA sədri vəzifəsində çalışdığı dövrdə Azərbaycana daim dəstək verdiyini məmnunluqla xatırladan Oqtay Əsədov Ermənistan-Azərbaycan, Dağlıq Qarabağ münaqişəsinin həlli ilə bağlı onun hər zaman nümayiş etdirdiyi prinsipial mövqeyinə görə təşəkkürünü ifadə etdi. "İnanıram ki, siz yenə öz mövqeyinizdəsiniz və bundan sonra da Dağlıq Qarabağ probleminin həlli ilə bağlı səylərinizi əsirgəməyəcəksiniz" -deyə Oqtay Əsədov bildirdi.

Görüş üçün təşəkkürünü bildirən Rene van der Linden Azərbaycanın onun üçün dost ölkə olduğunu dedi. Qeyd etdi ki, onun Azərbaycana səfəri ilk növbədə bu ölkəyə olan yaxşı münasibətinin təcəssümüdür. Qonağın sözlərinə görə, Niderland Azərbaycanla əlaqələrin inkişafında maraqlıdır. Qlobal maliyyə böhranına baxmayaraq Niderlandın Azərbaycanda səfirliyini açması buna əyani sübutdur. Bu səfərdə də məqsəd Niderlandla Azərbaycan arasında ikitərəfli münasibətlərin, o cümlədən parlament diplomatiyasının genişləndirilməsi ilə bağlı müzakirələr aparmaqdır.

Görüşdə qarşılıqlı maraq doğuran digər məsələlər də müzakirə olundu.

Azərbaycan.- 2010.- 9 sentyabr.- S. 2.