Pakistanın nüfuzlu "Daily İttehad" qəzetinin iki səhifəsi Azərbaycana həsr edilmişdir

Pakistanın geniş oxucu kütləsinə malik, gündəlik ingilis və urdu dilli "Daily İttehad" qəzetinin 8 yanvar tarixli nömrəsinin iki səhifəsi Azərbaycana həsr edilmişdir.

Azərbaycanın Pakistandakı səfirliyindən bildirmişlər ki, ötən ilin noyabrında Bakıda keçirilmiş "Sivilizasiyalararası dialoq: Azərbaycandan baxış" mövzusunda konfransda iştirak etmiş qəzetin redaktoru Tahir Faruq ölkəmizə dair təəssüratlarını əks etdirən məqalə yazmışdır.

T.Faruq Azərbaycanı İslam dünyasının modern üzü adlandırmış, ölkəmizdəki dövlət-din münasibətlərini, müxtəlif dinlərin bir-biri ilə ahəngdar şəkildə əlaqədə olduğunu ifadə etmişdir.

Ümummilli lider Heydər Əliyev və Prezident İlham Əliyev haqqında geniş məlumat verilən yazıda, Azərbaycanın bugünkü inkişafında onların oynadığı böyük rola diqqət çəkilmişdir.

Məqalədə Tahir Faruq AzərTAc-ın baş direktoru Aslan Aslanov, Bakı Dövlət Universitetinin şərqşünaslıq fakültəsinin urdu dili şöbəsinin tələbələri ilə görüşləri barədə də xoş təəssüratlarını bölüşmüşdür.

Qəzetdə ötən il ölkəmizdə səfərdə olmuş Pakistanın Preston Universitetinin rektoru Abdul Basitin də "Sivilizasiyalararası dialoq: Azərbaycandan baxış" konfransı çərçivəsində Azərbaycanın xarici işlər nazirinin müavini Vaqif Sadıqov və Xəzər Universitetinin rektoru professor Hamlet İsaxanlı ilə keçirdiyi görüşlər, Azərbaycan haqqında təəssüratları barədə məqaləsi dərc olunmuşdur.

Bundan əlavə, qəzetdə "Bakı İslam tarixinin mirası" adlı məqalə də nəşr edilmişdir. Məqalədə Bakının keçmişi və bu günü geniş şəkildə təsvir edilərək, ölkəmizin müstəqillik qazanmasından sonra əldə olunmuş nailiyyətlərə geniş yer ayrılmışdır.

Azərbaycanın Pakistandakı səfiri Eynulla Mədətlinin qəzetin redaktoru Tahir Faruqa verdiyi müsahibə də burada dərc olunmuşdur. Səfir müsahibədə ölkəmiz haqqında geniş məlumat verərək, dost Pakistan ilə Azərbaycan arasında əlaqələrin keçmişi, bu günü və perspektivləri haqqında fikirlərini açıqlamışdır.

Azərbaycan.- 2010.- 12 yanvar.- S. 3.