Avropa Şurasının eksperti Azərbaycanda mədəni irsin vəziyyətinin qiymətləndirilməsi hesabatı ilə bağlı müzakirələr aparmışdır

Avropa Şurasının Kiyev Təşəbbüsü Regional Proqramı çərçivəsində bu beynəlxalq qurumun "Tarixi şəhərlərdə mədəni irsin bərpası" layihəsi üzrə eksperti Robert Pikard Azərbaycanda səfərdə olmuşdur. Səfər çərçivəsində Mədəniyyət və Turizm Nazirliyində Robert Pikard ilə ölkə üzrə mədəni irsin vəziyyətinin qiymətləndirilməsi hesabatı ilə bağlı müzakirələr aparılmışdır.

Nazirlikdən AzərTAc-a bildirmişlər ki, müzakirələr Avropa Şurası tərəfindən təqdim edilmiş təlimat suallarına uyğun aparılmışdır. Görüşdə qeyd olunmuşdur ki, sözügedən qiymətləndirmə hesabatı kifayət qədər ciddi sənəddir və onun hazırlanmasına hər bir iştirakçı ölkə tərəfindən mühüm əhəmiyyət verilməlidir.

Müzakirələr zamanı ekspert tərəfindən ünvanlanan suallar şifahi olaraq cavablandırılmış və hesabatın Azərbaycan tərəfindən bu il sentyabrın 20-dək hazırlanaraq Avropa Şurasına göndərilməsi barədə razılığa gəlinmişdir. Hesabat təqdim edildikdən sonra hər bir ölkə 10 tarixi şəhərin namizədliyini Avropa Şurasına təqdim etməli və bunun üçün müvafiq sənədləri hazırlamalıdır. "Tarixi şəhərlərdə mədəni irsin bərpası" layihəsinin əsası 2009-cu ilin noyabrın 6-7-də Sloveniyanın Lyublyana şəhərində keçirilmiş "Bizim ümumi Avropa irsimizin bərpası" mövzusunda Nazirlər Konfransında qoyulmuşdur.

Layihənin məqsədi milli, regional və yerli səlahiyyətli orqanlara kiçik tarixi şəhərlərin, onların ətraf mühitinin abidələr və ərazinin yenidənqurma və təkrar işlənməsi vasitəsilə canlandırılmasında, davamlı sosial və iqtisadi inkişafı üçün strateji inkişaf planının həyata keçirilməsində yardım etməkdir.

Bununla bağlı sentyabrın 24-25-də Makedoniyanın Skopye şəhərində keçiriləcək Avropa Şurası Nazirlər Konfransında müzakirələrin aparılması gözlənilir.

Azərbaycan.- 2010.- 14 sentyabr.- S. 7