Humanitar Əməkdaşlıq üzrə Birinci Azərbaycan-Rusiya Forumu başa çatmışdır

Yanvarın 23-də Humanitar Əməkdaşlıq üzrə Birinci Azərbaycan-Rusiya Forumunun bağlanış mərasimi olmuşdur.

Forumun yekununda birgə bəyanat qəbul edilmişdir.

Tədbirdə İTAR-TASS agentliyinin baş direktoru Vitali İqnatenko çıxış edərək forumun çox səmərəli keçdiyini bildirdi. Həm Rusiyanın, həm də Azərbaycanın tanınmış, nüfuzlu şəxslərinin qatıldığı tədbirin əhəmiyyətindən danışan Vitali İqnatenko qeyd etdi ki, bu, gələcək əməkdaşlığın inkişafına böyük töhfə verəcəkdir. Görkəmli dövlət xadimi, Azərbaycanın ümummilli lideri Heydər Əliyevi şəxsən tanıdığından qürur duyduğunu bildirən Vitali İqnatenko ulu öndərlə bağlı xatirələrini bölüşdü.

Tədbirdə çıxış edən Azərbaycan Prezidenti Administrasiyasının rəhbəri, akademik Ramiz Mehdiyev bildirdi ki, forum hər iki ölkə üçün böyük əhəmiyyət kəsb edir. Azərbaycanın regionda ən sabit ölkə olduğunu vurğulayan Ramiz Mehdiyev bildirdi ki, respublikamız bölgədə irimiqyaslı layihələrin müəllifi və təşəbbüskarıdır.

Daha sonra Azərbaycan Prezidenti Administrasiyasının rəhbəri dövlətimizin başçısının Azərbaycanın neft kapitalının insan kapitalına çevrilməsi üçün apardığı genişmiqyaslı işlərdən danışdı, yaxın gələcəkdə ölkəmizdə müxtəlif sahələrdə həyata keçiriləcək böyük layihələr barədə məlumat verdi.

Rusiya Prezidenti Administrasiyasının rəhbəri Sergey Narışkin isə forumun yüksək səviyyədə təşkilinə görə təşəkkürünü bildirdi və dedi ki, bu tədbir Azərbaycan-Rusiya münasibətlərinin inkişafında daha bir addım oldu. Qonaq gələcəkdə forum çərçivəsində görüləcək işlərin daha da genişləndirilməsinin zəruriliyini vurğulayaraq prosesə vətəndaş cəmiyyətinin bütün təbəqələrinin cəlb ediləcəyinə ümidvar olduğunu qeyd etdi.

Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy, yazıçı Çingiz Abdullayev, Moskva Dövlət Beynəlxalq Münasibətlər İnstitutunun (MDBMİ) rektoru, Rusiya Elmlər Akademiyasının akademiki Anatoli Torkunov, Bakı Slavyan Universitetinin rektoru Kamal Abdulla və digər çıxış edənlər forumun ikitərəfli münasibətlərin inkişafına töhfə verəcəyinə əmin olduqlarını bildirdilər, müxtəlif sahələrdə əməkdaşlığın genişləndirilməsi üçün gözəl imkanların yaradılacağını vurğuladılar.

Tədbirin sonunda İTAR-TASS agentliyinin baş direktoru Vitali İqnatenko forum iştirakçıları adından birgə bəyanatın qəbul edildiyini bildirdi və qeyd etdi ki, onlar Azərbaycan və Rusiya prezidentlərinin forumun fəxri sədrləri olması təklifini irəli sürmüşlər.

(Geniş hesabat qəzetin növbəti nömrəsində dərc olunacaqdır).

AzərTAc

Azərbaycan.- 2010.- 24 yanvar.- S. 3.