Niderland Krallığı Senatının sədri Milli Məclisin deputatları ilə görüşüb

Ölkəmizdə səfərdə olan Niderland Krallığı Senatının sədri Rene van der Linden sentyabrın 8-də Milli Məclisin Beynəlxalq münasibətlər və parlamentlərarası əlaqələr komitəsinin üzvləri ilə görüşdü.

Qonağı salamlayan komitənin sədri, Azərbaycanın AŞ PA-dakı nümayəndə heyətinin rəhbəri Səməd Seyidov dedi ki, Azərbaycan və Niderland parlamentlərinin deputatları beynəlxalq təşkilatlarda çox yaxşı əməkdaşlıq edirlər. Bu yaxınlarda Niderland parlamentinin bir qrup deputatı Azərbaycanda səfərdə olmuşdur. Onlar olduqca səmərəli görüşlər keçirmiş, ikitərəfli əlaqələrin inkişafına dair fikir mübadiləsi aparmışlar. İnanırıq ki, bu cür səfərlər bizi daha da yaxınlaşdırır, əməkdaşlığımızı genişləndirir.

Rene van der Linden yenidən Bakıda olmasından məmnunluğunu ifadə etdi. Bildirdi ki, hər gəlişində Bakıda güclü inkişaf getdiyini müşahidə edir. Azərbaycana səfərinin məqsədi isə siyasi, iqtisadi sahələrdə əlaqələrin daha da inkişafına dair fikir mübadiləsi aparmaqdır.

Görüşdə qarşılıqlı maraq doğuran digər məsələlər ətrafında geniş fikir mübadiləsi aparıldı.

Azərbaycan.- 2010.- 9 sentyabr.- S. 2.