Qəlbi günəş dolu insan

Yazıma bu sərlövhəni elə-belə seçməmişəm. Həmkarlarının, dostlarının hörmət və ehtiramını qazanan Akif Aslan oğlu Quliyev jurnalistikamızda öz yeri olan işıqlı qələm sahiblərindən biridir. A.Quliyev 1935-ci il sentyabrın 23-də Azərbaycanın dilbər guşələrindən olan Quba şəhərində, ziyalı ailəsində anadan olmuşdur. Atası Aslan Quliyev kimya elmləri namizədi, Azərbaycanın əməkdar müəllimi idi.

Akif Quliyev 1961-ci ildə Azərbaycan Dövlət Universitetinin jurnalistika şöbəsini bitirmişdir. 50 ildir ki, mətbuatda çalışır. Əmək fəaliyyətinin son 48 ilini uşaq mətbuatında, dövlət tərəfindən himayə olunan və maliyyələşdirilən, 73 illik bir tarixi olan "Savalan" qəzetində (keçmiş "Azərbaycan pioneri") davam etdirir. Baş redaktorun müavinidir. Akif Quliyev Azərbaycan uşaq mətbuatı tarixində yeganə şəxsdir ki, yarım əsrə yaxın müddət ərzində bu sahədə fəaliyyətini davam etdirir.

O, ən ülvi və müqəddəs bir işdə, gənc nəslin vətənpərvərlik ruhunda tərbiyə olunmasında, onun sağlam və gümrah böyüməsində, vətənin əsl layiqli övladları kimi yetişmələrində xidmət göstərir. Hələ Qubada orta məktəbdə oxuyarkən 1953-1956-cı illərdə fəaliyyət göstərən "Sülh prospektinin uşaqları" adlı idman klubu yaratmış və bu klub o vaxtlar nəinki rayonda, həm də bütün respublikada məşhurlaşmışdı. Bu haqda mərkəzi qəzet və jurnallarda çoxsaylı yazılar dərc olunmuşdur. 1963-cü ildə "Azərbaycan pioneri" qəzetində işə başladığı ilk günlərdən etibarən həmin ənənəni davam etdirərək uşaqlar və yeniyetmələr arasında son dərəcə böyük şöhrət tapmış məşhur "Sevinc" futbol klubunun yaradıcısı və təşkilatçısı olmuşdur. O, Azərbaycan Komsomolu Mərkəzi Komitəsinin nəzdində yaradılan idman və hərbi vətənpərvərlik üzrə Respublika Qərargahının məsul katibi olmuşdur. Onun rəhbərlik etdiyi komandalar SSRİ məkanında böyük şöhrət tapmış və hər il müntəzəm olaraq ən böyük şəhərlərdə, müttəfiq respublikaların paytaxtlarında keçirilən Ümumittifaq "Dəri top" yarışlarından 21 dəfə Azərbaycana qızıl, gümüş və bürünc medallarla qayıtmışlar.

Akif Quliyev uzun müddət uşaqlar və yeniyetmələr arasında Ümumittifaq miqyasında keçirilən "Qızıl top" (basketbol), "Gümüş top" (voleybol), yüngül atletikanın dörd növü üzrə beynəlxalq "Dostluq" oyunlarının və xüsusilə Azərbaycanda çox məşhur olan "Ağ top" şahmat yarışlarının respublikamızda əsas təşkilatçılarından biri kimi tanınmışdır. O, 1998-ci ildən etibarən 13 ildir ki, kütləvi informasiya vasitələrinin əməkdaşları arasında 28 may Respublika Gününə həsr olunmuş və "Azərbaycan" nəşriyyatının mükafatları uğrunda keçirilən ənənəvi şahmat yarışlarının yaradıcılarından və təşəbbüskarlarından biridir. Təşkilat Komitəsinin məsul katibidir. A.Quliyev həmçinin Azərbaycan Milli Olimpiya Komitəsinin mükafatları uğrunda mətbuat işçiləri arasında keçirilməyə başlayan blits-turnir (sürətli şahmat) yarışlarının da təşkilatçılarındandır.

