Tarix özü bizim dost
olmağımızı istəyir
Humanitar Əməkdaşlıq üzrə Azərbaycan-Rusiya Forumunun iştirakçıları - "Tribuna" qəzetinin baş redaktoru Oleq Kuzin, "Selskaya jizn" qəzetinin baş redaktoru Şamun Kagermanov və "İzvestiya" qəzetinin baş redaktoru Vitali Abramov və başqaları ilə AzərTAc-da görüşümüzün əvvəlində Ş.Kagermanov Bakıya xüsusi olaraq gətirdiyi "Selskaya jizn" qəzetinin 1979-cu il 8 sentyabr tarixli nömrəsini bizə təqdim etdi. Qəzetin birinci səhifəsində Heydər Əliyevə yüksək mükafatın təqdim olunması barədə material dərc edilmişdir. Təbii ki, ilk tanışlıqdan sonra biz qonaqlardan Azərbaycanın onlar üçün nə ilə maraqlı olması, ölkəmiz barədə bildikləri, Azərbaycanda baş verən hadisələrin qəzetlərində necə əksini tapması barədə soruşduq.
"Selskaya jizn" qəzetinin baş redaktoru Ş.Kagermanov demişdir:
- Azərbaycan haqqında xəbərlər, xüsusilə kənd təsərrüfatı barədə məlumatlar mənim üçün həmişə maraqlıdır. AzərTAc-ın kənd təsərrüfatı ilə bağlı materiallarını məmnuniyyətlə dərc edirik. Bu səfərimdə çox şeylər öyrəndim, təəssüf ki, vaxtımız azdır, teatrlara, muzeylərə gedə bilmədik... Azərbaycan Prezidentinin mətbuat xidməti ilə danışmışıq, ola bilsin ki, mən Azərbaycanın kənd təsərrüfatı nazirindən müsahibə aldım. Yazda bir daha bura gəlməyi, imkan yaranarsa, Prezidentlə görüşməyi planlaşdırıram. Ümumrusiya Azərbaycan Konqresinin rəhbərliyi ilə Bakıda görüşməyimdən məmnunam. Bilirəm ki, Rusiyada, onun bir çox vilayətlərində və rayonlarında xeyli soydaşınız yaşayır. Onların əksəriyyəti əvvəllər sovxozlara və kolxozlara məxsus olmuş təsərrüfatlara uğurla rəhbərlik edir.
Oleq Kuzin Bakıda bir
neçə dəfə olmuşdur. Şəhərimizi
tanıyır və sevir. Başçılıq etdiyi qəzet
də Azərbaycanla sıx əlaqəlidir. Azərbaycan rəhbərləri
haqqında iki kitabın müəllifi Viktor Andriyanov da
"Tribuna" qəzetinin əməkdaşıdır. Bu
kitablardan biri ümummilli lider Heydər Əliyevə həsr
olunmuş və "Görkəmli şəxslərin həyatı"
seriyasında nəşr edilərək bir neçə dilə
tərcümə edilmişdir. Digər kitab isə Azərbaycan
Prezidenti İlham Əliyevə həsr olunmuşdur. Hər iki
kitab Azərbaycan yazıçısı, qəzetin daimi
müəllifi Hüseynbala Mirələmovun iştirakı ilə
ərsəyə gəlmişdir. "Tribuna" qəzetinin əməkdaşları
arasında azərbaycanlı Rafael Hüseynov da vardır.
O.Kuzin demişdir:
- Biz artıq 15 ildir ki,
"MDB-nin 100 rəhbəri" məcmuəsini dərc
edirik. Nəşrlərdə rəhbərlərin ən
yaxşılarından söhbət açırıq. Məcmuənin
elə bir nömrəsi yoxdur ki, orada azərbaycanlılardan
danışılmasın. Bu, publisistikadır. Qəhrəmanlarımızın
əksəriyyəti ilə əlaqələrimiz şəxsi
dostluq münasibətlərinə çevrilmişdir.
Bakıda məni əziz dost
kimi qarşılayırlar. Bu dəfə İçərişəhəri
piyada gəzdim. Milli Azərbaycan Tarixi Muzeyinin ekspozisiyası
ilə tanış oldum. Azərbaycanın tarixi məni həmişə
maraqlandırır. Qədim sikkələr kolleksiyamda Azərbaycan
ərazisində zərb edilmiş sikkələrə də
rast gəlmək olar. Moskvada çoxlu azərbaycanlı
yaşayır. Onlar Rusiya cəmiyyətinə Bakı
mentalitetini, mədəniyyətini və qonaqpərvərliyini
gətirmişlər. Əlbəttə, Azərbaycanın nə
ilə yaşadığı, mövcud problemləri barədə
məlumatımız vardır. Prezident İlham Əliyev də
bu barədə bizə danışdı. Azərbaycanın,
ölkə iqtisadiyyatının inkişaf sürəti bizi
sevindirir.
Bu gün şəhəriniz
böyük inşaat meydançasına çevrilmişdir.
Axırıncı dəfə burada 5 il əvvəl olmuşam
və müqayisə edə bilərəm. Tamamilə başqa
mənzərədir. Bakıya gələn hər bir qonaq hava
limanına aparan yolu qiymətləndirməyə bilməz. Bu,
Bakının vizit kartıdır. Mikrorayonda
qaçqınların yaşadığı evi gördüm.
Çox acı mənzərədir. Prezident İlham Əliyev
demişdir ki, Qarabağ problemi həll edilməsə, regionun
inkişafından danışmaq mümkün deyildir.
Prezidentin qəbulunda irəli
sürülən bu görüşümüzün illik və
açıq foruma çevrilməsi təklifini dəstəkləyirəm.
Forumda təkcə Azərbaycan və Rusiya nümayəndələri
deyil, digər ölkələrin də təmsilçilərinin
iştirakı yaxşı olardı. Prezident bu təklifi
maraqla qarşıladı. Düşünürəm ki, bundan
sonra tez-tez görüşəcəyik.
AzərTAc
Azərbaycan.- 2010.- 28 yanvar.- S. 3.