2010-cu il "Bioloji Müxtəliflik İli" elan edilmişdir

Birləşmiş Millətlər Təşkilatı 2010-cu ili "Beynəlxalq Bioloji Müxtəliflik İli" elan etmişdir. BMT bununla dünya ictimaiyyətinin diqqətini planetin təbiətini qorumaq, ondan səmərəli istifadə etmək, Yer kürəsinin ekoloji sistemlərinin qorunub saxlanması və təbiətin xüsusilə qiymətli obyektlərini müdafiə etmək üçün səyləri birləşdirmək zərurətinə cəlb etməyə çalışır.

İçməli sudan, enerji ehtiyatlarından israfçılıqla istifadə edilməsi, meşələrin kütləvi şəkildə qırılması, kənd təsərrüfatının idarə edilməsinin müasir üsulları və insan fəaliyyətinin digər növləri ətraf mühitə dağıdıcı təsir göstərir, bioloji müxtəlifliyin azalmasına gətirib çıxarır. Bu gün 7 mindən çox heyvan növü və 60 minə yaxın bitki növü yox olmaq təhlükəsi qarşısındadır.

BMT Baş Məclisi 2006-cı il 20 dekabr tarixli qətnamə ilə 2010-cu ili "Beynəlxalq Bioloji Müxtəliflik İli" elan etmişdir. 2008-ci il dekabrın 19-da Baş Məclis BMT-nin üzvü olan bütün dövlətlərə beynəlxalq bioloji müxtəliflik ilinin keçirilməsi üçün yerli xalqların və yerli icmaların nümayəndələrindən ibarət milli komitələr yaratmağı tövsiyə etmiş və bütün beynəlxalq təşkilatlara bu hadisənin qeyd olunmasını təklif etmişdir.

2010-cu ildə Baş Məclisin 65-ci sessiyası çərçivəsində beynəlxalq bioloji müxtəliflik ilini dəstəkləmək üçün dövlət və hökumət başçılarının iştirakı ilə bir günlük yüksək səviyyəli müşavirə keçiriləcəkdir.

2000-ci ildə dünya liderləri Minilliyin Qətnaməsini qəbul etmiş və həmin sənəddə XXI əsrdə səkkiz sahədə inkişafın məqsədlərini təyin etmişlər. Həmin məqsədlərdən biri də bioloji müxtəlifliyin itirilməsi sürətini azaltmağa yönəlmişdir.

1992-ci ildə Rio de-Janeyroda ətraf mühit və inkişaf məsələlərinə həsr edilmiş dünya sammitində bioloji müxtəliflik haqqında konvensiya qəbul edilmişdir. Konvensiya 188 ölkə tərəfindən ratifikasiya edilmiş və ən nüfuzlu beynəlxalq müqavilələrdən birinə çevrilmişdir.

AzərTAc

Azərbaycan.- 2010.-7 yanvar.- S. 5.