Böyüməkdə olan gənc nəslin təlim-tərbiyəsində fəal iştirak etdiyinə və uzun illər mətbuat sahəsindəki xidmətlərinə görə Akif Quliyev üç dəfə Azərbaycan Respublikası Ali Soveti Rəyasət Heyətinin fəxri fərmanları ilə təltif olunmuşdur. Onun yarım əsrlik jurnalistlik fəaliyyəti, təşkilatçılıq bacarığı müstəqil dövlətimiz tərəfindən qiymətləndirilmiş və o, 2005-ci ildə milli mətbuatımızın böyük təntənə ilə qeyd olunan 130 illik yubileyi ərəfəsində Azərbaycan Respublikasının Prezidenti cənab İlham Əliyevin imzaladığı sərəncamla "Əməkdar mədəniyyət işçisi" fəxri adına layiq görülmüşdür.

Akif Quliyev ayrı-ayrı nazirliklərin, komitə və təşkilatların, mətbuat orqanlarının 100-dən artıq fəxri fərmanı və diplomu ilə mükafatlandırılmışdır.

"Mətbuatda uzun müddət fəaliyyətinə, ədəbi-publisistik yaradıcılığında vətəndaşlıq mövqeyinə və sənətkarlıq uğurlarına görə hərbi-vətənpərvərlik və idman mövzularında sanballı və çoxsaylı yazıların müəllifi" kimi bir çox media mükafatlarını almışdır. 2010-cu il ərəfəsində isə Akif Quliyev Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi respublika müsabiqəsində "İdmanın inkişafı - gənclərin fiziki və mənəvi kamilliyinə aparan yol" nominasiyası üzrə qalib adına layiq görülmüşdür.

Akif Quliyevə müasirləri, həmyaşıdları, həm də gənclər arasında hörmət qazandıran bir neçə cəhəti də qeyd etməliyəm. O, yüksək milli mənlik duyğusuna malik vətəndaş və ziyalıdır. Dostluq etdiyimiz uzun illər ərzində şəxsi söhbətlərdə əməli fəaliyyətində heç bir uyğunsuzluq görməmişəm. Çünki o, əbədini ötəridən ayırmağı bacaran, milləti tarixdə saxlayan əzəli prinsipləri fəxarətlə uca tutan insandır. A.Quliyev həm jurnalistika, həm də təşkilatçılıq sayəsində istedadlı adamdır. Onun balaca zərif vücudunda iki böyük qüdrət nəfəs alır: böyük ürəyi və bənzərsiz istedadı.

İnanmaq olmur ki, Akif müəllimin 75 yaşı tamam olur. Onu bu yaşda heç cür təsəvvür edə bilməsək də, yaş yaşdır, pillə-pillə ötüb keçir.

A.Quliyev 50 ildir ki, balaca, fəqət inamlı addımları ilə, çəliyini yerə vura-vura Azərbaycan jurnalistikasının tarixinə daxil olub. Qoy pak, məsum qəlbi, onu 75 il öncə anadan olduğu gündən necə izləyirsə, səksən, doxsan, yüz yaşında da beləcə izləsin, ömür yoldaşı olsun. Çox istərdik ki, hərdən bizə zarafatla "Heç bilmirəm ürəyim hardadır, sağdamı, soldamı" deyən Akif müəllimin ürəyi elə əvvəlki sevdasında olsun, onu incitməsin, qayğılardan uzaq etsin. Qələmi külüng, ürəyi söz xəzinəsi olan Akif Quliyev öz imzası ilə, gördüyü işlərlə, təşkilatçılıq bacarığı ilə neçə-neçə sağlam həmkarının edə bilmədiyi işlərə görə nümunə olası bir insandır.

A.Quliyev həqiqətən sirli-sehrli bir aləmdir. Onun jurnalistika dünyası cazibədar, təlatümlüdür. Yazılarında bir şairanəlik var, hər sözü, hər cümləsi ürəkdən gəlir. Ömrünün müdrik zirvəsində olan Akif Quliyev bütün varlığı, həyatı, ruhu ilə çalışır, üzərinə götürdüyü jurnalist peşəsinə çətin və əziyyətli olsa da, ləyaqətlə xidmət edir. Onun "Savalan"dakı müzəffər əməlləri Savalan kimi əbədidir. 75 yaşın zirvəsindən boylanıb fəxrlə geriyə baxmağa dəyər. Burada təkcə illərin sayı yox, əməllərin sanbalı var.

Nizaməddin ŞƏMSİZADƏ,

Azərbaycan Respublikası Dövlət mükafatı laureatı,

filologiya elmləri doktoru, professor

Azərbaycan.- 2010.- 23 sentyabr.- S. 7.